Դերասան Միքայել Պողոսյան

Կենդանակերպի նշանը` Երկվորյակ:
Ընտանեկան վիճակը՝ Ամուսնացած չէ, ունի մեկ դուստր:
Կատարած վերջին աշխատանքը՝ «Միքայ<ե>լ առաջ դեպի ետ» տեսաֆիլմ, որտեղ ընդգրկված են վերջին 10 տարվա լավագույն դերերը:

Կարդացած վերջին գիրքը՝ Վերջերս առանձնապես տպավորիչ բան չեմ կարդացել:

Տեսած վերջին ներկայացումը/ ֆիլմը՝ Ռոման Բալայանի «Գիշերը լուսավոր է» ֆիլմը:

Ի՞նչը չեք ընդունում մարդկային հարաբերութ-յուններում՝ Տանել չեմ կարող գոռոզությունը, երբ մարդն իր անձն ամեն ինչից վեր է դասում, կեղծավորությունը և դավաճանությունը ամեն տեսակի հարաբերություններում:

Ո՞րն է Ձեր առաքելությունն արվեստում՝ Ընդհանրապես առաքելություն տրված է ամենքին, և այս կյանքում ամեն մեկս պարտավոր ենք ի վերուստ տրվածն ազնվորեն ու անմնացորդ հետ վերադարձնել:

Սիրած դերասանը՝ Մհեր Մկրտչյան, Չարլի Չապլին:
Սիրած երգիչը՝ Մարիա Կալլաս, Շառլ Ազնավուր, Ալլա Պուգաչովա:

Սիրած նկարիչը/քանդակագործը՝ Ճարտարապետ` Անտոնիո Գաուդի, նկարիչ` Ռենե Մագրիդ, Վան Գոգ, քանդակագործ` Ռոդեն, կյանքիս զարգացման տարբեր փուլերում տարբեր ոճեր եմ նախընտրել` իմպրեսիոնիզմ, սյուրռեալիզմ:

Ձեր կյանքին նվիրված ֆիլմում ո՞վ կխաղար ձեր դերը՝ Մարսել Մարսոն, և կուզենայի, որ անպայման լիներ մնջախաղի ժանրով:

Եթե արվեստագետ չլինեիք, ի՞նչ կուզենայիք դառնալ՝ Հաստատ էլի արվեստագետ կլինեի: Ի դեպ, ըստ հաշվարկների, ես նախորդ կյանքս ապրել եմ 400 տարի առաջ և կրկին դերասան եմ եղել:

Եթե ընկնեիք անմարդաբնակ կղզի, ի՞նչ գիրք, ձայներիզ, կինոնկար կամ նկար կվերցնեիք ձեզ հետ՝ Աստվածաշունչը:

Ո՞րն է Ձեր ամենանվիրական ցանկությունը` Կուզենայի, որ մի հրաշքով Երևանից հեռացած բոլոր լավագույն տղերքը վերադառնային և Մաշտոցի պողոտայի ամբողջ երկայնքով մի մեծ սեղան գցեինք ու քեֆ անեինք:

Ի՞նչն է առաջնային ձեզ համար` արվե՞ստը, թե՞ ընտանիքը` Առաջնայինը մարդ լինելն է, եթե մարդկային առաքինի տեսակը չլինի քո մեջ, ապա քո արվեստը գրոշի արժեք չունի: