Բնակիչներն արտահայտում են իրենց բողոքը

Երբ Հյուսիսային պողոտայի կառուցման գաղափարն առաջին անգամ ներկայացվեց հասարակայնությանը,
Երևանի այն ժամանակվա քաղաքապետ Ռոբերտ Նազարյանը լրագրողներին ասաց. «Ինչ էլ որ անենք, միևնույն է քննադատելու են»:

Քաղաքապետի կանխատեսումը երկու տարի անց լիովին իրականացավ. Հյուսիսային պողոտայի կառուցման պատճառով քանդվող տների հարյուրավոր բնակիչների քննադատությունը վերաճեց դժգոհության, հետո՝ վրդովմունքի և վերջապես՝ ամենօրյա բողոքների վերջին ամսվա ընթացքում:

Հյուսիսային պողոտայի շինարարությունը նախատեսվում է ավարտել 2006 թվականին: Այն ճարտարապետ Ալեքսանդր Թամանյանի կազմած Երևանի գլխավոր նախագծի մի մասն է կազմում, որը պետք միացնի Օպերայի հրապարակը Հանրապետության հրապարակի հետ: Շինարարության ավարտից հետո մայրաքաղաքի ժամանակակից գլխավոր մայրուղին իրենից կներկայացնի 450 մետր երկարությամբ մի հետիոտնային պողոտա երիզված ռեստորաններով, վաճառատներով և բնակելի շենքերով:

Քաղաքային իշխանություններն արդեն մաքրել են ապագա պողոտայի 63000 քմ տարածքի 27000 քառակուսի մետրը, և 220 ընտանքիներ փոխհատուցում են ստացել իրենց բնակարանների համար:

Բողոքներն ամենօրյա բնույթ են կրում

Սակայն մնացած 260 ընտանիքները դեռ պետք է պայմանագիր կնքեն: Պուշկին, Տերյան, Լալայանց և Աբովյան փողոցների բնակիչները պնդում են, որ ծրագիրն իրականացնող «Հյուսիսային պողոտա և Կասկադ» շահույթ չհետապնդող պետական ձեռնարկության պաշտոնյաներն իրենց առաջարկում են այնպիսի փոխհատուցում, որը կազմում է իրենց ակնկալիքների մեկ երրորդից մինչև կեսը: Նրանք նաև դժգոհում են, որ պարտավոր են իրենց փոխհատուցման գումարի 10 տոկոսի չափով հարկ վճարել պետական բյուջե:

Բնակտարածքի սեփականատերերին ներկայումս առաջարկում են 250-400 դոլար մեկ քառակուսի մետրի համար՝ կախված շենքի վիճակից: Մինչդեռ Հյուսիսային պողոտայի տարածքների աճուրդում չափաբաժինները վաճառվում են մեկ քառակուսի մետրը 1000 դոլարով:

Չսեփականաշնորհված բնակարանների բնակիչներին առաջարկում են 2500 դոլար ընտանիքի յուրաքանչյուր անդամի համար, եթե նրանք համաձայնում են հրաժարվել իրենց իրավունքներից և ազատում են բնակտարածքը:

Վերգինե Հովսեփյանը բնակվում է Տերյան, 12 հասցեով տանը (նա տան սեփականատեր չէ): 60-ամյա Հովսեփյանը, որն ապրում է մենակ և ընտանիք չունի, ասում է, որ ինքը կարող է հայտնվել փողոցում:

«Ես 50 տարի ապրել եմ այդ տանը: Իրենց առաջարկած 2500 դոլարով ես մի փոքր սենյակ էլ չեն կարող գնել Երևանի ամենահեռավոր անկյունում», ասում է նա:

Մյուս բնակիչները գանգատվում են, որ գրասենյակի պաշտոնյաները ճիշտ չեն կատարում իրենց ունեցվածքի փոխհատուցման հաշվարկները:

«Ես 330 քմ տարածք ունեմ՝ բնակարան և բակ, բայց ինձ առաջարկում են ընդամենը 54000 դոլար, - ասում է Լալայանց փողոցի բնակչուհի Լիդա Աբգարյանը: - Ստացվում է, որ մեկ քառակուսի մետրը հաշվարկում են 160 դոլարով»:

Բնակիչները գանգատվում են, որ պաշտոնյաները ճիշտ չեն հաշվարկում իրենց ունեցվածքի արժեքը

Բնակիչների բողոքներից իշխանությունների քաղաքականությունը չի փոխվում, թեև անցյալ շաբաթ իր պաշտոնից ազատել են «Հյուսիսային պողոտա և Կասկադ» գրասենյակի գործադիր տնօրեն Սերգեյ Բայբուրթյանին: Քաղաքապետարանը, որն իրականացնում է շինարարությունը, հրաժարվեց մեկնաբանել այդ փաստը:

«Կարևոր չէ, թե ինչու է Բայբուրթյանն ազատվել աշխատանքից, - ասում է գրասենյակի փոխտնօրեններից մեկը՝ Ֆելիքս Աֆյանը: - Մենք աշխատում ենք, փոխտնօրեններից մեկն արդեն ստանձել է նրա պաշտոնը, և մենք փորձում ենք լուծել բոլոր պրոբլեմները»:

Նրանց առաջ կանգնած հիմնական պրոբլեմն այն է, որ փոխհատուցումը մերժած բնակիչները հրաժարվում են լքել իրենց բնակարանները: Շինարարության պլանով տարածքը պետք է մաքրված լիներ մի քանի ամիս առաջ: Սակայն բնակիչները դիմադրում են, նրանք շտաբ են հիմնել և պահակություն են անում՝ պաշտպանելու իրենց ունեցվածքը, ինչպես իրենք են համարում, ապօրինի բռնագրավումից:

Բնակիչները դիմել են Ազգային ժողովին՝ առաջարկելով ընդունել օրենք մի անկախ մարմին ստեղծելու մասին, որը կորոշեր, թե որքան պետք է վճարել քաղաքացիների ունեցվածքի համար:

Շուրջ 100 բնակիչներ արդեն դիմել են դատարան, հիմնականում առանց հաջողության: Դատարանները որոշում են, որ բնակիչները պետք է լքեն իրենց բնակարանները կամ վտարվեն, և որոշ բնակիչների արդեն հարկադրաբար վտարել են:

Աֆյանի հավաստմամբ քաղաքապետարանը կազմել է հատուկ հանձնաժողով քաղաքի գլխավոր ճարտարապետ Նարեկ Սարգսյանի գլխավորությամբ, որը պետք է վերաքննի յուրաքանչյուր բնակչի գործը:

«Մենք կներդրենք դրամական խրախուսման համակարգ և ավելի բարձր գումար կառաջարկենք բնակիչներին, - ասում է Աֆյանը: - Ոչ սեփականատերերին կառաջարկենք լրացուցիչ 4000 դոլար:

«Հանձնաժողովը որոշել է առաջին հերթին քննել տարեցների, հաշմանդամների, միայնակ մայրերի և կարիքավոր ընտանքիների գործերը»:

Սակայն այն բնակիչները, որոնց գործերը հանձնաժողովն արդեն քննել է, ասում են, որ իրենց ոչ մի նոր բան չեն առաջարկում: Նրանք պահանջում են, որ իրենց ունեցվածքը գնահատելու համար հրավիրվեն անշարժ գույքի անկախ մասնագետներ:

Աֆյանն ասում է. «Հյուսիսային պողոտայի տարածքում ունեցվածքի գնահատումը կառավարությունը վստահել է «Արթին» ընկերությանը, որի տվյալների վրա էլ մենք հիմնվում ենք փոխհատուցման գումարները սահմանելիս»:

Մի քանի ընկերություններ՝ «Նորթ այլենդ», «Սոգլասիե Արմենիա» և «Մերկատոր», արդեն սկսել են շինարարական աշխատանքները Հյուսիսային պողոտայում:

Տեղական մամուլում արդեն հայտնվում են հայտարարություններ, որոնք «էլիտար բնակարաններ» են առաջարկում Հյուսիսային պողոտայում մեկ քառակուսի մետրը 950 դոլարով, ինչպես նաև առևտրական տարածքներ (ռեստորաններ, սրճարաններ և այլն) մեկ քառակուսի մետրը 2000-2200 դոլարով:

Իսկ բնակիչներն այդ ընթացքում շարունակում են ճնշում գործադրել՝ պահանջելով կրկնապատկել փոխհատուցման գումարը: Ոմանք սպառնում են հացադուլ սկսել ի պաշտպանություն իրենց պահանջների: