Հաղթողները՝ Ծովինար Սուֆելյան, Լիլիթ Գրիգորյան, Սոնա Բարսեղյան և Լևոն Ավագյան:

Չորս պատանի հայ դաշնակահարներ՝ Լիլիթ Գրիգորյանը, Լևոն Ավագյանը, Սոնա Բարսեղյանը և Ծովինար Սուֆելյանը, բարձր գնահատականի են արժանացել անցյալ շաբաթ Թբիլիսիում կայացած երիտասարդ դաշնակահարների առաջին միջազգային մրցույթում:

Մրցելով Վրաստանի, Ուկրաինայի, Ռուսաստանի, Լեհաստանի, Իտալիայի և այլ երկրների ավելի քան 100 կատարողների հետ՝ հայ դաշնակահարները տուն են վերադարձել մեկ արծաթե և երկու բրոնզե մեդալներով, դիպլոմներով ու հատուկ մրցանակներով:

Կոնսերվատորիայի առաջին կուրսի ուսանողուհի 17-ամյա Լիլիթ Գրիգորյանը հաղթողների թվում էր և մրցույթից վերադարձել է արծաթե մեդալով, դիպլոմով, գերազանց կատարման համար Անջափարիձեի անվան հատուկ մրցանակով և դրամական պարգևով:

«Ես շատ ուրախ եմ մեր հաջողության համար, - ասաց Լիլիթը: - Իմ կյանքում շատ մրցույթների եմ մասնակցել ու մրցանակների արժանացել, սակայն նման գնահատանքը միջազգային մրցույթում այլ նշանակություն ունի և ինձ շատ կօգնի»:

Տասներեքամյա Սոնա Բարսեղյանը և 12-ամյա Լևոն Ավագյանը արժանացել են երրորդ կարգի դիպլոմի և բրոնզե մեդաների:

«Ամեն ինչ այնքան անակնկալ էր ու հեքիաթային, որ ես իմ ամբողջ կյանքում կհիշեմ այդ ամենը», - ասաց Սոնան:

Ուսուցիչներն ու ներկաները հավաստում են, որ մրցույթի ժյուրի կազմը և հանդիսականներ շատ հուզված էին հայ դաշնակահարների կատարումներից: Եզրափակիչ գալա-համերգին հայ դաշնակահարները մասնակցել են վրաց դասականների ստեղծագործությունների կատարումով:

«Մրցակիցները շատ ուժեղ էին, շատ լավ տվյալներ ունեցող դաշնակահարներ էին մրցույթին մասնակցում, - ասում է Երևանի կոնսերվատորիայի դաշնամուրի բաժնի պրոֆեսոր Ռոբերտ Շուգարովը, - սակայն արդեն առաջին փուլից հետո բոլորը մոտենում ու շնորհավորում էին մեզ, քանի որ երեխաները փայլուն էին ելույթ ունենում»:

Ուսուցչուհի Հասմիկ Հակոբյանն ասում է, որ հաջողությունը նման նշանակալի մրցույթում պետք է նպաստի պատանի երաժիշտների ինքնահաստատմանը՝ միաժամանակ հաստատելով հայկական երաժշտական դպրոցների բարձր մակարդակը:

«Վերադառնալուց հետո երեխաները նոր ուժով, շնչով ու ոգևորությամբ են սկսել աշխատել, - ասաց Հակոբյանը, - և ես վստահ եմ, որ առաջիկայում նրանք ավելի մեծ քայլերով առաջ կգնան ու նորանոր հաջողությունների կհասնեն»: