Ապրիլը Հայաստանում հայտարարվել է տղամարդկանց առողջության պահպանման միամսյակ: Տղամարդիկ հնարավորություն կստանան շագանակագեղձի հետազոտության ենթարկվել, «Արմենիա» հանրապետական բժշկական կենտրոնում (ՀԲԿ) կկատարվեն անվճար սոնոգրաֆիկ հետազոտություններ:

Կենտրոնն այս ամիս անվճար հետազոտություններ է առաջարկում տղամարդկանց

«Նպատակը մեկն է՝ ավելի մեծ ուշադրություն և որակյալ բուժօգնություն ցույց տալ տղամարդկանց առողջությանը»,- ասում է «Արմենիա» ՀԲԿ-ի ուրոլոգիայի կենտրոնի ղեկավար Արմեն Մուրադյանը:

Նա ասում է, որ կանանց առողջության նկատմամբ ուշադրությունը միշտ էլ ավելի մեծ է եղել, և այսօր Հայաստանում չկա տղամարդկանց առողջությամբ զբաղվող որևէ կենտրոն:

«Սա միայն մեր պետության խնդիրը չէ, այլ ամբողջ աշխարհի: Կրծքագեղձի քաղցկեղը, որ կանանց մոտ ամենահաճախ հանդիպող հիվանդությունն է, և տղամարդկանց շագանակագեղձի քաղցկեղը նույն հաճախականությամբ են դիտվում,- նշում է Մուրադյանը: - Մահացության աստիճանը գրեթե հավասար է, հիվանդությունների պատճառները գրեթե նույնն են»:

Մուրադյանի հավաստմամբ՝ կան բազմաթիվ մասնավոր և հասարակական կազմակերպություններ, որոնց մշակած ծրագրերը թույլ են տալիս վաղ շրջանում հայտնաբերել այս հիվանդությունը: Սակայն միջոցների բացակայության պատճառով այդ ծրագրերը ցանկալի արդյունք չեն ապահովում:

Ապրիլյան ակցիան նախաձեռնել են «Արմենիա» ՀԲԿ-ի ուրոլոգիայի կենտրոնը, ախտորոշիչ բաժանմունքը և Երևանի պետական բժշկական համալսարանի ուրոլոգիայի ամբիոնը:

«Որոշել էինք ակցիան իրականացնել մեր ուժերով, սակայն երբ առողջապահության նախարարը ծանոթացավ ծրագրին, խոստացավ աջակցել: Մեզ միանալու պատրաստակամություն են հայտնել նաև հանրապետության մյուս բուժկենտրոնները, և այսպիսով միջոցառումը հանրապետական բնույթ կունենա»,- ասում է Մուրադյանը:

Մուրադյանը հուսով է, որ տղամարդիկ կգնան հետազոտության մինչև բուժման կարիք ունենալը

Կենտրոնը կսպասարկի հիմնականում 40-45 տարեկան տղամարդկանց: Արդյունքները կգրանցվեն կոմպակտ սկավառակների վրա, ինչը նորություն է Հայաստանում:

«Իհարկե, ցանկալի կլինի, որ մեր բոլոր քաղաքացիներն էլեկտրոնային անձնագրեր ունենան մոր հղիանալու պահից»,- ասում է Մուրադյանը՝ ավելացնելով, որ սա առողջության բանկ ստեղծելու առաջին քայլն է:

Շագանակագեղձի հետազոտության արժեքը 10000 դրամ է (մոտ 18 դոլար): Մինչև ապրիլի վերջ այդ ծառայությունն անվճար կմատուցվի:

Հետազոտությունների ընթացքում բացահայտված առավել ռիսկի խմբի հիվանդները կառանձնացվեն հետագա բուժման համար:

Մասնագետի հավաստմամբ՝ այս տարիքային հիվանդության դեպքում մարդը կարող է գանգատներ չունենալ, իսկ երբ դրանք ի հայտ են գալիս, արդեն շատ ուշ է լինում բուժման համար:

«Ծրագրի նպատակներից մեկն էլ հենց մարդկանց հետազոտվելու հնարավորություն տալն է, երբ նրանք դեռ գանգատ չունեն»,- բացատրում է Մուրադյանը:

Մուրադյանը համոզված է, որ ծրագրի հաջողությունը մեծապես կախված կլինի կանանցից, քանի որ հենց նրանք պետք է քաջալերեն տղամարդկանց հետազոտվել: