ArmeniaNow.com - Independent Journalism From Today's Armenia
April 02, 2004




Ծեծի են ենթարկել իրավապաշտպանի. հարձակումը համընկնում է ընդդիմության հակաիշխանական քարոզարշավի մեկնարկի հետ

Հայտնի հայաստանյան իրավապաշտպանը շարունակում է մնալ հիվանդանոցում. երեքշաբթի առավոտյան նա Երևանում ենթարկվել է հարձակման և ստացել է մարմնական վնասվածքներ:

Դանիելյանը

Վիեննայում տեղակայված Հելսինկյան ընկերակցության հայաստանյան գրասենյակի նախագահ 45-ամյա Միքայել Դանիելյանը ենթարկվել է չորս անհայտ անձանց հարձակմանը Փափազյան փողոցի վրա գտնվող իր տան մոտակայքում, երբ զբոսանքի է հանել իր շանը: Հարձակվողները հետևից հարվածել և գետնին են գցել Դանիելյանին, ապա սկսել են ոտքով հարվածներ հասցնել նրան, մինչև վերջինս կորցրել է գիտակցությունը:

Դանիելյանին հասցրել են հանրապետական հիվանդանոց, որի նյարդավիրաբուժական բաժանմունքի բժիշկ Պետրոս Բաբայանի հավաստմամբ Դանիելյանի վիճակն «ընդհանուր առմամբ կայուն է»:

Ըստ բժշկի Դանիելյանն ուղեղի ցնցում չի տարել, սակայն վտանգավորության աստիճանի բարձր է նրա արյան ճնշումը, ինչը բժիշկների կարծիքով կարող է հանգեցնել կաթվածի:

Երևանի ոստիկանությունը քրեական գործ է հարուցել միջադեպի կապակցությամբ, սակայն առայժմ կասկածյալներ չկան: Քննիչները հանդիպել են Դանիելյանին հինգշաբթի օրը:

Դանիելյանը, որը Հայաստանի ամենաակտիվ իրավապաշտպաններից մեկն է, կարծում է, որ հարձակումը ծրագրել և իրականացրել են իշխանությունները՝ ի պատասխան Հայաստանում պաշտոնատար անձանց կողմից մարդու իրավունքների ոտնահարման դեմ իր քննադատական ելույթներին: Իր դեմ կիրառված բռնարարքը նա որակել է որպես «պետական ահաբեկչություն» և ասում է, որ իշխանությունների մտադրությունը եղել է իրեն վախեցնելը:

«Իշխանությունները հարյուրավոր պատճառներ կարող էին ունենալ ինձ վրա հարձակում կազմակերպելու համար, - ասում է Դանիելյանը: - Ես հետաքննում եմ շատ հանցագործություններ, պաշտպանում եմ մարդկանց, որոնց հետապնդում են իշխանությունները, զեկույցներ եմ պատրաստում մի շարք արևմտյան իրավապաշտպան կազմակերպությունների համար»:

Դանիելյանն ասում է, որ դեռևս պարզ չէ, թե իր գործունեության, վերջին հրապարակումների կամ հայտարարությունների մեջ կոնկրետ ինչը կարող էր հրահրել հարձակումը, մինչդեռ տեղի լրատվամիջոցներն առաջ են քաշում հետևյալ վարկածները:

Ոմանք կարծիք են հայտնում, որ հարձակումը Դանիելյանի վրա ադրբեջանական «Էխո» թերթին նրա տված հարցազրույցի հետևանքն է. թերթում Դանիելյանը քննադատել է նախագահ Ռոբերտ Քոչարյանին և պաշտպանության նախարար Սերժ Սարգսյանին վերջին շաբաթներին ակտիվացած ընդդիմադիր շարժումը կասեցնելուն ուղղված նրանց ձեռնարկած միջոցների համար:

Պատասխանելով ադրբեջանական թերթի այն հարցին, արդյոք Հայաստանի զինված ուժերի զորավարժությունները նշանակում են, որ Հայաստանը պատրաստվում է Ադրբեջանի հետ պատերազմի՝ Դանիելյանը ըստ թերթի ասել է. «Կարծում եմ, որ զորավարժությունները կապված են ընդդիմության հանրահավաքների և բողոքի ակցիաների հետ: Սակայն եթե Քոչարյանը տեսնի, որ ձեռնարկած կոշտ մեթոդները չեն օգնում, նա կարող է ընդդիմությանը լռեցնելու համար դիմել այդ քայլին (պատերազմ սկսել)»:

Որոշ լրագրողներ այն կարծիքին են, որ իշխանությունները կազմակերպել են հարձակումը, որպեսզի գոնե ժամանկավորապես դադարեցնեն Դանիելյանի իրավապաշտպան գործունեությունը, երբ իրենք սկսեն ընդդիմության ակտիվիստների զանգվածային ձերբակալությունները:

Ընդդիմադիր կուսակցությունների մի քանի անդամներ արդեն ձերբակալվել են անցյալ շաբաթ Գյումրիի հանրահավաքում տեղի ունեցած անկարգություններից հետո:

Դանիելյանն ասում է, որ չի բացառում է, որ ծեծի նպատակը եղել է իրեն լռեցնելը: Դանիելյանի կնոջ՝ Աննա Հակոբյանի համոզմունքով իր ամուսնու գործունեությունը անհանգստացնում է իշխանություններին, և նրան ծեծի են ենթարկել մարդու իրավունքների պաշտպանության ոլորտում իշխանությունների գործունեության քննադատության համար:

«Ես կանխատեսում էի, որ նման մի բան կարող է կատարվել», ասում է Հակոբյանը, որը Լոնդոնում տեղակայված «Փ.Է.Ն.» կազմակերպության հայաստանյան գրասենյակի տնօրենն է:

«Իշխանամետ լրատվամիջոցները վերջերս ուժեղացրել էին իրենց կեղտոտ հարձակումները Միքայելի վրա: Ելնելով դրանից կարելի է գուշակել իշխանությունների վերաբերմունքը Դանիելյանի նկատմամբ»:

Աննա Հակոբյանը

Հակոբյանը վերհիշում է 2002 թվականի հարձակումը լրագրող Մարկ Գրիգորյանի վրա, որը լուրջ մարմնական վնասվածքներ էր ստացել ինքնաշեն ռումբից պայթյունից: Ոմանք կարծիք են հայտնում, որ այդ հարձակումը պատասխան էր Գրիգորյանի գրած ոչ իշխանամետ հոդվածներին: Միջադեպի կապակցությամբ ոչ ոք չձերբակալվեց, իսկ Գրիգորյանը դեպքից որոշ ժամանակ անց մեկնեց արտասահման:

«Դանիելյանը դարձավ իշխանությունների անողորմածության ևս մեկ զոհը, - ասում է Հակոբյանը: - Քանի՞ հոգի պիտի տուժի, որ պարզ դառնա, որ այս ամենը պատվիրված է»:

Նախագահ Քոչարյանը հանձնարարել է գլխավոր դատախազին ուսումնասիրել միջադեպի բոլոր հանգամանքները և ձեռնարկել բոլոր միջոցները մեղավորներին բացահայտելու համար:

Իսկ այդ ընթացքում մի շարք լրատվական կազմակերպություններ հանդես են եկել Դանիելյանի վրա կատարված հարձակումը դատապարտող հայտարարությամբ:

«Մենք գտնում ենք, որ նման բռնարարքները հանրապետությունում տիրող անհանդուրժողականության մթնոլորտի հետևանքն են, - ասված է հայտարության մեջ: - Մենք հուսով ենք, որ իրավապահ մարմինները կխախտեն վերջին տարիների տխուր ավանդույթը և կգտնեն հանցագործության կատարողներին, քանի որ միայն հանցագործների պատիժը կարող է կանխել հետագա բռնությունները»:


According to Agnes
 

 


The Week in seven days

 
 


The Arts in seven days

 

  Photo of the week
 
Click on the photo above to enlarge.
 
 
 
 

Two Years Minus
A1-Plus

Today (April 2) was marked as the two-year anniversary of television station A1-Plus being removed from the airwaves in Armenia. The oppositional station has been denied a license despite repeated bids, and is seen by many as evidence of government suppression. It has continued its news service at www.a1plus.am

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.