Գեղեցիկ Սարգսյանը, որն իր հիմնական աշխատանքից զատ հայտնի է հրաշալի մուրաբաներ և պահածոներ պատրաստելու հմտությամբ, այս տարի մնացել է «անգործ»:

Մրգի գներն այս տարի շատ բարձր են

«Նախորդ տարիներին հուլիս ամսին ժրաջան հայ տանտիրուհիներն արդեն զանազան մուրաբաներ ու ջեմեր էին պատրաստած լինում,- ասում է Գեղեցիկը,- սակայն այս տարի ամեն ինչ այնքան է թանկացել, որ մարդիկ չեն կարողանում մեկ-երկու կիլոգրամ միրգ առնել իրենց երեխաների համար, ուր մնաց պահածոներ պատրաստելու մասին մտածեն»:

Այս տարի 1 կգ կեռասն արժե 600-1200, սալորը` 500-600, իսկ ծիրանը` 700-2000 դրամ (կախված որակից): Դա գրեթե 10 անգամ բարձր է անցյալ տարվա գներից: Բանջարեղենի գները բարձրացել են 2-3 անգամ:

Գների նման աննախադեպ աճը մասնագետները բացատրում են գարնան ամիսների մի շարք բնական աղետներով, որոնք հսկայական վնաս հասցրին այգիներին ու բանջարանոցներին:

«Նման վիճակի հիմնական պատճառը ապրիլյան ցրտահարությունն է,- ասում է գյուղատնտեսության նախարարության բուսաբուծության վարչության պետ Գառնիկ Պետրոսյանը: - Աննախադեպ տարի էր իր մեծ վնասներով, այդ թվում` կարկտահարությամբ ու ջրհեղեղներով»:

Պետրոսյանի հավաստմամբ` հատկապես տուժել են ծիրանի այգիները:

Հանրապետության 5300 հեկտար ծիրանի այգիներից ցրտահարվել է առնվազն 5000 հեկտարը: Տուժել են նաև կեռասի, սալորի ու տանձի այգիները, ինչի հետևանքով էլ գներն աճել են:

«Այս տարի ծիրանի բերքի 95 տոկոս կորուստ ենք ունեցել, ինչն իսկական աղետ է,- ասում է Պետրոսյանը: - Արդյունքում միրգը խիստ պակասել է և, հետևաբար, աճել են գները»:

Երևանի կենտրոնում գտնվող Փակ շուկայի մրգավաճառ Արմենն ասում է, որ նման բարձր գներ չի հիշում:

«Գնորդները շատ են պակասել,- ասում է նա: - Հայաստանը հայտնի է իր ծիրանի և’ որակով, և’ քաղցրահամությամբ, և’ մատչելիությամբ, սակայն այս տարի բանանի հանրապետություն ենք դարձել: Ծիրանի երկրում այսօր բանանն ավելի էժան է: Իսկ պետական աշխատավարձով կամ թոշակով ապրող մարդը չի կարող իրեն նման շքեղություն թույլ տալ»:

Պետրոսյանն ասում է, որ թեև միրգն ինչ-որ առումով շքեղություն է դարձել, մոտ ժամանակներում վիճակը որոշ չափով կշտկվի:

«Մեծապես տուժել են Արարատի և Արմավիրի մարզերի այգիները, սակայն Կոտայքի, Բաղրամյանի, Եղվարդի ու Աշտարակի շրջաններում մրգերի որոշ տեսակներ կհասունանան միայն օգոստոսին, ինչը որոշ չափով կնպաստի մրգերի ու բանջարեղենի գների իջեցմանը»,- ասում է նա:

Սակայն մինչև մասնագետի կանխատեսումն իրականանա, մայրաքաղաքի գյուղատնտեսական շուկաներում տնօրինում են անասելի բարձր գները: Մրգավաճառների հավաստմամբ` այս տարի ծիրանը դարձել է թանկարժեք միրգ, որի գնորդները կամ բարեկեցիկ քաղաքացիներն են, կամ էլ զբոսաշրջիկները, որոնք ցանկանում են համտեսել հայկական արևահամ ծիրանը:

Ըստ Պետրոսյանի` այս տարի արտահանվել է մոտ 400 տոննա ծիրան՝ 1200 տոննայով պակաս, քան նախորդ տարի:

«Արդեն մի քանի տարի է, ծիրանենիները պարբերաբար ցրտահարվում են,- ասում է Պետրոսյանը: - Ծիրանի այգիների նկատմամբ ինչ-որ հատուկ վերաբերմունք պետք է ցուցաբերվի, որպեսզի տարիների ընթացքում չկորցնենք մեր ազգային խորհրդանշանը»: