Ֆուտբոլ (բարձրագույն խումբ)

Ապրիլի 1-ին Իսպանիայի հավաքականին 0-5 հաշվով պարտվելուց հետո, Հայաստանի երիտասարդական հավաքականի ավագ Կարեն Մուրադյանը թիմի հետ Հայաստան չի վերադարձել: Մուրադյանը լքել է թիմը, որպեսզի մեկնի Նիդեռլանդներ: Հայաստանի ֆուտբոլի ֆեդերացիան հայտնել է, որ փորձելու է Մուրադյանին վերադարձնել Հայաստան:

Այդ ընթացքում թիմերը պատրաստվում են Հայաստանի ազգային գավաթի կիսաեզրափակիչ փուլի խաղերին: Մայիսի 17-18-ին «Փյունիկը» խաղալու է «Բանանցի», «Շիրակը»՝ «Միկայի» հետ, իսկ երկրորդ փուլի խաղերը տեղի կունենան հաջորդ շաբաթ:

Շախմատ (ՖԻԴԵ-ի գործակիցների աղյուսակ)

Համաձայն 2003 թվականի ապրիլին ՖԻԴԵ-ի հրապարակած գործակիցների աղյուսակի, աշխարհի 100 լավագույն շախմատիստների թվում են նաև չորս հայ շախմատիստներ, իսկ 50 լավագույն շախմատիստուհիների թվում՝ մեկ հայ շախմատիստուհի:

Հայ լավագույն շախմատիստների ցուցակը գլխավորում է գրոսմայստեր Վլադիմիր Հակոբյանը: Նա աշխարհում 13-րդն է՝ 2703 միավորով:

Համաձայն ապրիլյան աղուսակի, երկրորդ լավագույն հայ շախմատիստը գրոսմայստեր Ռաֆայել Վահանյանն է՝ 2663 միավորով (38-րդը ՖԻԴԵ-ի աղյուսակում):

Գրոսմայստեր Սմբատ Լպուտյանը 54-րդ տեղում է՝ 2638 միավորով: Իսկ 100 լավագույնների մեջ հայ շախմատիստների ցուցակը եզրափակում է գրոսմայստեր Լևոն Արոնյանը՝ 2606 միավորով: Նա 91-րդ տեղում է:

Լավագույն շախմատիստուհին Լիլիթ Մկրտչյանն է, որը զբաղեցնում է 41-րդ տեղը: