Դուք ուզում եք, մենք էլ բերում ենք

 Է՛լ ավելի մոտենալով վայրի արևմուտքի ավանդույթներին՝ անցյալ շաբաթ Հայաստանը կազմակերպեց զենքերի իր առաջին ցուցահանդեսը:

Հայաստանի որսորդների և ձկնորսների միության կազմակերպած ցուցահանդես-վաճառքի բացմանը եկել էին 35-40 հոգի ինչպես նայելու, այնպես էլ զենք գնելու:

«Արտերկրում նման ցուցահանդեսներ կազմակերպվում են բավականին հաճախ, - ասում է որսորդների և ձկնորսների միության նախագահ Սայաթ Դավթյանը: - Սա ինչ-որ առումով մեր հասարակության համար նաև անհրաժեշտ էր: Մարդիկ պետք է իմանան, թե Հայաստանում ինչ ընկերություններ են զբաղվում զենքի ու զինամթերի մասնագիտացված առևտրով, և թե ընդհանրապես ինչ որսորդական զենքեր գոյություն ունեն»:

Հայաստանի զենքի առաջին ցուցահանդեսը միջազգային էր: Ներկայացված էին Տուլայի հանրահայտ զինագործարանի արտադրանքը, «Իժմեխ» և «Իժմաշ» մակնիշի ռուսական զենքեր: Գերմանացիները ներկայացրել էին «ՈՒմարեքս» և «ՌԳ-Ռիոն» ընկերությունների գազային ատրճանակներ: Իտալիան ներկայացված էր «Վոլտրան» ընկերության զենքերով: Ցուցահանդեսի մասնակիցների թվում էին նաև Չեխիան և Բելգիան:

Իտալական հանրահայտ «Բերետան» վաճառվում էր 1600 դոլարով: Ռուսական մաֆիայի սիրելի «ՏեՏե»-ն արժեր 800 դոլար: Իհարկե, ներկայացված էր նաև Ամերիկան՝ «Վինչեստերով»:

 

Հայաստանում զենքի ցուցահանդես կազմակերպելու գաղափարը պատկանում է Դավթյանին

Ըստ Դավթյանի խորհրդային տարիներին զենք ու զինամթերք վաճառելու իրավունք ուներ միայն որսորդների և ձկնորսների միությունը: Այսօր կան մասնագիտացված ընկերություններ, որոնք զենքի ներկրման և վաճառքի արտոնագիր ունեն: Անցյալ շաբաթվա ցուցանդեսում ներկայացված էին վեց նման ընկերություններ:

Որսորդմիության տաղավարում ներկայացված էին որսորդական զենքեր, այդ թվում՝ «Տիգր» որսորդական կարաբինը, որը նշանառություն է ապահովում մինչև 800 մ հեռավորության վրա: Տաղավարում ներկայացված զենքերի գները տատանվում էին 320 - 1500 դոլարի սահմաններում:

Դավթյանը բացատրում է, որ Հայաստանում զենք գնելու համար պետք է լինել որսորդմիության անդամ և համապատասխան փաստաթղթեր ներկայացնել ՀՀ ոստիկանություն: Դրանից հետո պոտենցիալ գնորդը զենքի ձեռքբերման թույլտվություն է ստանում:

Եթե տվյալ անձը խնդիրներ չունի իրավապահ մարմիների հետ, գործարքը սովորաբար իրականացվում է մեկ օրում:

Ցուցահանդեսում ներկայացված էլեկտրաշոկային սարքերի ու արցունքաբեր գազի բալոնների ձեռքբերման համար թույլտվություն չի պահանջվում:

Ըստ ցուցահանդեսի մասնակիցների մեծ էր 170 հազար դրամ (մոտ 300 դոլար) արժողությամբ «Իժ-79» մոդելի ատրճանակի պահանջարկը: