ArmeniaNow.com - Independent Journalism From Today's Armenia
May 28, 2004




Քթերի մրցույթ. ամենամեծն ու ամենալավը (ու ամենավատը)

Երևանի հիվանդանոցներից մեկը փնտրում է «ամենահայկական քիթ», որպեսզի հետո վիրահատի այն:

Իր ծառայությունների գովազդային քարոզարշավի շրջանակներում «Սուրբ Ներսես Մեծ» բժշկական կենտրոնի պլաստիկ վերականգնողական վիրաբուժության բաժանմունքը հաղթողին կշնորհի «Ամենահայկական քիթ» տիտղոսը և անվճար կվիրահատի այն:

Մրցույթը հայտարարվել է մեկ շաբաթ առաջ, և արդեն բաժանմունք է դիմել շուրջ 200 քիթ:

Բաժանմունքի վարիչ, պլաստիկ վիրաբույժ Կարեն Դանիելյանն ասում է, որ մրցույթի գաղափարը տվել է իր ընկերներից մեկը՝ հիվանդանոցում արտառոց քթով մի աղջիկ տեսնելուց հետո:

«Սկզբում լուրջ չընդունեցի, բայց հետո մտածեցի՝ իսկ ինչո՞ւ ոչ,- ասում է Դանիելյանը: - Նոր ու թարմ գաղափար է: Մեր տարածաշրջանում երբեք չի եղել, և, որքան գիտեմ, քթերի նման մրցույթ չի անցկացվել նաև աշխարհում»:

Սկզբում կազմակերպիչները ցանկանում էին մրցույթն անվանել «Ամենամեծ քիթ» կամ «Ամենածուռ քիթ», սակայն գիտակցելով, որ դա կարող է նվաստացուցիչ լինել, որոշեցին նախապատվությունը տալ հայրենասիրական «Ամենահայկական քիթ» անվանմանը:

Օրական մոտ 30 մարդ դիմում է «Լիտտե» բժշկական կոսմետոլոգիայի կենտրոն, գրանցվում ու լրացնում փաստաթղթերը (սակայն վիրահատությունը կատարվելու է «Սուրբ Ներսես Մեծ» բժշկական կենտրոնում): Նաև լուսանկարվում են՝ «նախկինում» լուսանկարի համար:

Դանիելյանի հավաստմամբ՝ դիմորդների մոտ 80 տոկոսը կանայք են:

«Շատ հաճախ տղամարդիկ ամաչում են դիմել բժշկին էսթետիկ վիրահատության համար՝ մտածելով, որ կարող են ծաղրել,- ասում է վիրաբույժը: - Սա հայկական մտածելակերպի հարց է: Բայց ասեմ, կամաց- կամաց փոխվում են: Նրանք սկսում են հասկանալ, որ իրենց արտաքինը կարևոր է»:

«Լիտտե» կենտրոնի աշխատակից Նարինե Ասլանյանն ասում է, որ դիմողների առաջին հարցն այն է, թե արդյոք իրենց «ամենահայկական քիթը» դրվելո՞ւ է հրապարակային քննարկման:

Դանիելյանը նշում է, որ հաղթողների գաղտնիությունը պահպանելու ցանկությունը հաշվի կառնվի, սակայն ինքը շատ կուզենար, որ մրցույթում հաղթողներին ցուցադրեին հեռուստատեսությամբ վիրահատությունից առաջ և հետո:

Եթե շատերը մասնակցում են մրցույթին՝ հպարտանալով իրենց մեծ, սապատավոր հայկական քթով, ապա Դանիելյանն ասում է, որ լավագույն «ամենահայկական քիթ» կընտրվի այն քիթը, որը բնավ չի համապատասխանում իր դեմքին:

«Մեծ քիթն այստեղ էական դեր չի խաղա,- ասում է Դանիելյանը: - Հնարավոր է, որ դեմքը խոշոր լինի, իսկ քիթը՝ փոքր ու ծուռ: Չափը նշանակություն չունի»:

Դանիելյանն ասում է, որ «ամենահայկական քիթը» վիրահատելիս իրենք հաշվի են առնելու հայկական դեմքի յուրահատկությունները՝ լայն ճակատ, խոշոր աչքեր, հաստ հոնքեր:

Հայաստանում այսօր քթի պլաստիկ վիրահատության միջին գինը 350-400 դոլար է:

Երեք քիթ կճանաչվի մրցույթի հաղթող: Առաջին տեղ գրավողը կվիրահատվի անվճար, երկրորդ և երրորդ տեղերը՝ համապատասխանաբար 75 և 50 % զեղչով:

Դիմումները կընդունվեն մինչև հունիսի 20-ը: Հունիսի 21-ին արվեստի և շոու-բիզնեսի ներկայացուցիչներից կազմված ժյուրին կընտրի հաղթողներին:


According to Agnes
 

  Inside
 

Defending Defense: NCI roundtable stirs debate on military matters

Full story

 
 

Built to Last: A Georgian Armenian’s house plans for eternity

Full story

 
 

A Byte with...

A few quotes from artist.

Full story


 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

"Reflections"

 

 




Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.