Հայաստանի ֆուտբոլի ազգային հավաքականի և նոր գլխավոր մարզիչ Միհայ Ստոյկիցայի համար այս շաբաթը շատ ծանրաբեռնված էր:

«Եվրո-2004»-ի շրջանակներում վեցերորդ խմբի նախնական փուլի երկու խաղերում Հայաստանի հավաքականը հաղթեց Հյուսիսային Իռլանդիայի թիմին և 0-3 հաշվով պարտություն կրեց Իսպանիայի թիմից: Այդ հանդիպման ժամանակ հայ ֆուտբոլիստները ցույց տվեցին ավելի լավ խաղ, քան երևում է վերջնական արդյունքից:

Անցյալ շաբաթ օրը Երևանի Հանրապետական մարզադաշտում Հայաստանը վաստակեց երեք «եվրո»-միավոր, երբ խաղի ավարտից չորս րոպե առաջ կիսապաշտպան Արթուր Պետրոսյանը խփեց իր 10-րդ և այդ խաղում միակ գոլը:

Երեք տարվա մեջ սա Հայաստանի առաջին հաղթանակն էր:

Չորեքշաբթի օրն ազգային հավաքականը մեկնեց Իսպանիայի Լեոն քաղաք, որտեղ Անտոնիո Ամիլիվիայի անվան մարզադաշտում պետք է հանդիպեր վեցերորդ խմբի ուժեղագույն թիմին:

Այն սպասելիքները, որ Իսպանիան ջախջախիչ հաղթանակ կտանի, չիրականացան, համենայն դեպս առաջին խաղակեսի ընթացքում, երբ Հայաստանը գոլային մի քանի հնարավորություն ունեցավ, սակայն չկարողացավ իրացնել դրանք:

Իսպանացիներին, կարծես, շփոթեցրել էին հյուրերի գրոհները, որոնք շատ մոտ էին հաջողությանը, և դարպասապահ Ռոման Բերեզովսկու վստահ խաղը:

20-րդ րոպեին հայ ֆուտբոլիստները ստացան խաղի լավագույն հնարավորություններից մեկը, երբ Արթուր Ոսկանյանը գնդակը փոխանցեց Արտավազդ Քարամյանին իսպանացիների դարպասից երկու մետրի վրա: Սակայն Քարամյանը չկարողացավ սանձել գնդակը:

Առաջին խաղակեսի 0-0 հաշիվը պահպանվեց մինչև 64-րդ րոպեն, երբ Դիեգո Տրիստանը բացեց հաշիվը, իսկ հինգ րոպե անց Իվան Էլգյերան խփեց երկրորդ գնդակը: Վերջին գոլը խփեց Խոակին Սանչեսը լրացուցիչ ժամանակում՝ 93-րդ րոպեին:

Հաղթանակից ու պարտությունից հետո Հայաստանը զբաղեցնում է, ինչպես և անցյալ շաբաթ, 6-րդ խմբի չորրորդ հորիզոնականը, և դեռ հնարավորություն ունի դուրս գալ «ԵՎՐՈ-2004»-ի եզրափակիչ փուլ, որը կանցնի հաջորդ տարի Պորտուգալիայում:

 

	Խաղ	Հաղթ.	Ոչ ոքի	Պարտ.	Խփած գնդակներ	Բաց թողած գնդակներ	Միավ.
Իսպանիա	4	3	1	0	10	2	10
Ուկրաինա	4	1	3	0	6	4	6
Հունաստան	4	2	0	2	4	4	6
Հայաստան	4	1	1	2	3	7	4
Հ. Իռլանդիա	4	0	1	3	0	6	1