Նուբարաշենի քրեակատարողական հիմնարկում պահվող մահվան դատապարտված 51 կալանավորներից 45-ը հացադուլ են հայտարարել: Նրանք պահանջում են հանդիպում Հայաստանում Եվրամիության, Եվրախորհրդի և ԵԱՀԿ-ի ներկայացուցիչների հետ, որպեսզի բողոքեն իրենց պատժաչափերում կատարված փոփոխությունների դեմ:

Հացադուլավորները մասնավորապես պահանջում են վերանայել իրենց գործերը, քանի որ Հայաստանը վերացրել է մահապատիժը (Եվրախորհրդի պահանջով անցյալ տարի Հայաստանի քրեական օրենսգիրքը ենթարկվել է փոփոխության. վերացվել է մահապատիժը՝ փոխարինվելով ցմահ ազատազրկմամբ: Բայց քանի որ նախկին օրենսգրքով «ցմահ ազատազրկում» նախատեսված չի եղել, կալանավորներն ասում են, որ յուրաքանչյուր գործ պետք է առանձին վերանայվի):

Արդարադատության նախարարության մամլո քարտուղար Արա Սաղաթելյանը հայտնել է, որ այս դիմումներին ընթացք է տրվելու օրենքով նախատեսված կարգով:

«ԴատապարտյալներÁ, իհարկե, իրավունք ունեն իրենց կարծիքն արտահայտելու տարբեր ընդունելի միջոցներով: Կարող են անգամ դիմել հացադուլի, ինչը, սակայն, ծայրահեղ քայլ է, - ասաց Սաղաթելյանը: - Թե որքան կտևի հացադուլը, ոչ ոք չի կարող ասել, բայց բժշկի որոշման հիման վրա կալանավորները կարող են դուրս բերվել հացադուլից հարկադիր կերակրմամբ»:

Առավելագույն պատժի արժանացած այս անձինք արդեն երկրորդ անգամ են դիմում հացադուլի: Անցյալ տարի օգոստոսին կալանավորներն ընդվզեցին, երբ նախագահ Ռոբերտ Քոչարյանը ստորագրեց մի հրամանագիր, որը, ներում շնորհելով 42 կալանավորների, նրանց մահվան դատավճիռը փոխարինեց ցմահ բանտարկությամբ: Որոշ կալանավորներ բողոքում էին՝ ասելով, որ իրենք ներման խնդրանքով դիմում չեն ներկայացրել:

Վերջերս կայացած մամլո ասուլիսից պարզ է դառնում, որ Եվրոպայի խորհրդի խորհրդարանական վեհաժողովը (ԵԽԽՎ) համամիտ է կալանավորների հետ:

«ԵԽԽՎ-ն նշում է, որ Հայաստանի նախագահի 2003 թ. օգոստոսի 1-ի հրամանագիրը, որով 42 անձանց մահապատիժը փոխարինվեց ցմահ բանտարկությամբ, առաջացրեց նրանց մեծ դժգոհությունը, - ասել է ԵԽ գլխավոր քարտուղարի ներկայացուցիչ Նատալյա Վուտովան: - Այդ կապակցությամբ ԵԽԽՎ-ն գտնում է, որ յուրաքանչյուր անհատի հարցը պետք է առանձին քննվեր, և հետևողականորեն առաջարկում է Հայաստանի իշխանություններին կրկին անդրադառնալ յուրաքանչյուր գործի՝ անհրաժեշտության դեպքում վերանայելով դատավճիռը»:

Մարդու իրավունքների և հիմնարար ազատությունների կոնվենցիայի 6-րդ արձանագրությ³ն վավերացվելուց հետո հացադուլավորների պահանջով Ազգային ժողովի պատվիրակությունը հանդիպեց կալանավորների հետ:

«Նրանք հարց բարձրացրին վերանայելու իրենց գործերը, կամ նախագահի հրամանագրից հետո կոնկրետացնել, թե ինչպես է շարունակվելու այդ գործընթացը, - այն ժամանակ ասել էր ԱԺ պետաիրավական հարցերի հանձնաժողովի նախագահ Ռաֆիկ Պետրոսյանը: - Այդ բոլոր գործերի կապակցությամբ պետք է հավաքվենք Ազգային ժողովում, քննարկենք ու մի միասնական կարծիքի գանք»:

Պետրոսյանի գնահատմամբ դատապարտյալների գանգատներն օրենքի սահմաններում են: