Ֆուտբոլ

Իր երկօրյա այցը սկսելուց առաջ Յոզեֆ Զեպպ Բլատտերն արժանացավ ավանդական ընդունելության:

ՖԻՖԱ-ի նախագահ Յոզեֆ Զեպպ Բլատտերը երեկ երկօրյա այցով ժամանեց Երևան մասնակցելու Մալաթիայի մարզադաշտի վերաբացման արարողությանը:

ՖԻՖԱ-ի «Գոլ» ծրագիրը 400000 դոլար է հատկացրել մարզադաշտի վերակառուցմանը:

Իր այցի ընթացքում Բլատտերը նաև հանդիպումներ է ունենալու նախագահ Ռոբերտ Քոչարյանի և վարչապետ Անդրանիկ Մարգարյանի հետ:

Հայաստանի սեղանի թենիսիստները մեկնեցին Ֆրանսիա, որպեսզի աշխարհի 117 երկրների մարզիկների հետ միասին մայիսի 19-25-ը մասնակցեն Փարիզում կայանալիք սեղանի թենիսի աշխարհի 47-րդ անհատական առաջնությանը:

Հայաստանը ներկայացնում են Մեսրոպ Ղուկասյանը (855-րդ տեղ), Մուրադ Ասատրյանը (854-րդ տեղ), Դավիթ Սարգսյանը (612-րդ տեղ) և կանանց մեջ 196-րդ ցուցանիշն ունեցող Աննա Պողոսյանը:

Պողոսյանը հայ թենիսիստներից միակն էր, որ կարողացավ անցնել մենախաղերի առաջին փուլը՝ հաղթելով 376-րդ ցուցանիշն ունեցող Անաստասիա Կուցովային Ուկրաինայից և Բոդովոահանգի Ռամանամբիտանային Մադագասկարից (639-րդ տեղ):

Երկրորդ փուլում Պողոսյանը տանուլ տվեց Լի Ջիա Վեյին Սինգապուրից:

Տղամարդկանց զուգախաղերում Սարգսյանը և Ղուկասյանը առաջին փուլում տանուլ տվեցին Ման Քուոնգ Վուին և Նամ Հայ Նգուենին Վիետնամից:

Խառը զուգախաղերում Պողոսյանը և Սարգսյանը զիջեցին Ռյուսուկե Սակամոտոյին և Սայակա Հիրանոյին Ճապոնիայից:

Հունա-հռոմեական ըմբշամարտ (Եվրոպայի առաջնություն)

Այսօր Բելգրադում (Սերբիա և Չեռնոգորիա) մեկնարկեց հունա-հռոմեական ըմբշամարտի Եվրոպայի 50-րդ առաջնությունը:

Յոթ քաշային կարգերում մրցանակների համար պայքարելու համար երեսուն եվրոպական երկրներից ժամանած 144 մարզիկների թվում են նաև վեց հայ ըմբիշներ: