|
 Այս
օրերին փռշտոցը կարող է հատուկ ուշադրության արժանանալ
«Զվարթնոց» միջազգային օդակայանում:
Բարձր ջերմաստիճանի կամ գրիպի այլ ախտանիշների
ի հայտ գալու դեպքում Հայաստան ժամանած ուղևորները
կարող են ենթարկվել բժշկական ստուգման կամ էլ, վատագույն
դեպքում, հայտնվել հիվանադանոցային մեկուսարանում՝
բժիշկների աչալուրջ հսկողության ներքո:
Առողջապահության մասնագետները նախազգուշական միջոցներ
են ձեռնարկում շնչառական ուղիների սուր բորբոքման՝
ատիպիկ թոքաբորբի դեմ: Ասիական ծագում ունեցող այս
հիվանդությունից վերջին մի քանի շաբաթվա ընթացքում
մահացել է ավելի քան 100 մարդ Ասիայում, Եվրոպայում
և Հյուսիսային Ամերիկայում:
«Փառք աստծո, առ այսօր հանրապետությունում ատիպիկ
թոքաբորբի որևէ դեպք չի գրանցվել, բայց զգուշությունը
չի խանգարի, - ասում է հանրապետության գլխավոր սանիտարական
բժիշկ Վլադիմիր Դավիդյանցը, - Եվ ինչպես այլ դեպքերում,
մենք պետք է ձեռնարկենք կանխարգելիչ միջոցներ»:
Եվ քանի որ օդակայանը համարվում է ատիպիկ թոքաբորբի
մուտքի ամենահավանական անցակետը, հրավիրվել է շտապ
խորհրդակցություն, որտեղ քննարկվել է օդանավերի
պոտենցիալ վարակված ուղևորների վերահսկման հարցը:
«Մասնագետները վերահսկում են իրավիճակը և որևէ
կասկածի դեպքում կմեկուսացնեն հիվանդին», - ասում
է «Նորք» ինֆեկցիոն հիվանդանոցի տնօրեն Արա Ասոյանը:
Արա Ասոյանի հավաստմամբ, վիրուսի դեմ պայքարում
«հեծանիվ հնարելու» կարիք չկա:
 «Կարծում
եմ, այս հիվանդությունը, ինչպես և շնչառական մյուս
վիրուսները, պիտի որ վախենա արևից և այս շոգ եղանակին
հեռու մնա մեզանից: Ներկայումս մենք միայն կարող
ենք մեր ուժերը կենտրոնացնել և հուսալ, որ հիվանդությունը
Հայաստան չի մտնի, - ասում է Ասոյանը, - Այսօր գոհ
ենք, որ վարակը Ռուսաստան չի մտել, քանի որ հիմնական
վտանգը կարող է Հայաստան թափանցել միայն Ռուսաստանով»:
Դավիդյանցը վստահեցնում է, որ ինչպես մայրաքաղաքում,
այնպես էլ մարզերում, հիվանդանոցները պատրաստ են
համապատասխան միջոցներ ձեռք առնել, եթե դրա կարիքն
առաջանա:
«Մենք անում ենք այս պայմաններում հնարավոր ամեն
ինչ, - ասում է Վլադիմիր Դավիդյանցը, - Եվ պետք
չէ խուճապի մատնվել ու նյարդայնանալ ամեն մի փռշտոցից»:
Սակայն որպես նախազգուշական միջոց, առողջապահության
նախարարությունը հիվանդության կանխարգելման բնագավառի
մասնագետներին զգուշացրել է պատրաստ լինել անհրաժեշտության
դեպքում համապատասխան միջոցներ ձեռնարկել:
«Պարբերաբար կհրապարակվեն տեղեկագրեր, որոնք բնակչությանը
կտեղեկացնեն իրավիճակի զարգացումների և կանխարգելիչ
միջոցառումների մասին», - ասում է Դավիդյանցը:
|
Copyright