Այս շաբաթ Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի օրակարգում, Կոսովոյի և Կիպրոսի խնդիրների հետ, ընդգրկվել էր Հայաստանի ներքաղաքական իրավիճակի քննարկումը:
Քննարկման արդյունքում ընդունվեց մի բանաձև, որը հանդիմանում է Հայաստանի իշխանություններին ընդդիմադիր ցուցարարների վրա ոստիկանության հարձակումների համար և սպառնում է կիրառել Եվրախորհրդի պատժամիջոցները, եթե իշխանությունների վարքը հակասի խորհրդի նախորդ հանձնարարականների «տառին և ոգուն»:
Բանաձևը պահանջում է իշխանություններից ազատ արձակել անցյալ ամիս քաղաքական բողոքի ցույցերի ժամանակ կալանված քաղաքացիներին և վերացնել զանգվածային հանրահավաքների վրա դրված արգելքները:
ԵԽԽՎ-ի հանձնաժողովը (որը հետևում է իրավիճակին 45 անդամ պետություններում) մինչև սեպտեմբեր ժամանակ է տվել հայաստանյան իշխանություններին այլ պահանջների հետ միասին «ապահովել Հայաստանում քաղաքացիների ազատ տեղաշարժվելու իրավունքը»:
Եվրոպայի խորհուրդը պատժամիջոցներ կկիրառի Հայաստանի նկատմամբ, եթե հինգ ամսվա ընթացքում զգալիորեն չբարելավվեն մարդու իրավունքերի և այլ հարցեր:
Վեհաժողվն իր զեկուցման մեջ անդրադարձել է վստահության հանրաքվեի և նախագահի հրաժարականի վերաբերյալ պահանջներին:
«Պնդելով, որ Հայաստանի իշխանությունները պետք է լիովին կատարեն անցյալ տարվա ընտրություններին վերաբերող հանձնարարականները, վեհաժողովը կարծում է, որ ընդդիմությունը, լիովին վայելելով խաղաղ հավաքների իրավունքը, պետք է ձգտի իր նպատակներին հասնել սահմանադրության շրջանակներում»:
Վեհաժողովը նաև կոչ է արել ընդդիմությանն ու իշխանությանը «զերծ մնալ որևէ գործողությունից, որը կարող է հանգեցնել հետագա բռնությունների, և առանց նախապայմանների սկսել երկխոսություն»:
Այս շաբաթ ընդդիմադիրները, արձագանքելով Ազգային ժողովի նախագահ Արթուր Բաղդասարյանի նախաձեռնությանը, երկուշաբթի և երեքշաբթի օրերին «քաղաքական խորհրդակցություններ» սկսեցին, սակայն դրանք շատ արագ ընդհատվեցին:
«Արդարություն» խմբակցության պատգամավորներ Վիկտոր Դալլաքյանը և Արշակ Սադոյանը հայտարարեցին, որ դադարեցնում են մասնակցությունը, քանի որ արդեն իսկ խախտվել են իրենց ներկայացրած 10 պահանջ առաջարկություններից երկուսը:
Նախ, իշխանությունները շարունակում են ոտնահարել սահմանադրությամբ երաշխավորված ՀՀ քաղաքացիների՝ ազատ տեղաշարժվելու իրավունքը (ըստ ընդդիմադիրների, հանրահավաքից առաջ ոստիկանությունը փակել էր մարզերից Երևան եկող ճանապարհները):
Եվ երկրորդ, հակառակ ընդդիմության պահանջին՝ «Հանրահավաքների, ցույցերի և երթերի անցկացման մասին» օրինագծի քննարկումը հետաձգել մինչև խորհրդարան իրենց վերադարձը, այն դրվել է քվեարկության և ընդունվել երկրորդ ընթերցմամբ:
Այս շաբաթվա սկզբին պաշտպանության նախարար Սերժ Սարգսյանը չհամաձայնեց, որ Հայաստանում քաղաքական հետապնդումներ են իրականացվում:
«Ես համարում եմ, որ չկան քաղաքական հետապնդումներ, որ բոլոր խոսակցությունները ճանապարհները փակելու և այլնի մասին ստեր են և իրենց անգործությունն արդարացնելու միջոց»,- ասաց նախարարը լրագրողներին:
Լրագրողներից մեկի այն պնդմանը, թե ինքն անձամբ է ականատես եղել ճանապարհները փակելու փաստերին, նախարարն ասաց, որ իշխանությունները պարզապես «ստուգել են» և ոչ թե «փակել» ճանապարհները:
«Դա ոստիկանության պարտականությունն է,- ասել է Սարգսյանը: - Երբ ագրեսիվ քաղաքական ուժերն ասում են, որ բռնությամբ իշխանություն են փոխելու, ոստիկանությունն ուղղակի պարտավոր է ստուգումներ անել»:
Հինգշաբթի օրը Եվրոպայի անվտանգության և համագործակցության կազմակերպությունը մտահոգություն հայտնեց ընդդիմության կողմնակիցների և առաջնորդների վրա վերջերս իրականացված հարձակումների պատասխանատուների բացահայտման գործում «առաջընթացի տագնապահարույց բացակայության» կապակցությամբ:
«Անհրաժեշտ է անցկացնել այս միջադեպերի շտապ, արդյունավետ և արդար հետաքննություն: Մեղավորները պետք է ենթարկվեն պատասխանատվության օրենքի համաձայն»,- ասված է ԵԱՀԿ երևանյան գրասենյակի ղեկավար Վլադիմիր Պրյախինի` արտգործնախարար Վարդան Օսկանյանին ուղղված նամակում:
(Հոդվածում օգտագործվել են նաև տեղեկություններ www.armenialiberty.org-ից): |