1991-ին Հայաստանի անկախության հռչակումից հետո սպառողները շահել են միայն երեք դատական գործ: Վերջինն առնչվում էր խմելու ջրի հետ:

Խոսքը ջրի աղտոտման մասին է, որ տեղի էր ունեցել Երևանում անցյալ տարվա նոյեմբերին: Այդ տագնապալի իրավիճակը տևեց ավելի քան տասնմեկ օր: Մայրաքաղաքի շուրջ 100 հազար բնակչություն ունեցող Արաբկիր համայնքում ապրողներից շատերը տեղի ջրամատակարարման ցանցի անսպասելի վթարի զոհ դարձան: Խմելու ջրին խառնվել էին կոյուղու կեղտաջրերը: Պաշտոնական տվյալներով, 280 մեծահասակներ ու երեխաներ էին տեղափոխվել հիվանդանոց` աղեստամոքսային սուր հիվանդությունների պատճառով:

Այնուհանդերձ, Հայաստանի սպառողների միության նախագահ Արմեն Պողոսյանը կարծում է, որ հիվանդացածների իրական թիվը առնվազն երեք անգամ ավելի է եղել: «Հայերի մոտ այնքան էլ ընդունված չէ դիմել բժշկի օգնության: Բացի այդ, Երևանում կա աղեստամոքսային հիվանդներին սպասարկող միայն մեկ հիվանդանոց, և շատերի համար բավական դժվար էր հասնել այնտեղ»,- ասաց Պողոսյանը:

Հիվանդության բռնկումը ապացուցում է շարունակվող մտավախությունները Երևանի խմելու ջրի որակի կապակցությամբ:

«Աստված մեզ պարգևել է աղբյուրներից հոսող բարձրորակ խմելու ջուր»,- ասում է Հայաստանի հիգիենիկ և հակահամաճարակային տեսչության ավագ մասնագետ Նունե Բակունցը: Սակայն ուրիշները դրանում համոզված չեն:

«Մեզ առաջին հերթին հետաքրքրում է մեր տուն հասնող խմելու ջրի որակը: Ցավոք, պետական կառույցները դեռ պատշաճ ուշադրություն չեն դարձնում այդ հիմնախնդրին»,- նշում է Հայաստանի սպառողների միության փորձագետ Հակոբ Ղարաբեկյանը:

Այդ հասարակական կազմակերպությունն օգնեց Արաբկիր համայնքի տուժած բնակիչներին պաշտպանելու իրենց շահերը: Ընդհանուր առմամբ, միությունը հարուցեց ութ դատական հայց «Երևանի ջրմուղ-կոյուղի» պետական ՓԲԸ-ի դեմ: Բոլոր հայցերը բավարարվել են ջրօգտագործողների օգտին, ընդ որում՝ երկու հայց բավարարվել է ամբողջությամբ, իսկ վեցը` մասամբ:

«Երեք օր շարունակ մեր ծորակներից կեղտոտ ու գարշահոտ ջուր էր հոսում,- վրդովված պատմում է Արաբկիր համայնքի բնակիչ Լաուրա Բարսեղյանը:- Ոչ ոք մեզ այդ մասին չէր զգուշացրել, և մենք ստիպված էինք կամ այդ ջուրը եռացնել, կամ խանութից շշերով ջուր գնել»:

Նրա խոսքերով, վթարի օրերին տեղի առևտրականները 30-40 տոկոսով բարձրացրել էին վաճառվող շշալցրած ջրի գները:

Դատարանը պարտավորեցրել էր «Երջրմուղկոյուղուն» փոխհատուցել Լ. Բարսեղյանի կրած նյութական վնասը` 46000 դրամի չափով: Այնուհանդերձ, անցյալ շաբաթ ընկերությունը բողոքարկել է այդ դատավճիռը վճռաբեկ դատարանում:

Հայաստանում շատերն են նշում, որ տեղական ջուրը չափազանց բարձրորակ, մաքուր և համեղ է: Սակայն նույնիսկ երկրի մայրաքաղաք Երևանում ոչ ոք վերջնականապես համոզված չէ խմելու ջրի անվտանգության մեջ: