ArmeniaNow.com - Independent Journalism From Today's Armenia
April 30, 2004




Մարգարյանի սպանությունը. նախաքննությունը մոտենում է ավարտին

Գուրգեն Մարգարյանի իրավահաջորդի շահերի պաշտպանը վերադարձել է Բուդապեշտից, ուր մեկնել էր Մարգարյանի սպանության մեջ ամբաստանվող ադրբեջանցի սպայի դեմ հարուցված գործին ծանոթանալու նպատակով:

Նազելի Վարդանյանը և Տիգրան Ջանոյանը

Հայաստանի փաստաբանների միջազգային միության անդամ Նազելի Վարդանյանը հանդիպումներ է ունեցել հունգար գործընկեր Գաբրիելա Գասպարի հետ նախաքննության մանրամասների հետ ծանոթանալու նպատակով:

Վարդանյանը ներկայացնում է Մարգարյանի իրավահաջորդի շահերը: Հայ սպա Գուրգեն Մարգարյանը դաժանաբար սպանվել է փետրվարի 19-ին Բուդապեշտում, ՆԱՏՕ-ի «Համագործակցություն հանուն խաղաղության» ծրագրի վերապատրաստման դասընթացներին մասնակցելիս: Վարդանյանը ներկայացնում է նաև այս գործով տուժող ճանաչված երկրորդ հայ սպային՝ Հայկ Մակուչյանին:

Ակնկալվում է, որ գործի նախաքննությունը կավարտվի 2-3 շաբաթից: ՆԱՏՕ-ի նույն ծրագրի մասնակից երկու ադրբեջանցի սպաներից մեկը՝ ավագ լեյտենանտ Ռամիլ Սաֆարովը, մեղադրվում է Մարգարյանին քնած վիճակում կացնահարելու միջոցով սպանելու և Մակուչյանի նկատմամբ մահափորձի մեջ:

Նազելի Վարդանյանը իրավաբանական կրթություն է ստացել Երևանում, ապա ավարտել է Ռուսաստանի գիտությունների ակադեմիայի պետության և իրավունքի ասպիրանտուրան Մոսկվայում և Հայաստանի ամերիկյան համալսարանը: Վարդանյանը միջազգային իրավունքի մասնագետ է և տիրապետում է անգլերենին ու գերմաներենին, ինչը շատ կարևոր է առաջիկա դատավարության առումով:

Վարդանյանին իրավական աջակցություն ցուցաբերող միության ղեկավար Տիգրան Ջանոյանն արձանագրում է, որ ենթադրվում է, թե Սաֆարովը սպանել է Գուրգեն Մարգարյանին, ապա փորձել է ներխուժել Մակուչյանի սենյակ: Նախաքննության տվյալներով, դռան փականի շրջանում հայտնաբերվել են կտրող գործիքի հետքեր: Ադրբեջանցի սպան նաև փորձել է սենյակից դուրս կանչել Մակուչյանին:

«Երկուսն էլ տուժող են ճանաչվել և ամենակարևորը՝ հանցագործությունն ուղղված է եղել միայն հայազգի քաղաքացիների դեմ, այսինքն՝ որպես սպանության շարժառիթ ծառայել է ազգային հատկանիշը՝ հայ լինելու հանգամանքը»,- ասում է Ջանոյանը:

Ադրբեջանական կողմը դեպքից անմիջապես հետո փորձում էր կատարվածը ներկայացնել իբրև կենցաղային միջադեպ: «Սակայն պետք է ասել, որ քննությունը մինչև օրս չի կարողացել ստանալ որևէ տեղեկություն այն մասին, թե ադրբեջանցի և հայ սպաների միջև տեղի է ունեցել կոնֆլիկտ կամ հակակրանքի ցուցադրում»,- նշում է Ջանոյանը:

Փաստաբանի կարծիքով ադրբեջանական կողմը երկակի խաղ է խաղում՝ փորձելով ոճրագործին ազգային հերոս դարձնել՝ զարգացնելով Լեռնային Ղարաբաղի պատերազմի ժամանակ Խոջալուում զոհվածների համար վրեժխնդրության վարկածը:

«Այս հակասությունն ակնհայտ է նաև հունգարական իշխանությունների, մասնավորապես՝ նախաքննական մարմնի համար: Եթե փորձեն դատավարությունը քաղաքական շոուի վերածել, կարծում եմ, մենք նույնպես պատրաստ կլինենք ներկայացնել Խոջալուի դեպքերի իրականությունը»,- ասում է Ջանոյանը՝ ընդգծելով, որ առայժմ հայկական կողմն իրավական դաշտից դուրս գալու մտադրություն չունի:

Ջանոյանի հավաստմամբ քննությունը պարզել է, որ «հանցագործության գործիք ճանաչված կացինը ձեռք է բերվել նախօրոք, դեպքից մոտ 2 շաբաթ առաջ, Բուդապեշտում»:

ՆԱՏՕ-ի ծրագրի մասնակից երկրորդ ադրբեջանցի սպայի ցուցմունքների համաձայն, Սաֆարովը կացինը «ձեռք է բերել որպես հուշանվեր՝ հոր համար»: Ջանոյանը կասկած է հայտնում, թե որքանով էր այդ հսկայական գործիքը (կտրող մասի չափերը՝ 17 X 12 սմ, երկարությունը՝ 65 սմ) իսկապես «լավագույն հուշանվեր՝ Հունգարիայից Հարավային Կովկաս հասցնելու համար»:

«Սաֆարովը նախապես պլանավորել է հայ սպաների նկատմամբ դաժան հանցագործությունը, ձեռք բերել հանցագործության գործիք, ընտրել ուսումնական կորպուսի բնակելի հատված և հետևողականորեն իրականացրել հանցագործությունը: Երկրորդ հայ սպայի սպանությունը տեղի չի ունեցել հանցագործի կամքից անկախ հանգամանքներում»,- պնդում է Ջանոյանը:

Հանցագործության վայրը մանրակրկիտ զննվել է, արձանագրվել են արյան հետքերը, որ հանցագործը ենթադրաբար թողել է Մակուչյանի սենյակը որոնելիս:

Հունգարական օրենսդրությունը սպանության համար նախատեսում է 10-15 տարի կամ ցմահ ազատազրկում: Դատարանը դեռ պետք է որոշի, դատավարությունը դռնփակ է լինելու, թե՝ ոչ: Դատապարտվելու դեպքում բացառված չէ, որ Սաֆարովը պատիժը կրելու համար տեղափոխվի հայրենիք:

«Ադրբեջանը և Հունգարիան ստորագրել են դատապարտյալների հանձնման կոնվենցիան, բայց դա պարտադիր հանձնում չի ենթադրում: Հունգարական կողմը պետք է որոշի՝ հանձնել, թե ոչ,- աում է Վարդանյանը: - Հունգարիան պատրաստվում է միանալ Եվրամիությանը մայիսի 1-ին, և չեմ կարծում, թե դատարանի վրա որևէ ճնշում լինի, քանի որ նրանք ուզում են ապացուցել աշխարհին, որ պատրաստ են անդամագրվելու այս կառույցին: Մենք էլ պասիվ չենք այդ առումով, որպեսզի թույլ տանք ճնշում իրականացվի»:


According to Agnes
 

  Inside
 

Fruitful Partnership: Armenia Tree Project helps villages to put down roots of economic recovery

Full story

 
 

Crackdown on Crackdown: Council of Europe scolds Armenia

Full story

 


 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Tanets!

Honored Artist of Russia Nadezhda Babkina was among performers during Russian Cultural Days this week in Armenia.

 

 



Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.