ArmeniaNow.com - Independent Journalism From Today's Armenia
February 13, 2004


Սխալ նոտա. կիթառահարը դատապարտվել է էլփոստային շանտաժի համար


Էմմիին (կենտրոնում) սպառնում էին ինտերնետային շանտաժով

 Դեռհաս մի երգչուհի դարձել է շանտաժի թիրախ. աղջկան սպառնացել են հրապարակել նրա մոնտաժված մերկ լուսանկարը:

Տասնիննամյա Էմմին, որը հանրահայտ երգչուհի Նադեժդա Սարգսյանի և քանդակագործ Դավիթ Բեջանյանի դուստրն է, ստացել է էլեկտրոնային նամակ մերկ մարմնի վրա մոնտաժված իր նկարով: Նամակի հեղինակը պահանջել է 500 դոլար՝ զգուշացնելով, որ չվճարելու դեպքում կուղարկի նկարը հանրապետության բոլոր թերթերին ու ինտերնետային սայթերին:

«Սկզբում ես դա լուրջ չէի ընդունում: Էմմին նույնիսկ սկսել էր կատակով բանակցել նրա հետ, - պատմում է Նադեժդան: - Սակայն երբ հեղինակը սկսեց ավելի հաճախ սպառնալ և գրել՝ քեզ մնացել է կես ժամ, քեզ մնացել է 10 րոպե, եթե չգաս, կյանքդ դժոխք կդարձնեմ, հասկացանք, որ ամեն ինչ առավել քան լուրջ է»:

Էմմիի ծնողները օգնության համար դիմեցին ազգային անվտանգության ծառայությանը, որն սկսեց հետաքննել գործը և շուտով պարզեց, որ մոնտաժված նկարն ու նամակներն ուղարկվել են Էմմիի ու Նադեժդայի նվագախմբի կիթառահար Հովակ Ալավերդյանի սեփական համակարգչից:

Մայրն ու դուստրը ցնցված էին և ասում էին, որ իրենք երկուսն էլ երկար ժամանակ աշխատել են Հովակ Ալավերդյանի հետ և նրան համարել են կիրթ ու հավասարակշռված անձ: Սակայն քանի որ գործին արդեն միջամտել էր ազգային անվտանգության ծառայությունը, 25-ամյա երաժշտին ներկայացվեց մեղադրանք ըստ քրեական օրենսգրքի 182 հոդվածի` շորթում:

Այսպես Հայաստանի լավագույն 5 կիթառահարներից մեկը հայտնվեց դատարանի առաջ և ընդունեց իր մեղքը: Փետրվարի 6-ին Արաբկիր և Քանաքեռ-Զեյթուն համայնքների առաջին ատյանի դատարանը Ալավերդյանին դատապարտեց 6 ամսվա ազատազրկման:

«Ես հասկանում եմ, որ լավ բան չեմ արել, բայց պնդում եմ, որ երբևէ Էմմիից փող վերցնելու կամ այդ լուսանկարները  մամուլին հանձնելու մտադրություն չեմ ունեցել», հայտնել է դատավորին Ալավերդյանը:

Դատավճռի հրապարակումից հետո երաժշտին անմիջապես տեղափոխել են մեկուսարան: Նրա ծնողները մտադիր են բողոքարկելու դատավճիռը և ասում են, որ ցնցված են, որ իրենց որդուն տեղափոխել են մեկուսարան, կարծես վտանգավոր հանցագործ լինի:

«Մի՞թե կարելի է այդքան անարդար լինել, սա ընդամենը չմտածված խաղ է եղել, դրա համար չի կարելի այդքան խիստ պատժել», պնդում է Հովակի հայրը, որը խնդրեց չհրապարակել իր անունը:

Էմմիի ընտանիքը բոլորովին այլ կարծիք ունի այս կապակցությամբ: Էմմիի հայրը գտնում է, որ պատիժը նույնիսկ մեղմ է. «Ի՞նչ եք պնդում, որ խաղ էր կամ լուրջ չէր, պետք է բռնաբարե՞ր, որ լուրջ լիներ: Անգամ ես ահաբեկված էի, ի՞նչ է նշանակում փող պահանջել ու սպառնալ իմ աղջկա դեմքով մերկ նկար տարածել ողջ ինտերնետով»:

Ալավերդյանի արարքի դրդապատճառը մնաց անհայտ, քանի որ դատարանում նա ոչ մի բացատրություն չտվեց: Զոհը ենթադրում է, որ դա կարող է լինել անպատասխան սիրո տարօրինակ արտահայտություն:

««Սիրահարվել» բառը տղայի կողմից նշվել է մի քանի անգամ: Բայց որքան էլ մերժված լիներ, պետք է իրեն տղամարդավայել պահեր: Կամ էլ միգուցե նա ուզում էր այդ ձևով իր անունը գովազդել», ասում է Էմմին:

Հովակն իր վերջին խոսքում նշել է, որ իր և Էմմիի նամակագրությունը ամիսներ է տևել, և այդ ամբողջը խաղ է եղել: Նա ասել է, որ Էմմին կարող էր շատ հանգիստ փոխել իր էլեկտրոնային հասցեն, բայց դա չի արել և, փաստորեն, մտել է խաղի մեջ:

Կիթառահարի հետ անցյալում համագործակցած մյուս երաժիշտներն էլ են արտահայտել իրենց տարակուսանքը նրա արարքի կապակցությամբ: Ֆորշը հայտնել է, որ չի կարող հասկանալ, թե ինչպես այդպիսի տաղանդավոր մարդը կարող էր թողնել իր արվեստը և զբաղվել համակարգչային շանտաժով:


According to Agnes
 

  Inside
 

Street Fighting: Residents say they are paying the price of Yerevan 's prestige landmark.

Full story

 
 

Home from home: Citizens of Armenia are forced to leave Turkmenistan.

Full story

 
 

 


The Week in seven days

 
 


The Arts in seven days

 

  Photo of the week
 
Click on the photo above to enlarge.
 
 
 
 

Special Delivery

You wait 12 years for a baby and then three come along at once...Karina Maisuradze-Gevorkyan became the proud mother of triplets, two girls and one boy, on February 5 at Yerevan's Maternity Research Center. Karina had been trying to have a child for 12 years without success before approaching the center and undergoing fertility treatment.

 

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.