Գարունը եկել է՝ բերելով իր հետ սփոփանք և հույսեր: Շատ հարմար ժամանակ է հայտնելու ձեզ, որ մեր ձմեռային բարեգործական ծրագրի շրջանակներում արված խոստումներն այժմ իրականանում են:

Հունվարին «ԱրմենիաՆաուի» ընթերցողները պատրաստակամություն հայտնեցին 5000 դոլար տրամադրել մեր «Հայ Ձմեռ պապ» ծրագրին: Մենք ուրախ ենք ստորև տեղեկացնելու ձեզ, թե ինչպես են օգտագործվել ձեր փողերը: Իսկ հաջորդ ձմռանը մենք նորից կփորձենք հնարավորինս արդյունավետ կիրառում գտնել ձեր առատաձեռնության համար:

Հիշու՞մ եք Դավիթ Անտոնյանին և նրա ընտանիքը (սեղմեք այստեղ հոդվածը կարդալու համար): Մոտ ապագայում 15-ամյա Դավիթը, որը շշեր հավաքելով ու վաճառելով սատարում էր իր ընտանիքին, «Հայ Ձմեռ պապ» ծրագրի ֆինանսավորմամբ հնարավորություն կստանա սովորել ուսումնարանում (հավանաբար համակարգչային):

գ Երեմյանների ընտանիքն ապրում է նկուղային հարկում (սեղմեք այստեղ հոդվածը կարդալու համար): Տուն լցվող ջրերից նեխած հատակը շուտով կնորոգվի ու նաև որոշակի աշխատանքներ կտարվեն ապագայում նման պրոբլեմները կանխելու նպատակով:

գ Հաղթանակ գյուղի հանրակացարանի տարեցները (սեղմեք այստեղ հոդվածը կարդալու համար) ուզել էին ներքնազգեստ: Ճիշտն ասած, նրանք նոր հեռուստացույց էին ուզել: Սակայն մի հասարակությունում, որտեղ հանրային սեփականությունը սովորություն ունի հայտնվելու մերձակա պաշտոնյայի աշխատասենյակում, մենք որոշեցինք ուրիշ ընտրություն անել:

Հանրակացարանի աշխատակազմն առաջարկեց ներքնազգեստ: Ավելի «հիմնավոր» ընտրություն դժվար էր անել: Այնպես որ, Հաղթանակի հանրակացարանի բնակիչնե՛ր, վայելե՛ք ձեր նոր հագուստները «Հայ Ձմեռ պապ» ծրագրի շնորհով:

Կապանցի Մերի Մեժլումյանը ղարաբաղյան պատերազմի ժամանակ կորցրել է երկու ձեռքը (սեղմեք այստեղ հոդվածը կարդալու համար): Երբ Մերին 13 տարեկան էր, ամերիկյան բարեգործական մի ընկերություն նրա համար պրոթեզներ էր գնել: Այժմ դրանք փոքրացել են: Մերին ցանկանում է իրեն նվիրաբերած 500 դոլարով հաշիվ բացել բանկում և գումար հավաքել նոր պրոթեզների համար: Հնարավոր է, որ նա չկարողանա ինքնուրույն անհրաժեշտ գումարը հավաքել: Գրեք մեզ, եթե ցանկանում եք ներդրում անել նրա հաշվի համարին:

գ Նոյեմբերյանի Սբ. Սարգիս եկեղեցին վնասվել է երկրաշարժից (սեղմեք այստեղ հոդվածը կարդալու համար) և այլևս ապահով չէ եկեղեցական ծառայությունների համար: Ծխականները ներկայումս հավաքվում են քահանայի տանը: Մնում են ոտքի վրա կանգնած, սակայն կուզենային նստել: Շուտով նրանք կունենան այդ հնարավորությունը՝ «ԱրմենիաՆաուի» ընթերցողների գնած աթոռների շնորհիվ:

գ Քանաքեռ-Զեյթունի մանկատան վիճակը համեմատաբար լավ է՝ շնորհիվ մի քանի հովանավորների: Մանկատան ջեռուցման համակարգը կարող էր և ավելի արդյունավետ լինել (սեղմեք այստեղ հոդվածը կարդալու համար), բայց միգուցե մինչև դրա կարիքը նորից զգացվի, այդ պրոբլեմը լուծում ստանա: Իսկ մինչ այդ «Հայ Ձմեռ պապ» ծրագիրը կօգնի մանկատան խոհանոցին՝ գնելով խոհանոցային սպասք՝ կաթսաներ, թավաներ…

Կանանց և անչափահասների «Աբովյան» գաղութում անչափահասներին խրախուսում են հաճախել արվեստի խմբակներ (սեղմեք այստեղ հոդվածը կարդալու համար): Դեռևս վերջնական կարգադրությունները չեն արվել, սակայն մենք հույս ունենք «Հայ Ձմեռ պապ» ծրագրի միջոցներով գրադարանը ստեղծել (կամ համալրել այն) գաղութում հայտնված դեռահասների համար:

Երեք այլ ծրագրերի վերաբերյալ բանակցությունները ներկայումս շարունակվում են, և շուտով նրանք նույնպես կստանան իրենց համար նախատեսված օգնությունը, որից հետո էլ կհայտնենք ձեզ այդ մասին:

Իսկ մոտակա շաբաթների ընթացքում մենք ձեզ հնարավորություններ կընձեռենք օժանդակելու «ԱրմենիաՆաուի» գործունեությանը, քանի որ մենք շարունակում ենք մեր աշխատանքն այնպիսի լրագրություն ստեղծելու ուղղությամբ, որը, հուսով ենք, ի վիճակի է ինչ-որ բան փոխելու: