Հայաստանի
հասարակայնությունը վրդովված է Ադրբեջանի տարածքում
գտնվող հայկական գերեզմանատների և պատմական հուշարձանների
նկատմամբ ադրբեջանական իշխանությունների ցուցաբերած
վերաբերմունքից:
Չորեքշաբթի օրը Հայաստանի ազգային ակադեմիայում
կայացած գիտաժողովի ժամանակ արտգործնախարար Վարդան
Օսկանյանը քննադատեց հայկական հուշարձանների, մասնավորապես՝
գերեզմանատների, շարունակական և սիստեմատիկ ոչնչացմանն
ուղղված Ադրբեջանի քաղաքականությունը:
Գիտաժողովը հրավիրել էին Հայաստանի ազգային ակադեմիան,
«Հայկական ճարտարապետության հետազոտություններ»
և «Երկիր և մշակույթ» կազմակերպությունները՝ Նախիջևանի
հարավում գտնվող Ջուղայի հին հայկական գերեզմանատան
խաչքարերի ոչնչացման կապակցությամբ:
Հայ պատմաբանները համարում են, որ Ջուղայի գերեզմանոցները
համաշխարհային մշակութային ժառանգության մասն են
կազմում՝ հաշվի առնելով այն հանգամանքը, որ Ջուղայի
տապանաքարերի մի մասը թվագրված են 9-րդ դարով:
17-րդ դարում Ջուղայում կար շուրջ 10 հազար խաչքար:
20-րդ դարի սկզբին այնտեղ պահպանվել էին շուրջ 5000
խաչքար, ինչպես նաև երեք եկեղեցի և մի մատուռ:
Այժմ Ջուղայում մնացել են միայն խաչքարերը, մյուս
հուշարձանները ոչնչացվել են:
Գերեզմանատունը ներկայումս փակ է այցելուների
համար: Լուսանկարիչ Զավեն Խաչատրյանը վերջին հայ
այցելուն էր, որ մի քանի տարի առաջ եղել է այնտեղ
և լուսանկարել է պահպանված փոքրաթիվ խաչքարերը:
Գիտաժողովի մասնակիցները դիմեցին Հայաստանում
հավատարմագրված դիվանագիտական ներկայացուցչություններին՝
կոչ անելով գերեզմանատան ոչնչացումը կանխելու նպատակով
ՅՈՒՆԵՍԿՕ-ի հովանու ներքո ստեղծել միջազգային հանձնաժողով:
«Հայկական մշակութային գանձերի պահպանումը Հայաստանի
արտաքին քաղաքականության մասն է կազմում», - ասաց
Օսկանյանը:
Մեսրոպ արքեպիսկոպոս Աշճյանը նշեց, որ բարձր է
գնահատում միջազգային հանրության ուշադրությունը
հայկական հուշարձանների վրա հրավիրելու Հայաստանի
կառավարության ջանքերը:
«Նախարարի ներկայությունը գիտաժողովին ապացուցում
է, որ Հայաստանի կառավարությունը պատրաստ է պաշտպանելու
Հայաստանի ժառանգությունն իր սահմաններից դուրս»,
- ասաց արքեպիսկոպոսը:
Ադրբեջանից վերաբնակեցված շատ հայեր մտահոգված
են Բաքվի Մոնտինսկոյե գերեզմանատան ճակատագրով:
Ղարաբաղյան պատերազմի շատ փախստականներ այդ գերեզմանոցում
թաղված ազգականներ ունեն:
Գիտությունների դոկտոր Ալեքսանդր Մանասյանը, որի
ազգականները թաղված են Մոնտինսկոյե գերեզամոնցում,
համոզված է, որ գերեզմանատների ոչնչացումը պարզապես
վանդալիզմ չէ:
«Հայկական գերեզմանոցների ոչնչացումն Ադրբեջանի
պետական քաղաքականության մի մասն է, որի նպատակն
է խեղաթյուրել պատմական փաստերը և ոչնչացնել տարածաշրջանում
հայկական ներկայության բոլոր վկայությունները»,
- ասաց Մանասյանը:
Մոնտինսկոյե գերեզմանատունը Բաքվի հնագույն գերեզմանատներից
մեկն է:
Ադրբեջանից փախստական Լիդա Հարությունյանը, որի
ծնողները թաղված են այնտեղ, ասում է, որ դա շատ
մեծ գերեզմանոց է և այնտեղ կան 18-րդ դարի հայկական
գերեզմաններ:
«Այնտեղ
կային նաև ռուսական և հրեական գերեզմաններ, իրականում
դա միջազգային գերեզմանատուն էր, - ասում է նա,
- Հայկական գերեզմանները երևում էին հեռվից, որովհետև
դրանց վրա մեծ խաչեր կային»:
Այս տարվա հունվարին Բաքվի քաղխորհուրդը հայտարարեց,
որ Նարիմանովսկի շրջանում մայրուղի է կառուցվելու,
և որ Մոնտինսկոյե գերեզմանատան մի մասը տեղափոխվելու
է մեկ այլ գերեզմանատուն:
Այդ հայտարարությունը հրապարակվեց տեղական թերթերում:
Այն նաև փակցրեցին գերեզմանատան մուտքի մոտ:
Բաքվի իշխանություններ հայտարարեցին, որ Մոնտինսկոյե
գերեզմանատանը թաղված մարդկանց ազգականները կարող
են դիմել քաղխորհուրդ վերաթաղման համար:
«Զինվորի մայր» հասարակական կազմակերպության նախագահ
Գրետա Միրզոյանը որակել է այդ հայտարարությունը
որպես ծիծաղելի:
«Այնտեղ տասնյակ հազարավոր հայեր են թաղված, սակայն
ներկա հանգամանքներում Բաքու գնալը, իհարկե, անհնար
է»:
Միրզոյանը, որն անցյալ տարի հնարավորություն էր
ստացել այցելել գերեզմանատունը, երբ «Հարավային
Կովկասի կանայք» գիտաժողովի շրջանակներում գտնվում
էր Բաքվում, ասում է, որ այնտեղ փաստորեն այլևս
գերեզմանոց չկա:
«Այն մասը, որտեղ հայկական գերեզմաններն էին,
ամբողջովին ոչնչացված է: Ոչ մի հայկական գերեզման
չի պահպանվել, իսկ այնտեղ աճող հին մեծ ծառերը կտրել
են: Դեռ ավելին, ակնհայտ էր, որ այնտեղ բուլդոզերներ
են աշխատել»:
Միրզոյանն ասում է, որ գերեզմանոցի կողքին տեղակայված
էր Հայաստանից եկած ադրբեջանցի փախստականների ճամբարը:
Նա ասաց, որ այդ մարդիկ նույնպես շատ գերեզմաններ
են պղծել՝ փնտրելով ոսկյա զարդեր կամ ոսկյա ատամնապսակներ:
Միրզոյան ասում է, որ այժմ արդեն իմաստ չունի
դիմել ՅՈՒՆԵՍԿՕ-ին կամ մշակութային հուշարձաններով
զբաղվող այլ կազմակերպությունների, որովհետև գերեզմանատանն
արդեն փրկելու բան չի մնացել:
Ադրբեջանական ԶԼՄ-ները հաճախ են անդրադառնում
գերեզմանատան հարցին:
Ադրբեջանական «Էխո» լրագրի թղթակից Զարեմա Վելիխանովան
գրում է.
«Ադրբեջանի իրավապաշտպաններն այն կարծիքին են,
որ քաղաքային խորհուրդը շտապել է նման որոշում ընդունելու
հարցում, և հայկական գերեզմանների ոչնչացումը կարող
է վատթարացնել հարաբերությունները Հայաստանի հետ՝
Լեռնային Ղարաբաղի հարցում»:
«Մայրուղու շինարարությունը պետք էր հետաձգել
մինչև Ղարաբաղյան հակամարտության կարգավորումը»,
- գրում է ադրբեջանցի իրավապաշտպան Էլդար Զեյնալովը:
«Այժմ, երբ Լեռնային Ղարաբաղի հարցը թևակոխել
է խաղաղ կարգավորման փուլը, ցանկացած գործողություններ,
որոնք կարող են լարվածություն առաջացնել, կարող
են ազդել կարգավորման խաղաղ ընթացքի վրա»:
Գրետա Միրզոյանն ասում է, որ ծաղիկներ էր վերցրել,
երբ գնացել էր այցելելու իր տատի և պապի գերեզմանները:
«Ես հույս ունեի, որ նրանց գերեզմանները կարող
են պահպանված լինել, բայց երբ մոտեցա գերեզմանատանը,
հասկացա, որ երբեք չեմ գտնի դրանց տեղը, որովհետև
տապանաքարեր չկային: Արդեն ուզում էի գնալ, երբ
մի նոր գերեզման տեսա: Վրան ցուցանակ չկար: Ծաղիկները
դրեցի այդ գերեզմանի վրա»:
|