Անցյալ շաբաթ Հայաստանի արտգործնախարարությունը հաստատեց, որ Հասարակածային Գվինեայում այդ երկրի կառավարությունը տապալելու նպատակով ծրագրված դավադրությանը մասնակցելու մեղադրանքով ձերբակալված երկու տասնյակ օտարերկրացիներից վեցը Հայաստանի քաղաքացիներ են:

«ԱՆ-12» ինքնաթիռի անձնակազմի հրամանատար Աշոտ Կարապետյանը, երկրորդ օդաչու Սամվել Դարբինյանը, ավիաինժեներ Աշոտ Սիմոնյանը, ղեկապետ (շտուրման) Սամվել Մաճկալյանը, բորտմեխանիկ Ռազմիկ Խաչատրյանը, տեխնիկ-մեխանիկ Սուրեն Մուրադյանը կալանքի տակ են մարտի 9-ից:

Հայաստանի քաղաքացիական ավիացիայի գլխավոր վարչությունից հայտնել են, որ անձնակազմն աշխատում է «Տիգա Էյր» ավիաընկերությունում և առևտրային չարտերային չվերթներ է իրականացնում Կենտրոնական Աֆրիկայում:

Սակայն Հասարակածային Գվինեայի իշխանությունները պնդում են, թե անձնակազմի անդամները երկրի նախագահ Թեոդորո Նգուեմային տապալելու նպատակով ծրագրված պետական դավադրության մասնակիցներ են:

Քանի որ այդ երկրում Հայաստանը ներկայացուցչություն չունի, Հայաստանի արտգործնախարարությունը դիմել է Աֆրիկայի բարեկամ երկրներին՝ խնդրելով տեղեկանալ իրավիճակին և միջոցներ ձեռնարկել հայ օդաչուների անվտանգությունն ապահովելու նպատակով:

Իսկ այդ ընթացքում օդաչուների Երևանում մնացած ընտանիքները կցկտուր տեղեկություններ են ստանում իրենց հարազատների մասին և խիստ մտահոգված են նրանց ճակատագրով:

«Ամուսնուս հետ իմ բոլոր հեռախոսային խոսակցությունները գրանցված են, - ասում է անձնակազմի հրամանատարի կինը՝ Նարա Կարապետյանը: - Վերջին անգամ նրա հետ խոսել եմ մարտի 5-ին ցերեկը ժամը 3-ին: Նա ինձ ասաց, որ ամեն ինչ կարգին է և մարտի 9-ից պետք է սկսվեն կանոնավոր չվերթները»:

Սակայն պայմանավորված օրը՝ մարտի 8-ին, ամուսնու հեռախոսը չի պատասխանել, և Նառան սկսել է անհանգստանալ:

«Ամուսինս հեռախոսային խոսակցության ժամանակ ասած (մարտի 5-ին), որ իրենք ինչ-որ պրոբլեմներ ունեն: Ես չգիտեմ, թե ում նկատի ուներ, պատվիրատուի՞ն, թե՞ տեղի իշխանություններին: Քանի որ հեռախոսային խոսակցությունները թանկ են, երկար չէինք խոսում»:

Մոտ 15 օր կանայք տեղեկություն չունեին իրենց ամուսինների մասին և անգամ չգիտեին, կենդանին են նրանք, թե՝ ոչ:

Նրանց ստացած միակ տեղեկությունը լրատվական գործակալությունների հաղորդագրություններն էին այն մասին, որ իրենց ամուսինները մեղադրվում են պետական հեղաշրջման դավադրությանը մասնակցելու մեջ:

«Մենք մի բան ենք ուզում իմանալ՝ արդյո՞ք նրանք ողջ են և ստանում են բժշկական օգնություն: Կարևորն այն է, որ նրանք կենդանի վերադառնան», ասում է Ռազմիկ Խաչատրյանի կինը՝ Աղավնին:

Երկուշաբթի օրը Միջազգային Կարմիր Խաչի ներկայացուցիչները տեղեկացրել են հարազատներին, որ անձնակազմի անդամների կյանքին վտանգ չի սպառնում և որ նրանք առայժմ գտնվում են Մալաբոյում: Հաջորդ երեքշաբթի ԱԳՆ երկու աշխատակիցներ Կարմիր Խաչի ներկայացուցիչների հետ կմեկնեն Մալաբո:

«Նրանք Հայաստանի բոլոր ժամանակների լավագույն օդաչուներից են, - ասում է օդաչուների գործընկեր, ուղղաթիռի հրամանատար Վարդգես Մնացականյանը: - Պրոֆեսիոնալ օդաչուներ են և պարկեշտ մարդիկ: Այն տղաներն են, որ պատերազմի տարիներին Ղարաբաղն իրենց թևերի վրա են պահել: Նրանց ճանաչում են բոլորը, ներառյալ՝ իշխանությունները»: