Լոռու մարզի դպրոցները այս շաբաթ փակվել են: Պատճառը էպիդեմիկ պարոտիտի բռնկումն է (ժողովրդի մեջ առավել հայտնի է «խոզուկ» անունով): Այս մանկական վարակիչ հիվանդությամբ վարակվել են ավելի քան 200 երեխաներ Վանաձորի, Սպիտակի և Ստեփանավանի տարածաշրջաններում:

«Տարվա կտրվածքով Լոռու մարզում արձանագրվել է հիվանդության 520 դեպք, - ասում է Լոռու մարզային հիգիենիկ և հակահամաճարակային վարչության պետ Կարինե Միրզոյանը, - սակայն հիվանդության կտրուկ աճում գրանցվեց հոկտեմբեր ամսին, ինչը մի քանի պատճառ ունի»:

Խոզուկը միտում ունի տարածվելու աշնան վերջում, սակայն վերջին բռնկման պատճառը Միրզոյանի հավաստմամբ պատվաստումների բացակայությունն է:

Համաճարակաբանները պնդում են, որ վերջին տարիներին կանոնավոր պատվաստումներ են կատարվել, սակայն Միրզոյանն այլ տեսակետ ունի:

«Այս հիվանդության հանդեպ առավել խոցելի են դպրոցահասակ երեխաները, որոնց իմունային համակարգը ավելի փխրուն է, - ասում է Միրզոյանը: - Հիվանդության կանխարգելման համար պետք է պարբերաբար պատվաստումներ կատարվեն, սակայն 4-5 տարի առաջ հանրապետությունում պարոտիտի պատվաստանյութի խիստ պակաս էր նկատվում, որի հետևանքով էլ երեխաների զգալի մասը չի պատվաստվել: Արդյունքն էլ սա է»:

Առողջապահության նախարարության հիգիենիկ և հակահամաճարակային հսկողության վարչության պետի տեղակալ Ղազարոս Հակոբյանի հավաստմամբ պատճառը երեխաների իմունային համակարգի թուլությունն է և հիվանդության հանդեպ ընկալունակությունը:

«Անկախ ամեն ինչից պարոտիտը 4-6 տարին մեկ գլուխ է բարձրացնում, - ասում է նա: - Կան երեխաներ, որոնք պատվաստում ստացել են, սակայն կրկին վարակվել են այս հիվանդությամբ»:

Կարինե Միրզոյանն ասում է, որ պարոտիտը վտանգավոր հիվանդություն է, և բուժաշխատողները լուրջ աշխատանք են տանում հիվանդներին հայտնաբերելու և մեկուսացնելու համար:

«Էպիդեմիկ պարոտիտը հետագայում տղաների մոտ կարող է հանգեցնել բարդությունների՝ մենինգիտի, ամլության, իսկ աղջիկների մոտ՝ սեռական խանգարումների, - ասում է Միրզոյանը, - ուստի կարևոր է ժամանակին բուժել հիվանդությունը՝ միաժամանակ կանխելով դրա տարածումը: