Միջազգային դրամաշնորհներով մշակված և Հայաստանում աղքատությունը կրճատելու հավակնություն ունեցող Աղքատության հաղթահարման ռազմավարական ծրագիրը ամենաերկարաժամկետն ու ամենաթանկն է մինչև օրս իրականացված բոլոր ծրագրերից:

Հինգշաբթի օրը ծրագրի պաշտոնական շնորհանդեսի ժամանակ վարչապետ Անդրանիկ Մարգարյանը հայտարարեց, որ դրա իրականացման նորմալ ընթացքի համար պատասխանատվություն են վերցրել երեք կոալիցիոն կուսակցությունները:

Շնորհանդեսի իր ելույթում վարչապետը նշեց նաև, որ ծրագիրը իրատեսական է և իրագործելի՝ միաժամանակ կարևորելով հասարակական վերահսկողության դերը. - «Որովհետև կան գերատեսչական շահեր, կան միջգերատեսչական շահեր, որոնք կարող են և խանգարել այդ ցուցանիշներին հասնելուն: Դրա համար մենք շահագրռված ենք, որ գործընթացը լինի թափանցիկ, հրապարակային, և հսկողություն լինի հասարակության կողմից»:

Ծրագրի շրջանակներում, «բարձր տեմպերով հարատև տնտեսական աճման ապահովման, ինչպես նաև սոցիալական պաշտպանության արդյունավետ քաղաքականության իրականացմանն ուղղված միջոցառումների արդյունքում», նախատեսվում է աղքատ բնակչության թվաքանակը աստիճանական կրճատմամբ 2015 թվականին հասցնել 19,7 տոկոսի (2001 թվականին այդ ցուցանիշը կազմել է 50,9 տոկոս):

Աղքատությունն, ըստ էության, կրճատված կարելի է համարել այն պահից, երբ յուրաքանչյուր մարդու հասանելի լինի գիտականորեն ընդունելի և միջազգային չափանիշներն ու տվյալ երկրի առանձնահատկությունները հաշվի առնող սպառողական նվազագույն զամբյուղը: Ներկայիս գներով դրա նորմատիվային, այսինքն՝ գիտականորեն հաշվարկված պարունակությունը կազմում է 29 հազար դրամ (2412 կիլոկալորիա): Մինչդեռ ֆինանսների և էկոնոմիկայի նախարար Վարդան Խաչատրյանը այսօր լրագրողներին ասաց, որ նախատեսվում է ուսուցիչների աշխատավարձը դարձնել 30 հազար, իսկ նվազագույն աշխատավարձը պետք է սահմանել 13 հազար դրամ:

Վարդան Խաչատրյանը «Ազատություն» ռադիոկայանի հետ զրույցում անհավանական համարեց ինչպես 29 հազար դրամը, այնպես էլ 2412 կիլոկալորիան՝ պնդելով, թե նվազագույն սպառողական զամբյուղի էներգետիկ արժեքը 2100 կիլոկալորիան է: «Առողջապահության նախարարությունը, ասենք, դա (2412 կիլոկալորիան) հաշվել էր իկրայով և այլ բաներով, - ասաց նախարարը: - 2100 կիլոկալորիան հաշվարկված է ընդունված չափանիշներով, և դրա մասին մանրակրկիտ գրված է ծրագրում: Եթե կարդաք, այլ երկրների առողջապահության նախարարությունների կարծիքը նույնպես կիմանաք դրա վերաբերյալ»:

Անհասկանալի մնաց, թե ինչ կապ ունի այլ երկրների առողջապահության նախարարությունների կարծիքը Հայաստանի հետ, ինչպես նաև՝ ինչ կապ ունի խավիարը (իկրան) հայաստանցիների սպառողական զամբյուղի հետ:

«Ազատություն» ռադիոկայանի հարցմանն ի պատասխան, նորմատիվային սպառողական զամբյուղի կազմը և կառուցվածքը ներկայացրեց վիճակագրության ազգային խորհրդի անդամ, տնային տնտեսությունների հետազոտման և սպառողական զամբյուղի հաշվարկման աշխատանքները ղեկավարող Հրաչյա Պետրոսյանը՝ հաստատելով, որ դրա արժեքը 29 հազար դրամ է: Նրա թվարկած անհրաժեշտ մթերքների ցանկում խավիարը բացակայում էր:

Այս կենսապահովման զամբյուղը հայաստանցիները չեն տեսնի նաև 2015 թվականին, երբ նվազագույն աշխատավարձը նախատեսվում է 16 հազար 588 դրամ: