Խմբակային մկրտությունը կազմակերպել էր «Օրինաց երկիր» կուսակցությունը:

Քահանան կանգնում է դեմքով դեպի հավատացյալները և տալիս է մի հարց, որը կապում է հայկական ավանդույթները Երևանի Սուրբ Զորավոր եկեղեցում անցկացվող ժամանակակից արարողությանը:

«Կնքահայրն ի՞նչ է խնդրում մկրտվողից»:

Ի պատասխան քավորները երեք անգամ կրկնում են. - «Հույս, հավատ, սեր և մկրտություն»:

Հայ Առաքելական եկեղեցու այս արարողությունը պարունակում է մեղքերից ազատվելու և հոգևոր վերածննդի խորհուրդը:

Մայիսի 6-ի երեքշաբթի օրը մկրտվեցին Էրեբունու համայնքի տարբեր տարիքի 40 երեխաներ, որոնցից 14-ը՝ Սուրբ Զորավոր եկեղեցում:

Երկամյա Գայանեն հուզմունքից ճչում է, երբ քահանան մոտեցնում է նրան ջրով լի ավազանին: Նրա մայրը՝ Մարինե Խաչատրյանը, եկեղեցի է բերել իր երեք երեխաներին: Այդ օրը մկրտվելու են նաև Գայանեի եղբայրները՝ իննամյա Պատվականը և ութամյա Դավիթը:

«Երբ մարդ մկրտվում է, անկախ տարիքից անդամագրվում է մեր եկեղեցուն ընդունելով նրա դավանաբանությունը», - ասում է Տեր Եղիշե քահանա Կարսյանը:

Երեխաների կնքահայրերն էին Գևորգ Գևորգյանը և Արմեն Կալիվանջյանը: Այդ օրվանից նրանց դերը կլինի ներկայացնել եկեղեցին իրենց սանիկների կյանքում: Կնքահայրերը պետք է լինեն այն հոգևոր դաստիարակները, որոնք հոգալով իրենց սանիկների մասին հոգևոր սնունդ են տալիս նրանց, որպեսզի նրանք մեծանան և դառնան ճշմարիտ քրիստոնյաներ:

«Երեխայի կնքահոր միջոցով փոխանցում ենք այն դավանաբանությունը, որի հիմքի վրա էլ նա դաստիարակվելու է: Կնքահայրը եկեղեցու վստահված անձն է», - ասում է Տեր Եղիշեն:

Մկրտությունը բաժանվում է երկու մասի՝ բուն մկրտություն և դրոշմ: Բուն մկրտության ժամանակ քահանան երեխային դեմքով դեպի արևելք պահած երեք անգամ ընկղմում է ջրի մեջ՝ ասելով. - «Հանուն հոր, որդու և սուրբ հոգու»:

Երեխաների մայրերը և ազգականները եկել են տեսնելու երեխաների մկրտության արարողությունը:

Տեր Եղիշեն բացատրում է. - «Ասել է, թե մկրտվում են Սուրբ երրորդության անունով: Երեք անգամ ջրի մեջ ընկղմվելը նշանակում է Քրիստոսի թաղումը և համբարձումը: Ջրի միջից ելնելով մկրտվողը նոր մարդ է դառնում՝ ամրանալով Քրիստոսի հարությամբ»:

Տասնհինգամյա Լիլիթ Առաքելյանն ափսոսում է, որ մինչև այժմ մկրտված չէր: «Ես ինձ նոր մարդ եմ զգում, հավատս էլ ասես ավելի զորացավ րոպեների ընթացքում»:

Օրհնված ջրով լվացվելուց հետո, տեր հայրը սրբալույս մյուռոնով դրոշմում է մկրտվողներին: Տեր Եղիշեն ասում է, որ դրոշմը Քրիստոսի խորհրդանիշն է, իսկ մյուռոնը՝ սուրբ հոգու:

«Տեր հայրը մյուռոնով օծեց ճակատս, ականջներս, աչքերս, բերանս, ձեռքերիս ափերը և ծնկներս: Հետո մեջքս և սիրտս: Ես գիտեմ, որ դա արվում է, որպեսզի ես ծառայեմ լավ ու բարի գործերին», - ասում է Լիլիթի եղբայրը՝ 11-ամյա Վահե Առաքելյանը:

Երեքշաբթի օրվա միջոցառումը կազմակերպել էր «Օրինաց երկիր» կուսակցությունը: Ըստ կուսակցության փոխնախագահ Գագիկ Մխեյանի, չորս տարվա ընթացքում կուսակցության ջանքերով ողջ հանրապետությունում մկրտվել են 50 հազար երեխաներ:

Կուսակցության Էրեբունու տարածքային կազմակերպության նախագահ Թամարա Իշխանյանն ասում է, որ այս տարի իրենց համայնքում արդեն մկրտվել են 120 հոգի և դեռ 40 հոգի էլ պետք է մկրտվեն:

Յուրաքանչյուր մկրտվող ստանում է մեկ գրամանոց ոսկյա խաչ:

Քահանան մյուռոն է քսում 14 երեխաներից մեկի այտերին:

«Մեր նպատակն է կանխել աղանդների տարածումը, - ասում է մանկավարժ Իշխանյանը, - իսկ մկրտվելով նրանք արդեն սկսում են գաղափար ունենալ Հայ Առաքելական եկեղեցու մասին: Անգամ դպրոցներում կան աղանդավոր ուսուցիչներ, որոնք շեղում են երեխաներին»:

Մկրտության վերջում տեր հայրն օրհնում է նարոտը (խաչի թելը) և վրան անցկացնում օրհնված խաչը: Այնուհետև կնքահայրն անցկացնում է այն մկրտվողի պարանոցին:

Տեր Եղիշեն ասում է. - «Նարոտը բաղկացած է սպիտակ և կարմիր թելերից: Խորհրդանշում է Քրիստոսի արյունը: Երբ նրան խաչի վրա ծակում են, սկզբում արյուն է գալիս, իսկ հետո՝ սպիտակ ջուր»:

Արարողության ավարտից հետո Սուրբ Զորավոր եկեղեցու բակը լցված է երեխաների աղմուկ-աղաղակով: Օծված Սուրբ մյուռոնով՝ բոլորի դեմքերը փայլում են: Մկրտվածների թվում է նաև երկու երեխաների մայր Լուսինե Մխիթարյանը: «Ճիշտ է մի փոքր ուշ է, բայց օգտվեցի առիթից ու ես էլ երեխաներիս հետ մկրտվեցի: Թվում է, հոգեպես մաքրվել եմ»:

Տեր հայրը հիշեցնում է, որ մկրտվածները երեք օր չպետք է լվացվեն և լողանան, քանզի օծված են մյուռոնով: Երրորդ օրը միայն քահանան օրհնած ջրով պետք է մաքրի մարմնի այն մասերը, որոնց մյուռոն է քսվել:

«Ջուրը, որով կմաքրվի մյուռոնը, անպատճառ պետք է մաքուր տեղ լցվի: Վերջապես մկրտվելով՝ մարդիկ սրբվում են մեղքերից, վերստին ծվում: Իսկ դրոշմը զորացնում է նրանց հոգիները, ուժ տալիս դիմակայելու կյանքի բոլոր դժվարություններին», - բացատրում է Տեր Եղիշեն: