Թենիս (ՊԹԱ մարցաշար)

ê³ñ·ëÛ³ÝÁ ÏñÏÇÝ »½ñ³÷³ÏÇãáõÙ ¿ñ.

Սարգիս Սարգսյանը դուրս էր եկել հոկտեմբերի 20-26-ը տեղի ունեցած Սանկտ-Պետերբուրգի բաց առաջնության (Միջազգային շարք) եզրափակիչ:

Եզրափակիչ խաղը Սարգսյանը 4-6, 3-6 հաշվով տանուլ տվեց երրորդ համարի տակ ցանված բրազիլացի ¶ուստավո Կուերտենին, որը շահեց իր 19-րդ մրցաշարը:

Սանկտ-Պետերբուրգի մրցաշարում անցկացրած չորս խաղերի ընթացքում Սարգսյանը շատ երկրպագուներ ուներ, քանի որ այստեղ մեծ հայկական գաղութ կա:

Խաղալով ծածկի տակ՝ Սարգսյանը պարտության մատնեց չեխ Ռադեկ Ստեպանեկին՝ 6-3, 6-2, հետո, նույն հաշվով՝ ռուսաստանցի Իգոր Անդրեևին:

Քառորդ եզրափակիչում Երևանում ծնված թենիսիստը 6-3, 6-1 հաշվով հաղթեց գերմանացի Լարս Բուրգսմյուլլերին: Կիսաեզրափակիչում նրա դեմ դուրս եկավ մեկ այլ գերմանացի՝ Ռայներ Շուտլերը, որը ՊԹԱ-ի աղյուսակում 6-րդ տեղում է:

Դա դժվար խաղ էր Սարգսյանի համար, քանի որ Շուտլերը ներկայումս աշխարհի ուժեղագույն թենիսիստներից է: Սակայն Սարգսյանը կարողացավ հաղթող դուրս գալ այդ մենամարտից՝ 6-3, 6-3, մասամբ նաև իր երկրպագուների ուժեղ աջակցության շնորհիվ, որոնց խանդավառ բացականչությունները թույլ չէին տալիս գերմանացուն կենտրոնանալ խաղի վրա:

ՊԹԱ մրցաշարը մոտենում է իր ավարտին: Եզրափակիչ մրցաշարը՝ Վարպետների գավաթի խաղարկությունը, կանցնի ԱՄՆ-ի Հյուսթոն քաղաքում, որին կմասնակցեն ութ լավագույն թենիսիստները: Սարգսյանը ներկայումս 26 մրցաշարերում վաստակած 187 միավորով զբաղեցնում է 39-րդ տեղը (հավանաբար դա կլինի նրա վերջնական արդյունքը):

Անցյալ տարի նա գրավել էր 85-րդ տեղը: 2003 թվականին Սարգսյանը երկու անգամ դուրս է եկել եզրափակիչ (Մոսկվայում և Սանկտ-Պետերբուրգում) և չորս անգամ՝ քառորդ եզրափակիչ (Չենայում, Բուխարեստում, Վրոցլավում և Վալենսիայում): Այս տարի մենախաղերում նա տոնել է 28 հաղթանակ և կրել է 26 պարտություն՝ վաստակելով 530664 դոլար մրցանակային գումար:

Սարգսյանի նման արգենտինահայ Դավիդ Նալբանդյանն էլ երկրորդ տեղը գրավեց Միջազգային շարքի մեկ այլ՝ Բազելի մրցաշարում, որն անցավ Շվեյցարիայում հոկտեմբերի 21-26-ը:

Նալբանդյանը, որը պաշտպանում էր մրցաշարի 2002 թվականի հաղթողի իր տիտղոսը, ձախ ձեռքի դաստակի վնասվածքի պատճառով չկարողացավ հանդես գալ իր համերկրացի, երրորդ համարի տակ ցանված ¶իլյերմո Կորիայի դեմ եզրափակիչ խաղում: Եվ Կորիան հաղթող հռչակվեց:

Եզրափակիչ հասնելու ճանապարհին Նալբանդյանը քառորդ եզրափակիչում հաղթել էր բրիտանացի Թիմ Հենմանին (6-2, 6-4): Կիսաեզրափակիչում նա առավելության էր հասել առաջին համարի տակ ցանված ամերիկացի Էնդի Ռոդիկի նկատմամբ (7-5, 7-5), սակայն հենց այդ խաղում էլ նա դաստակի վնասվածք էր ստացել, որը զրկեց նրան եզրափակիչին մասնակցելու հնարավորությունից:

Նալբանդյանը ներկայումս ՊԹԱ աղյուսակում գրավում է ութերորդը տեղը և ապահովել է իր մասնակցությունը Վարպետների գավաթի խաղարկությանը: Այս տարի մենախաղերում նա տարել է 41 հաղթանակ, կրել է 18 պարտություն և վաստակել է 1070000 դոլար մրցանակային գումար: