Ուկրաինայի մայրաքաղաք Կիևում մինչև ապրիլի 26-ը կայանում են Եվրոպայի ծանրամարտի տղամարդկանց 83-րդ և կանանց 17-րդ առաջնությունները: 32 երկրների 130 մարզիկների հետ առաջնություններին մասնակցում են նաև Հայաստանի յոթ ծանրամարտիկներ:
Կանանց առաջնությունում Հայաստանը ներկայացնում էր 17-ամյա Հռիփսիմե Խուրշուդյանը, որն ավարտել է իր ելույթները 63 կգ քաշային կարգում: Մրցելով 14 այլ մարզուհիների հետ` Հռիփսիմեն գրավեց 6-րդ տեղը 200 կգ արդյունքով (90 կգ պոկում և 110 կգ հրում վարժություններում):
Այս քաշային կարգում առաջին տեղը բաժին հասավ բուլղարուհի Գերգանա Կիրիլովային (227,5 կգ):
Ներկայում Խուրշուդյանը 63 կգ քաշային կարգում աշխարհի 131 ծանրամարտիկների մեջ գրավում է 34-րդ տեղը:
Հայաստանի տղամարդկանց թիմը ներկայացված է վեց ծանրամարտիկներով: Նրանցից երկուսն արդեն ավարտել են իրենց ելույթները 69 կգ քաշային կարգում:
Քսանամյա Արթուր Դանիելյանը (42-րդ տեղը գործակիցների համաշխարհային աղյուսակում) բարձրացրեց 300 կգ (130 կգ պոկում և 170 կգ հրում վարժություններում) և գրավեց 11-րդ տեղը: 22-ամյա Արմեն Ղազարյանը նույն քաշային կարգում 14-րդն էր:
Այս քաշային կարգում ոսկե մեդալ շահեց թուրք Էքրեմ Չելիլը 337,5 կգ արդյունքով:
Մյուս չորս հայ ծանրամարտիկները դեռ մրցահարթակ դուրս չեն եկել: |
Copyright