ArmeniaNow.com - Independent Journalism From Today's Armenia
March 12, 2004




Հայացք դրսից. օտարերկրացու տեսակետն իր որդեգրած երկրի կյանքի մասին


Հենց այն ժամանակ, երբ ես քիչ էր մնում վերջապես գլուխ հանեի հայաստանյան իմ կյանքից… մի խոսքով, ինձ այս պարագայում պետք է ձեր օգնությունը:

Իմ սանիկ Տաթևիկը այս շաբաթ երկվորյակներ է ունեցել: ՈՒ թեև այդ կապակցությամբ ես երջանիկ եմ, ինչպես ցեխաջրում թավալվող խոզը, ես նաև շփոթմունքի մեջ եմ: Նախ ասեմ, որ ես նույնիսկ վստահ չեմ, որ «սանիկն» այստեղ ճիշտ բառ է: Պատմեմ կատարվածը:

Երեք տարի առաջ ես դարձա իմ բարեկամներ Հայկի և Տաթևիկի հարսանիքի քավորը՝ կնքահայրը: Մինչև Տաթևիկենց տուն գնալը` Հայկի ընտանիքը ներկայացնելու նպատակով, ես անգամ չգիտեի «քավոր» բառը, ինչը տգիտությամբ մեկ կարգով զիջում է իմ անտեղյակությանը, որ «քավոր» լինելով ես ստանձնում եմ Տաթևիկի հորից նրա դստեր ձեռքը Հայկի համար խնդրելու պատասխանատվությունը: Այդ գործընթացը բնավ չէր դյուրացնում այն փաստը, որ Տաթևիկի հայրը և ես շփման ընդհանուր լեզու չունեինք, իսկ խոսք ուզելն այն արարողությունը չէ, երբ կարելի է ապավինել մնջախաղին (թեև մի անգամ ինձ հաջողվել է հավ նմանակելով շուկայում ձու գնել):

Վախենամ, որ վերջին երեք տարվա ընթացքում ես շատ քիչ բան եմ արել կնքահոր կոչումով իմ հանդեպ ցուցաբերված հարգանքն արդարացնելու համար: Առայժմ կնքահոր դերի մասին իմ սովորած միակ բանն այն է, որ այս տիտղոսի շնորհիվ ընտանեկան ճաշկերույթներում հայտնվում ես արտոնյալ վիճակում և առաջինը քեզ են ճաշ մատուցում: Սակայն ինձ ասել են, որ քավորն այն մարդն է, որին զույգը պետք է դիմի ընտանեկան դժվարություններ ունենալու դեպքում: Հաշվի առնելով սեփական ընտանական գործերը կարգավորելու իմ անկարողությունը` ես որոշակի տագնապով եմ սպասում այն օրվան, երբ (կնքհայր ոչ արասցե) ինձ կանչեն միջնորդական առաքելության:

Ամուսնության ժամանակ ստանձնելով քավորի դերը` դրան հաջորդած կարճատև ինն ամիսների ընթացքում ես փորձել էի ավելի լավ պատրաստվել սանիկների զավակների կնքահայր լինելուն: Մասնավորապես ես բազմիցս դիտել էի «Կնքահայրը» ֆիլմի բոլոր երեք մասերը` դանդաղեցնելով և դադար տալով ֆիլմի այն մասերում, որտեղ Ալ Պաչինոն կամ Մարլոն Բրանդոն շփվում են երեխաների հետ:

Բացի այդ, սպասելով անցյալ շաբաթվա ավետիսին, ես դիտում էի ամերիկյան մաֆիայի մասին պատմող «Սոպրանոների ընտանիքը» հեռուստասերիալի թվային տեսասկավառակը:

Համեմատելով ապրելակերպի իտալական տարբերակը հայկականի հետ՝ կարող եմ ասել հետևյալը. փոխարինեք իտալական պաստան հայկական խորովածով և կստանաք «Սոպրանյանների ընտանիք»-ին շատ մոտ մի բան, այսինքն` մարմինը կիպ գրկող պոլիեստերե շապիկ հագած պլոճիկով տղերք, որոնք ավելի շուտ վախ, քան հարգանք են ներշնչում: (Ես արդեն սկսել եմ աշխատել պլոճիկի վրա, բայց դա ժամանակ է պահանջում: ՈՒ նաև, Թոնի Սոպրանոյի նման, սովորում եմ, թե ինչպես պետք է ճիշտ առոգանությամբ ասել «Բա հիմա ի՞նչ ես անելու»):

Ես բջջային հեռախոս եմ գնել սանիկներիս համար ու դրել եմ նրանց համարը արագահավաքի վրա, իսկ վերջերս Նահանգներ կատարած
ուղևորության ժամանակ երկտեղանոց մանկասայլակ եմ գնել: Կյանքումս առաջին անգամ նորածնի շորեր եմ գնել` զվարճանքով հայտնագործելով, որ գոյություն ունի այնպիսի բան, ինչպես զրո չափը:

Այս ամենի կապակցությամբ ես խիստ հուզված եմ և կնքահայրության այս ամբողջ եռուզեռի մեջ ես հանկարծ գլխի ընկա, որ երեխաների ծննդից երկու օր է անցել, իսկ ես նույնիսկ չգիտեմ արդյոք նրանք արդեն անուն ունեն կամ ինչ քաշով են ծնվել: Ես արդեն գիտեմ, որ սրանք կարևորագույն տեղեկություններ են լուրը ծանոթներին հայտնելիս: Սակայն կնքահայրությունը դժվար է տրվում այս գործում անփորձ, էլ չեմ ասում այս երկլեզու աշխարհում միալեզու մարդուն, որքան էլ նրա մտադրությունները բարի լինեն:

Ինչևէ, ես այժմ զբաղվում եմ ինքնակրթությամբ կնքահայրություն անելու բնագավառում: Ես պատրաստվում եմ կաշառք տալ բժիշկներին և ստել քահանաներին իմ կրոնական կողմնորոշման մասին, և հանկարծ իմանում եմ, որ ես կարող եմ բոլորովին էլ նորածինների քավորը չլինել: Այս աշխարհում թարգմանիչ ունենալն ինձ բավական չէ. այժմ ինձ պետք է նաև լրիվ դրույքով ազգագրագետ՝ Հայաստանի մշակութային ավանդույթները պարզաբանելու համար:

Այնպիսի տպավորություն է ստեղծվում, որ նորապսակների համար քավոր լինելը միանգամայն տարբեր է այդ միության հետևանք հանդիսացող ժառանգների քավոր լինելուց: Հնարավոր է, և բոլորովին անհավանական չէ, որ մեկ այլ անձ, ըստ երևույթին մանկակնքահայրության մեջ ավելի մասնագիտացած, կստանձնի նորածիններին մեծացնելու և դաստիարակելու պարտականությունները, որոնք ես վերապահել էի ամուսնության քավորին: Ես մտադրություն չունեմ խորամուխ լինելու ազգագրական մանրամասնությունների մեջ, բայց շատ շնորհակալ կլինեի, եթե ինչ-որ մեկը պարզաբաներ իմ պարտականություններն այս պարագայում:

Ծնող լինելու իմ ունեցած փորձն այնքան էլ շահեկան չէ քավորի իմ կերպարի համար: Ընտանեկան մի հավաքի ժամանակ ես գրկեցի քրոջս նոր քայլել սկսած դստրիկին ու տարա ցույց տալու «մու կովիկներին» հորս պատկանող մարգագետնում: Այս պատմության համար կարևոր է, որ այդ մարգագետնի ցանկապատի միջով էլեկտրականություն էր անցնում: Ես առանց որևէ միջադեպի մի միլիոն անգամ անցել էի այդ ցանկապատի վրայով: Բայց այդ օրը փշալարը բռնեց տաբատիս փողքը: 12 վոլտ լարումը թեթևակի հարվածեց ինձ ու վերածեց ձեռքերս մի ինքնանետիչի (կատապուլտի), և ես շպրտեցի երեխային դեպի կովը՝ այն երեխային, որին փորձում էի սիրաշահել: Այժմ նա միանգամայն առողջ կին է և իր սեփական երեխան ունի, բայց միթե դուք երկվորյակներ կվստահեի՞ք նման մարդու:

Երիտասարդ զույգը կարող է պրոֆեսիոնալ օգնության կարիք ունենալ, և հուսանք, որ նրանց բախտը կբերի, և նրանք կխուսափեն նման վախճանից: Սակայն ներկայումս ես, համենայն դեպս, վարժվում եմ Բրանդո(յան)ի նման կզակս քորել:

 

According to Agnes
 

  Inside
 

Free for a Fee: New law provides amnesty for draft dodgers

Full story

 
 

The Big Man of Mijnavan: The lives and wives of resettlement

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Flying High

In anticipation of this weekend's visit by Georgian President Mikhail Saakashvili, workers put up flags on Mashtots Avenue in Yerevan. At first, Armenian and Georgian flags were placed, but the Georgian ones had to come down when it was discovered that the design was wrong.

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.