ArmeniaNow.com - Independent Journalism From Today's Armenia
March 19, 2004




Արմատախիլ արված ու ոչնչացված այգիներ. ագահության ճգնաժամն ավելի մեծ վնաս է հասցնում Երևանի «կանաչ գոտուն», քան էներգետիկական ճգնաժամը

Փողոցային սրճարանների քանակի կտրուկ աճը վերջին տարիներին, բնապահպանների հավաստմամբ, կրկնակի ավելի վնաս է հասցրել Երևանի կանաչ գոտուն, քան 1990-ականների սկզբի դաժան էներգետիկական ճգնաժամը, որը ստիպել էր շատ երևանցիների կտրել ծառերն իրենց տները տաքացնելու համար:
Ավերում են` ևս մի սրճարան կառուցելու համար

«Սոցիալ-էկոլոգիական ասոցիացիա» հասարակական կազմակերպու-
թյան հաշվարկներով շինարարական բուռն աճի ժամանակա-հատվածում ոչնչացվել են ավելի քան 700 հա կանաչ տարածքներ: Մեկ տասնամյակ առաջ հատվել է ընդամենը 300 հա տարածք:

Կազմակերպության ղեկավար Սրբուհի Հարությունյանի հավաստմամբ միայն վերջին տարվա ընթացքում մայրաքաղաքի կանաչ տարածքը 570 հեկտարից նվազել է 507 հեկտարի: «Դա հիմնականում զբոսայգիներում և այլ կանաչ տարածքներում իրականացված շինարարության հետևանք է», հայտնեց նա «Ազատ Եվրոպա» և «Ազատություն» ռադիոկայանների թղթակցին:

Անթիվ անհամար սրճարաններն ու զվարճավայրերն անճանաչելիության աստիճանի փոխել են քաղաքի կենտրոնի հասարակական զբոսայգիները: Այդ հաստատությունների տերերը, որոնցից շատերը նախարարներ և այլ բարձրաստիճան պաշտոնյաներ են, հեշտ ու հանգիստ կտրում են բազմամյա ծառերն իրենց չափազանց շահութաբեր բիզնեսի համար նոր տեղ զավթելու համար: Երևանի քաղաքապետարանը ենթարկվել է բնապահպանական խմբերի խիստ քննադատությանը կանաչ գոտիների կրճատում թույլատրելու համար: Բնապահպանները զգուշացնում են, որ դա անբարենպաստ ազդեցություն է ունենում շրջակա միջավայրի վրա:

Նախագահի նշանակած Երևանի նախկին քաղաքապետ Ռոբերտ Նազարյանը, անցյալ հոկտեմբերին պաշտոնից ազատվելուց շատ չանցած, ընդունեց, որ ինքը հաճախ հողահատկացումներ է արել ավելի հզոր պաշտոնյաների հրահանգով: Նա նաև նշել է, որ գրեթե բոլոր սրճարանատերերն անտեսել են իրենց արտոնագրերի պայմանները՝ իրենց հատկացվածից ավելի տարածքներ զավթելով և դրանց վրա ապօրինի շինություններ կառուցելով:

Իշխանությունները չեն հրապարակում սնկի նման բազմացող սրճարաններից քաղաքի ստացած եկամուտների գումարը: Երևանի ներկա քաղաքաապետ Երվանդ Զախարյանը կասկածներ ունի, որ գործատերերը խաբում են քաղաքապետարանին: Փոխքաղաքապետ Կամո Արեյանի հավաստմամբ Զախարյանը «խիստ հրաման է» տվել իր ենթականերին ստուգելու սրճարանների գործունեությունը:

Որոշ հասարակական կազմակերպություններ պնդում են, որ հողազավթման գործընթացում առանցքային դերը պատկանում է քաղաքի գլխավոր ճարտարապետ Նարեկ Սարգսյանին, որը զբաղեցնում է այդ պաշտոնը երեք տարբեր քաղաքապետների օրոք: «Նա է ապահովում այդ գործընթացի շարունակականությունը», ասում է Գոհար Օգանեզովան Հայկական բուսաբանական ընկերությունից:

Օգանեզովան նաև գանգատվում է, որ կառավարական պաշտոնյաները ծագած պրոբլեմների համար սովորաբար մեղադրում են իրենց նախորդներին կամ այլ պետական գերատեսչությունների: Բնապահպանության նախարար Վարդան Այվազյանը հենց դա էլ արեց երեքշաբթի օրը, երբ հայտարարեց, որ չունի բավականաչափ լիազորություններ Երևանում ծառահատումները կանխելու համար: «Քաղաքում ծառերի պահպանությունը քաղաքապետարանի գործն է», հայտնեց նա «Ազատ Եվրոպա» և «Ազատություն» ռադիոկայանների թղթակցին:

Այվազյանը նաև ուղղակիորեն հայտարարեց, որ իր ղեկավարած նախարարությունը հաճախ պատասխանատվության չի կանչում օրինազանցներին, որովհետև չի ցանկանում խանգարել Հայաստանի շինարարական բուռն աճին:


According to Agnes
 

  Inside
 

At Risk: Sanctions in Georgia reveal Armenia's regional vulnerability

Full story

 
 

Medicine on the Go: Villagers get treatment delivered to their door

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Fire and Rain and a Rain of Fire

Georgian President Mikael Saakhasvili braved rain for a visit to the Genocide Memorial in Yerevan last Saturday. The next day, his motorcade was fired upon as he tried to enter Ajaria, a contentiously contested autonomous republic on Georgia's Black Sea coast.

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.