Ազատ ոճի ըմբշամարտ (Եվրոպայի առաջնություն)

Ոսկե մեդալակիր Բերբերյանը

Ապրիլի 23-25-ը Թուրքիայի մայրաքաղաք Անկարայում անցկացված Եվրոպայի ազատ ոճի ըմբշամարտի առաջնությանը մասնակցում էին Հայաստանի հինգ մարզիկներ:

55 կգ քաշային կարգում ոսկե մեդալ նվաճեց երևանցի Մարտին Բերբերյանը, որը եզրափակիչում առավելության հասավ ռուսաստանցի Վադիմ Բատաևի նկատմամբ:

66 կգ քաշային կարգում Ժիրայր Հովհաննիսյանը գրավեց չորրորդ տեղը: Մյուս երեք հայ ըմբիշներն անհաջող ելույթ ունեցան:

Ֆուտբոլ (ընկերական խաղ)

Ապրիլի 28-ին Հայաստանի ֆուտբոլի հավաքականը Երևանում հյուրընկալեց մեկ այլ նախկին խորհրդային հանրապետության՝ Թուրքմենստանի հավաքականին: Այդ ընկերական խաղը երկու թիմերի առաջին հանդիպումն էր:

Հայ ֆուտբոլիստներն առավելություն ունեին ամբողջ խաղի ընթացքում, սակայն չէին կարողանում բացել հաշիվը մինչև 67-րդ րոպեն, երբ Արա Հակոբյանը խփեց հանդիպման միակ գոլը:

«Բանանց» ակումբի հարձակվող Հակոբյանը մտնում է եվրոպական առաջնությունների «Ոսկե մարզակոշիկ» մրցանակին հավակնող լավագույն ռմբարկուների հնգյակ: Հայաստանի բարձրագույն խմբի անցյալ մրցաշրջանում նա խփել է 45 գոլ:

Ծանրամարտ (Եվրոպայի առաջնություն)

Ապրիլի 26-ին Ուկրաինայի մայրաքաղաք Կիևում ավարտվեցին Եվրոպայի տղամարդկանց 83-րդ և կանանց 17-րդ առաջնությունները:

Հայաստանի հավաքականը տուն վերադարձավ առանց մեդալների:

Քսանամյա Արթուր Դանիելյանը 11-րդն էր իր քաշային կարգում՝ 300 կգ արդյունքով (130 կգ պոկում և 170 կգ հրում վարժություններում): 22-ամյա Արմեն Ղազարյանը նույն քաշային կարգում գրավեց 14-րդ տեղը:

Եվս երկու հայ ծանրորդներ մրցում էին 23 երկրների մարզիկների հետ՝ 77 կգ քաշային կարգում: 23-ամյա Գևորգ Ալեքսանյանը գրավեց 8-րդ տեղը 340 կգ արդյունքով (155 կգ պոկում և 185 կգ հրում վարժություններում), իսկ 27-ամյա Արսեն Մելիքյանը 10-րդն էր՝ 337,5 կգ արդյունքով (155+182,5 կգ):

21-ամյա Տիգրան Մարտիրոսյանը 85 կգ քաշային կարգում հանդես եկող 28 ծանրորդների մեջ 10-րդն էր՝ 360 կգ ընդհանուր արդյունքով (162,5+197,5):

Եվ, վերջապես, +105 կգ քաշային կարգում Հայաստանը ներկայացնում էին երկու ծանրորդներ` Սոս Խաչատրյանը և Աշոտ Դանիելյանը: 27-ամյա Խաչատրյանը 375 կգ ընդհանուր արդյունքով (175+200 կգ) գրավեց 10-րդ տեղը: Իսկ Դանիելյանը` պոկում վարժությունում 190 կգ արդյունք ցույց տալուց հետո, զրո ստացավ հրում վարժությունում:

Կանանց առաջնությունում Հայաստանի միակ ներկայացուցիչը` 17-ամյա Հռիփսիմե Խուրշուդյանը, 63 կգ քաշային կարգում գրավեց 6-րդ տեղը:

Հայաստանի տղամարդկանց հավաքականը 34 մասնակից երկրների մեջ գրավեց 22-րդ տեղը:

Թենիս (ՊԹԱ-ի առաջնություն)

Արգենտինահայ Դավիթ Նալբանդյանն Իսպանիայի Բարսելոնա քաղաքում անցկացվող Միջազգային շարքի մրցաշարում դուրս է եկել երրորդ փուլ:

ՊԹԱ-ի աղյուսակում 27-րդ տեղը զբաղեցնող և 3-րդ համարի տակ ցանված Նալբանդյանը 6-2, 6-4 հաշվով հաղթանակի հասավ ամերիկացի Թոդ Մարթինի նկատմամբ և այժմ քառորդ եզրափակիչում կմրցի իսպանացի Մարկ Լոպեսի հետ:

Իսկ Հայաստանը ներկայացնող Սարգիս Սարգսյանը, որը ներկայում զբաղեցնում է 73-րդ տեղը ՊԹԱ-ի աղյուսակում, Գերմանիայի Մյունխեն քաղաքում անցկացվող Միջազգային շարքի մրցաշարի երկրորդ փուլում 2-6, 4-6 հաշվով զիջեց շվեյցարացի Միխել Կրատոխվիլին:

Կավե ծածկույթի վրա անցկացվող այդ մրցաշարի առաջին փուլում Սարգսյանը 6-4, 7-6 (6) հաշվով դժվար հաղթանակ էր տարել աղյուսակում 24-րդ հորիզոնականը զբաղեցնող ամերիկացի Ջեյմս Բլեյքի նկատմամբ:

Այս մրցաշարում Սարգսյանը վաստակեց 6150 եվրո և 3 հաշվարկային միավոր: