Հայաստանի պետական ճարտարագիտական համալսարանը (ՀՊՃՀ) այս տարի նշում է իր 70-րդ տարեդարձն այնպիսի ծրագրերով, որոնք ուղղված են հաստատության և գիտական աշխարհում Հայաստանի վարկանիշի վերականգնմանը:

Խորհրդային տարիներին Հայաստանը հայտնի էր որպես ԽՍՀՄ «ճարտարագետների արտադրամաս», որը մասնագետներ էր պատրաստում ամբողջ Միության համար: Բայց կոմունիզմի փլուզման հետ ճարտարագետների համար դժվար ժամանակներ եկան, քանի որ անկում ապրող արդյունաբերության պայմաններում նրանց հմտություններն այլևս պահանջարկ չունեին:

Սակայն անցյալ տարի ՀՊՃՀ են ընդունվել շուրջ 3000 ուսանողներ, մագիստրոսներ և ասպիրանտներ, այդ թվում՝ մոտ 400 օտարերկրյա ուսանողներ (Սիրիայից, Իրանից, Իրաքից և Հնդկաստանից): Ընդհանուր առմամբ, այստեղ սովորում են շուրջ 10000 ուսանողներ, և ամեն տարի շուրջ 1000-ն ավարտում են այն: Յուրաքանչյուր 12-րդ ուսանող շարունակում է բարձրացնել որակավորումն իր մասնագիտության գծով:

Մասնագետներն այս ցուցանիշները դիտում են որպես Հայաստանի արդյունաբերության վերականգնման, ինչպես նաև արտաքին շուկայի համար նախատեսված մասնագետների թվի աճի միտում:

«Այսօր մեր շրջանավարտներին պետք է պատրաստենք գլոբալ շուկայի համար, - ասում է ՀՊՃՀ-ի ռեկտոր Յուրի Սարգսյանը՝ ավելացնելով, որ աշխատանքային շուկան Հայաստանում դեռևս չի կայացել, - Այսուհետ մենք պետք է իմանանք, թե որտեղ են մեր շրջանավարտները, արդյոք նրանք պահանջարկ ունեն աշխատուժի շուկայում և արդյոք պատրաստ են այդ շուկային, թե ոչ»:

Իր պատմության յոթ տասնամյակի ընթացքում համալսարանը՝ որը նախկինում հայտնի էր որպես Պոլիտեխնիկ ինստիտուտ, տվել է ավելի քան 100 հազար շրջանավարտներ, այդ թվում՝ հանրահայտ գիտնականներ, գործարարներ և գյուտարարներ:

Այսօր ՀՊՃՀ-ն համագործակցում է ԱՄՆ-ի և եվրոպական մի շարք երկրների ուսումնական հաստատությունների, ինչպես նաև միջազգային կազմակերպությունների հետ:

Երկու տարի առաջ ՀՊՃՀ-ն սկսեց համագործակցել «Լեդա Սիստեմս» ԲԸ-ի հետ, որը համաշխարհային շուկայում առաջատար դիրք է գրավում տեղեկատվական տեխնոլոգիաների զարգացման բնագավառում: «Լեդան» ՀՊՃՀ-ում հիմնադրել է «Միկրոէլեկտրոնային սխեմաներ և համակարգեր» ուսումնական կենտրոնը երրորդ և չորրորդ կուրսերի ուսանողների համար, որոնք ուսումն ավարտելուց հետո աշխատանքի առաջարկ են ստանում «Լեդայից»:

««Լեդա Սիստեմսը» չի եկել Հայաստան, որպեսզի սոցիալական կամ կրթական հարցեր լուծի, - ասում է ընկերության հայաստանյան մասնաճյուղի տնօրեն, տեխնիկական գիտությունների թեկնածու Հովիկ Մուսայելյանը, - Սակայն «Լեդայի» կատարած ներդրումներն անկախ Հայաստանի կրթական համակարգում երբևիցե արված ամենախոշոր ներդրումներն են»:

Մուսայելյանի հավաստմամբ, ընկերությունը 25 միլիոն դոլար է ներդրել այս ոլորտում, այդ թվում՝ 3 միլիոն կրթական և գործարար կենտրոնի շինարարության համար:

«Ներկայումս ԱՄՆ-ում գործազրկություն կա, փակվում են հանրահայտ ընկերություններ, կատարվում են կրճատումներ: Այս պայմաններում, երբ ամերիկյան կապիտալի վրա հիմնված «Լեդա Սիստեմսը» ներդրումներ է կատարում Հայաստանում` դա փայլուն գնահատական է այս երկրին», - ասում է Մուսայելյանը:

Համալսարանը նաև բացել է Կարիերայի ուսանողական ծառայությունների կենտրոն (ԿՈՒԾԿ), որը գրասենյակներ ունի նաև Գյումրիում, Կապանում և Վանաձորում: Սարգսյանի հավաստմամբ, կենտրոնն օգնում է վերականգնել կապերը շրջանավարտների և պոտենցիալ գործատուների միջև, որոնք խափանվել էին վերջին տասնամյակի ընթացքում:

Ռեկտորի հավաստմամբ, ԿՈՒԾԿ-ն օգնում է ուսանողներին կիրառել իրենց գիտելիքները ճարտարագիտության կոնկրետ բնագավառներում, օգնում է նրանց ռեզյումեներ և այլ նյութեր կազմելու գործում և սովորեցնում է որոշակի կառավարչական հմտություններ:

ԿՈՒԾԿ-ի ծրագրերի իրականացմանը մասնակցում են նաև Լունդի շվեդական համալսարանը և Ֆրանսիայի «ԷՍԻՄ» ճարտարագիտական բարձրագույն դպրոցը: Լունդի համալսարանի հետազոտող-գիտնական և ծրագրի համակարգող Էվա Էրիքսոնի կարծիքով, նման ծրագիրը շատ կարևոր է Հայաստանի համար:

«Ես մասնակցել եմ նման ծրագրի Ռումինիայում և, ուսումնասիրելով իրավիճակը` տեղեկատվությունը, դասախոսների հետ հաղորդակցումը, ընտրության հնարավորության պակասը, համոզվել եմ, որ նման ծրագրի իրագործումն անպայման պետք է բարելավի ուսանողների վիճակը», - ասում է նա:

«Միևնույն ժամանակ հավատացած եմ, որ ուսանողները մեր ապագան են, ուստի գլխավոր նպատակը երկրի տնտեսական իրավիճակի բարելավումն է, որպեսզի դադարեցվի ուղեղների արտահոսքը և փոխանակման ծրագրերի միջոցով մարդիկ հետ վերադառնան»: