ArmeniaNow.com - Independent Journalism From Today's Armenia
April 30, 2004




Եթերի ժառանգորդը. հանրահայտ օրաթերթի խմբագիրը ստանձնում է ԱԺ պատմագավորին պատկանող հեռուստաընկերության ղեկավարությունը

Առաջատար ընդդիմադիր օրաթերթի խմբագիրը ստանձնել է իշխանությունների հետ անուղղակի կապեր ունեցող երևանյան հեռուստաընկերություններից մեկի ղեկավարությունը:

Հայաստանի առաջատար օրաթերթերից մեկի` «Առավոտի» խմբագիր Արամ Աբրահամյանը, նշանակվել է նախկին «Կենտրոն», իսկ այժմ` Ազգային ժողովի իշխանամետ պատգամավոր և գործարար Մուրադ Գուլոյանին պատկանող հեռուստաընկերության տնօրեն: Ընկերությունը նոր անվանումով եթեր դուրս կգա մայիսի 10-ին:

Նոր տնօրենը

Վերջին մեկ տարին
հեռուստաընկերու-թյան սեփականատերն էր մեկ այլ պատգամավոր Գուրգեն Արսենյանը: Ընդդիմության հանրահավաքների «Կենտրոնի» լուսաբանումը բարենպաստ չէր իշխանությունների համար, ինչը պատճառ եղավ ասեկոսեների, թե Արսենյանը վաճառել է ընկերությունն իշխանությունների ճնշման տակ:

Այս նշանակումը տեղիք է տվել քննարկումների այն մասին, թե արդյոք ընդդիմադիր լրագրողը և պատգամավորին պատկանող հեռուստաընկերությունը կկարողանան ընդհանուր եզրեր գտնել քաղաքականորեն պառակտված Հայաստանի լրատվական դաշտում ընկերության գրավելիք դիրքի հարցում:

Բացի այդ, լրատվական վերլուծաբանների հետաքրքրությունը շարժել է այն փաստը, որ Աբրահամյանը ժառանգելու է մի հեռուստալիք, որը երկու տարի առաջ ձևավորվելով, նպաստել է «Ա1+» հեռուստաընկերությանը եթերից զրկելուն` առաջ բերելով արդեն երկու տարի շարունակվող բանավեճեր, որոնք մեղադրում են իշխանություններին գրաքննություն հաստատելու մեջ:

(2002 թվականի ապրիլին հանրապետության առաջատար ընդդիմադիր «Ա1+» հեռուստաընկերությունը զրկվեց եթերարձակման արտոնագրից վիճահարույց մի մրցույթում, երբ նախագահի նշանակած հանձնաժողովը արտոնագիր շնորհեց «Շարմ» ընկերությանը, որը հիմնականում զբաղվում է զվարճալիքների կազմակերպման և գովազդային գործունեությամբ: Ընդ որում, այն ժամանակ «Շարմը» նույնիսկ լրագրողական աշխատակազմ չուներ: Գուլոյանը ձեռք է բերել ընկերությունն անցած շաբաթ):

Աբրահամյանը Մեսրոպ Մովսիսյանի հետ միասին 1991 թվականին հիմնադրել է «Ա1+» հեռուստաընկերությունը և մինչև այն արտոնագրից զրկելը վարել է ընկերության առավել ժողովրդականություն վայելող «Հետգրություն» հաղորդաշարը:

Աբրահամյանն իր լրագրողական հեղինակությունը համարում է նոր պաշտոնում իր գործունեության հաջողության գրավականը: Նա ասում է, որ «Առավոտն» ամեն ինչ կանի, որ «Ա1+»-ը եթեր վերադառնա` ավելացնելով, որ խոսակցություններն այն մասին, թե «Առավոտ ԹիՎի»-ն կդառնա նոր «Ա1+» «անհեթեթություն են»:

«Իմ ղեկավարած «Առավոտ ԹիՎի»-ն լինելու է այն ամբիոնը, որից մշտապես խոսվելու է «Ա1+»-ի վերաբացման մասին,- ասում է Աբրահամյանը: - Ես մասնակցելու եմ բոլոր տեսակի ակցիաներին (երթերին, ցույցերին), որոնք կազմակերպվելու են ի պաշտպանություն «Ա1+»-ի»:

Աբրահամյանը նույնիսկ ասում է, որ եթե Հեռուստատեսության և ռադիոյի ազգային հանձնաժողովը մրցույթ հայտարարի 37-րդ կապուղու համար (որով հեռարձակվում է «Առավոտ ԹիՎի»-ին, իսկ նախկինում` «Ա1+»-ը), իրենք «դրան չեն մասնակցի և ամեն ինչ կանեն, որ հաղթի «Ա1+»-ը»:

Նորանշանակ տնօրենն առարկում է իր գլխավորած օրաթերթին և հեռուստաընկերությանը որևէ քաղաքական պիտակի վերագրման դեմ:

«Ընդդիմադիր և իշխանամետ կարող են լինել քաղաքական գործիչները, մեզ դա չպետք է վերաբերի»,- ասում է նա:

Առաջին անգամ պատգամավոր դարձած Գուլոյանն ընտրվել է Հանրապետական կուսակցության ընտրացուցակներով, թեև կուսակցության անդամ չէ: Հայաստանում նա հայտնի դեմք չէ, «Միլտա» ընկերության (սննդի արտադրություն) սեփականտերն է: Գուլոյանը հայաստանյան օլիգարխ Գագիկ Ծառուկյանի («Դոդի Գագո») համագյուղացին է: Կարծիք կա, թե հեռուստաընկերությունը, որն իբր վաճառվել է 500 հազար դոլարով, իրականում գնել է հենց Ծառուկյանը:

Աբրահամյանը դրվատանքով արտահայտվեց «Կենտրոնի» վերջին շրջանի լրատվության որակի մասին` հատկապես բարձր գնահատելով ապրիլի 13-ին պետական ոստիկանության և ընդդիմադիր ցուցարարների միջև բախման լուսաբանումը:

Աբրահամյանի հավաստմամբ «Կենտրոնը» «եղածների մեջ ամենաազատ լրատվամիջոցն է»:

Սակայն ուրիշների պնդմամբ, հենց այդ հաղորդումներն են զայրացրել իշխանություններին, և բարձրաստիճան իշխանավորները «ստիպել են» Արսենյանին վաճառել ընկերությունը ոստիկանության և ցուցարարների միջև բախումների հեռարձակման պատճառով:

Այդ կարծիքին է նաև «Ա1+»-ի տնօրեն Մեսրոպ Մովսեսյանը:

Նա ասում է, որ երբ «Ա1+»-ին զրկեցին արտոնագրից, նախագահ Ռոբերտ Քոչարյանը խոստացավ ստեղծել դրա նման մեկ այլ ընկերութուն: Այդպիսի ընկերություն պետք է լիներ «Կենտրոնը»:

«Նախագահն ուզում էր դա անել Գուրգեն Արսենյանի միջոցով,- ասում է Մովսեսյանը,- բայց երբ Արսենյանը սայթաքեց, նրան ստիպեցին վաճառել «Կենտրոնը»»:

Երևանում լուրեր են շրջում, որ ապրիլի 13-ի դեպքերի հեռարձակումից հետո Քոչարյանը հանդիպում է ունեցել Արսենյանի հետ:

Նախագահի մամլո խոսնակ Աշոտ Քոչարյանը հայտնեց «ԱրմենիաՆաուին», որ նախագահի և Արսենյանի միջև հանդիպում չի արձանագրվել: Խոսնակը չմեկնաբանեց ասեկոսեներն այդ մասին:

«ԱրմենիաՆաուն» փորձեց ստանալ Արսենյանի մեկնաբանությունները վերոհիշյալի կապակցությամբ: Արսենյանն ասաց, որ կհայտնի իր կարծիքը, երբ նոր ընկերությունը եթեր դուրս գա: Պատասխանելով այն հարցին, արդյոք Արսենյանի վրա ճնշում են գործադրել՝ ստիպելով վաճառել «Կենտրոնը», Արսենյանի օգնականն ասաց, որ պատգամավորը «չի ցանկանում այժմ խոսել այդ մասին»:

Իսկ այդ ընթացքում Մովսեսյանը քննադատում է իր նախկին գործընկեր Աբրահամյանին այն բանի համար, որ նա ստանձնել է մի ընկերության ղեկավարությունը, որը նպաստել է «Ա1+»-ին եթերից զրկելուն:

«Ընդունելով այդպիսի որոշում՝ նա (Աբրահամյանը) ցույց տվեց, որ փոխել է իր թիմը,- ասել է Մովսեսյանը: - Այս երկրում, իհարկե, պակասում էր Արամի նման իմիտատոր՝ ազատ խոսքի պայքարում, այն էլ գտան: Արամը լավ լրագրող է և կարող է կազմակերպել անկախ ալիքի իմիտացիա: Ինձ միայն զարմացնում է, որ նա համաձայնեց դրան»:

Սակայն Աբրահամյանը մերժում է այն մեղադրանքները, որ ինքը փոխել է քաղաքական կողմնորոշումը՝ պաշտոն ստանձնելով իշխանամետ համարվող ընկերությունում:

Նա համոզմունք է հայտնում, որ պատգամավոր-սեփականատերը չի օգտագործի հեռուստաընկերությունը որպես իր քաղաքական հայացքների ամբիոն:

«Դա նրա համար բիզնես է. անել ներդրումներ հետագայում եկամուտներ ստանալու համար,- ասում է Աբրահամյանը: - Վստահ եմ, որ դա է ազատ լրատվամիջոցներ ստեղծելու միակ ճանապարհը: Լրատվամիջոցներ, ոչ թե քարոզչամիջոցներ»:

Արամ Աբրահամյանը մասնագիտությամբ երաժշտագետ է, ավարտել է
Երևանի պետական կոնսերվատորիան, պաշտպանել է թեկնածուական թեզ: Եղել է նորանկախ Հայաստանի առաջին նախագահ Լևոն Տեր-Պետրոսյանի մամլո խոսնակը: 1994 թվականից «Առավոտ» օրաթերթի խմբագիրն է:

Դեռ մինչև «Ա1+»-ի հաղորդաշարը, Արամ Աբրահամյանը վարել է տարբեր երաժշտական հաղորդումներ:

«Միշտ երազել եմ հեռուստատեսությունում աշխատել,- ասում է նա: - Երբ 1983-ին առաջին անգամ եկա հեռուստատեսություն, հասկացա, որ դա իմ աշխարհն է, և միշտ երազել եմ աշխատել այնտեղ»:

Նա ասում է, որ «Առավոտ ԹիՎի»-ում իր նպատակն է ստեղծել այնպիսի մի ընկերություն, որը կբավարարի հավաստի տեղեկատվության հասարակության պահանջը:

«Հեռուստաընկերության ստրատեգիական նպատակն է լինել լրատվական-հասարակական ալիք, ինչպիսին է «Ազատություն» ռադիոկայանը»,- ասում է Աբրահամյանը:


According to Agnes
 

  Inside
 

Fruitful Partnership: Armenia Tree Project helps villages to put down roots of economic recovery

Full story

 
 

Crackdown on Crackdown: Council of Europe scolds Armenia

Full story

 


 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Tanets!

Honored Artist of Russia Nadezhda Babkina was among performers during Russian Cultural Days this week in Armenia.

 

 



Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.