33 ամիս ձգված դատավարությունից հետո Նաիրի Հունանյանը և 5 այլ ամբաստանյալներ դատապարտվեցին ցմահ ազատազրկման

Հոկտեմբերի 27-ի դատավարությունը ավարտվեց սկսվելուց գրեթե երեք և խորհրդարանում կատարված ահաբեկչությունից ավելի քան չորս տարի հետո: Մեղադրանք էր ներկայացվել յոթ ամբաստանյալների:

Դատավարությունն ավարտվեց առանց անակնկալների, ինչը զարմանալի չէ, եթե հաշվի առնենք, որ ամբողջ աշխարհի հեռուստակայանները ցուցադրում էին, թե ինչպես են գործով անցնող ամբաստանյալները խորհրդարանում սպանում ութ և վիրավորում ãáñë բարձրաստիճան պաշտոնյաների:

Ցմահ ազատազրկման դատապարտվեցին եղբայրներ Նաիրի և Կարեն Հունանյանները, նրանց քեռի Վռամ Գալստյանը, Էդուարդ Գրիգորյանը, Դերենիկ Բեջանյանը և Աշոտ Կնյազյանը: Համլետ Ստեփանյանը դատապարտվեց 14 տարվա ազատազրկման:

Դատավոր ê³Ùí»É ՈՒզունյանն ընթերցեց դատավճիռը ËñáËï ու վճռական ձայնով՝ խլացնելով ահաբեկիչների պարագլուխ Նաիրի Հունանյանի առարկությունները, ում 33 ամիս ձգված դատավարությունը հեղափոխական բոցաշունչ ելույթների և ինքնամեծարման հնարավորություն էր ընձեռել:

Նորք-Մարաշ համայնքների դատարանի լեփ-լեցուն դահլիճը ոչ մի կերպ չարձագանքեց դատավճռին: Եվ, ի տարբերություն 2000 թí³Ï³Ýին դատավարության բացման ժամանակ տիրող կրկեսային իրարանցմանը, դրսում մարդիկ չէին հավաքվել, որպեսզի բողոքեին կամ պարզապես ներկա լինեին կատարվածին:

Երեքշաբթի օրն ընթերցված դատավճռի միակ անակնկալը Կնյազյանին ցմահ ազատազրկման դատապարտելն էր: Մեղադրողները նրա համար պահանջել էին 15 տարվա ազատազրկում: Կնյազյանը, վարորդ Ստեփանյանի նման, ահաբեկչության օրը չէր մտել խորհրդարանի շենք (սովորաբար Հայաստանի դատարաններում ընդունված է նվազեցնել մեղադրողների միջնորդած պատժաչափերը):

Դատավճռի հրապարակմանը ներկա չէին խորհրդարանի սպանված խոսնակ Կարեն Դեմիրճյանի և սպանված վարչապետ Վազգեն Սարգսյանի իրավահաջորդների ներկայացուցիչները:

Ընդդիմադիր քաղաքական կուսակցությունները դատավարությունն օգտագործեցին հակակառավարական քարոզչություն ծավալելու համար: Ամբողջ դատավարության ընթացքում նրանք պնդում էին, որ դատախազությունը չի կարողացել բացահայտել կազմակերպիչներին, և ենթադրություն էին առաջ քաշում, որ դավադրությանը մասնակցել են նախագահ Ռոբերտ Քոչարյանի կողմնակիցները:

Գլխավոր ընդդիմադիր «Հանրապետություն» կուսակցությունը երկուշաբթի օրը հայտարարություն է տարածել այն մասին, որ բոյկոտում է դատավճռի հրապարակումը՝ այն անվանելով «ֆարս»:

Դատավոր ՈՒզունյանը ընթերցեց դատավճիռը` խլացնելով ամբաստանյալների առարկությունները

«Հոկտեմբերի 27-ի ոճրագործությունը բացահայտելու փոխարեն դատարանը կատարեց ռեժիմի պատվերը և պարտակեց գործի էական հանգամանքները», ասվում է հայտարարության մեջ:

Ընդդիմությունը դժգոհ է նաև դատավճռի հրապարակման ժամկետից: Նոյեմբերի 5-ին Ազգային ժողովն ընդունել է լրացում Քրեական օրենսգրքում՝ ցմահ բանտարկություն առանց ներման իրավունքի: Օրենքն ուղարկվել է նախագահական նստավայր նոյեմբերի 7-ին, նախագահն այն ստացել է նոյեմբերի 10-ին, բայց ստորագրել է նոյեմբերի 26-ին: Օրենքն ուժի մեջ է մտնում հրապարակումից 10 օր հետո, իսկ սա նշանակում է, որ ահաբեկիչները 20 տարի պատիժ կրելուց հետո կարող են դիմել ներում ստանալու ակնկալիքով:

«Եթե օրենքը ստորագրվեր ստացվելուց անմիջապես հետո, մեկ-երկու օրվա ընթացքում, ապա ամենաուշը մինչև նոյեմբերի 25-ը օրենքն ուժի մեջ կմտներ, - ասում է «Արդարություն» խմբակցության քարտուղար Վիկտոր Դալլաքյանը: - Ամենևին դժվար չէր կես էջանոց օրենքն արագ կարդալ ու ստորագրել: Ակնհայտ է, որ դիտավորություն է եղել»:

Տրանսպորտի և կապի նախարար Անդրանիկ Մանուկյանը ծանր վիրավորվել էր խորհրդարանի վրա կատարված հարձակման ընթացքում:

Մանուկյանը բացառում է Քոչարյանի կապը ահաբեկչության հետ: Նա ասում է, որ դատավարությունը քաղաքականացվել է, և որ ամբաստանյալները պետք է արժանանային մահապատժի՝ գնդակահարության (դատավարության ընթացքում Եվրախորհրդի հանդեպ Հայաստանի վերցրած պարտավորությունների համաձայն մահապատիժը Հայաստանում վերացվեց):

Կարեն Դեմիրճյանի որդի Ստեփան Դեմիրճյանը, որը գարնանը կայացած նախագահական ընտրությունների երկրորդ փուլում պարտվեց Քոչարյանին, հայտարարել է, որ «դատավարությունն ուղղորդվել է հենց սկզբից. դատարանը իրականացրել է պատվեր, և այսօր այդ գործընթացի եզրափակիչ մասն էր»:

Դատավճռի հրապարակումից մեկ շաբաթ առաջ կինոյի տանը ընդդիմության հրավիրած հանդիպման ժամանակ Վազգեն Սարգսյանի եղբայր և «Հանրապետություն» կուսակցության առաջնորդ Արամ Սարգսյանն ասել է, որ ինքը պատրաստ է հաղթահարելու իր զգացմունքները և Քոչարյանի հետ նստեÉու սեղանի շուրջ քննարկելու համար հոկտեմբերի 27-ի ահաբեկչության հարցը:

«ºթե Ռոբերտ Քոչարյանն ապացուցի, որ ինքը հոկտեմբերի 27-ին առնչություն չունի, ապա ես պատրաստ եմ հրապարակայնորեն ներողություն խնդրելու նրանից», հայտարարել է Սարգսյանը:

Իշխանամետ ՀՅԴ կուսակցության անդամ և ԱԺ-ի փոխխոսնակ Վահան Հովհաննիսյանը բավարարված է դատավճռով.

«Հայտնաբերվել են նրանք, ովքեր կատարել են սպանությունը, և նրանք կրելու են համապատասխան պատիժ: Հայաստանի օրենսդրությամբ սա ամենաբարձր պատիժն է, որ հնարավոր էր կիրառել»:

«Դատարանը որևէ նոր բան չավելացրեց մեր իմացածին: Հունանյանի խումբը դատապարտվեց կատարած հանցագործության համար, ինչը հայտնի էր հանրությանը դեպքի օրը, սակայն «ովքե՞ր են կազմակերպիչները» հարցի պատասխանն այդպես էլ չտրվեց», ասում է բժիշկ Սամվել Սարգսյանը, որը ներկա էր դատավճռի ընթերցմանը :

Ակնկալվում է, որ բոլոր ամբաստանյալները կբողոքարկեն դատավճիռը օրենքով նախատեսված 15-օրյա ժամկետում: