Այբուբենի ամեն տառի արտասանություն, բառերի պատկերներ՝ բանաստեղծությունների վերևում, երգեր և հատվածներ Աստվածաշնչից՝ այս ամբողջը պարզապես ևս մեկ հայերենի դասագիրք էր, մինչև որ երկու հայեր՝ այսօրվա ոխերիմ թշնամի երկրներից, տեղադրեցին այդ էջերն ինտերնետում:

Իրաքում ծնված Շիրակ Ավագյանը և Միացյալ Նահանգներում ապրող Ալեք Բաղդասարյանը գտան իրենց հասակակիցներին միևնույն կիբեռտարածքում հավաքելու ձևը՝ տեղադրելով հայերենի դասագիրքն ինտերնետային ցանցում:

Անվճար www.learnarmenian.com էջը նախ և առաջ նախատեսված է այն հայ երեխաների համար, ովքեր ցանկանում են սովորել իրենց նախնիների լեզուն, սակայն այն նաև հնարավորություն է ընձեռում չափահաս սփյուռքահայերին ավելի շատ տեղեկություններ ստանալ իրենց հայրենիքի և այնտեղ ապրող մարդկանց մասին:

Դպրոցական ուսուցիչների կազմած կիբեռդասընթացը բաժանված է 7 մակարդակների: Այբուբենի տառերը, բառերը և փոքր տեքստերը ձայնագրված են վեբ դիզայներ Շիրակի ընտրած երեխաների կատարմամբ, իսկ մի շարք հայրենասիրական երգեր, որոնք նաև տեղադրված են էջում, կատարում է հայկական մի երգչախումբ:

Էջի 5-ից 40 տարեկան այցելուները կարող են նաև վայելել հայկական պոեզիան, մանկական աստվածաշունչը, ստանալ Հայաստանի մասին տեղեկություններ, ծանոթանալ Երևանի պատկերներին, ինչպես նաև ճարտարապետության և արվեստի պատմությունը:

«Երբ տեսա, թե ինչպես է այդ ծեր կինը թոռան հետ միասին նայում իմ էջը, ինձ զգացի երջանիկ և մեջս ցանկություն առաջացավ առաջարկել ավելին», - իր զգացմունքներով կիսվում է Շիրակը:

Հայաստան այցելելը Շիրակի ամբողջ կյանքի երազանքն էր, սակայն նաև պարտքի զգացում՝ թելադրված այն գաղափարով, որ ցանկացած հայ պետք է մի օր վերադառնա իր հայրենիք: Բաղդադի համալսարանի ֆիզիկայի ֆակուլտետի շրջանավարտ Շիրակը 23 տարեկանում արդեն ղեկավարում էր մի փոքր տպարան:

Նա ասում է, որ իր բիզնեսը սկսել է մի փոքր գրասենյակում՝ ընկերներից պարտքով վերցրած գումարով, և կարողացել է ծածկել իր ծախսերը՝ միջոցները ռացիոնալ օգտագործելով: «Եթե հայրս ինձ 10 դոլար էր տալիս, ես դա ծախսում էի գրքերի վրա, երբեք անիմաստ չէի վատնում»:

Սակայն Շիրակը որոշեց փոխել իր ուղին, չնայած նրա գործը լավ եկամուտ էր բերում: Իսկ Հայաստանի ճանապարհը հեշտ չէր:

«Երբ առաջին անգամ եկա Հայաստան, տեսա, որ կյանքն այստեղ շատ ուրիշ է, և պետք է ամեն ինչ սկզբից սկսեմ», - ասում է նա:

Նա սկսեց համակարգչային գործ սովորել և մոտ 4 տարի առաջ տեղափոխվեց Երևան: Սկզբում աշխատեց համակարգչային ձևավորման մի փոքր գործակալությունում, իսկ հետո հայտնաբերեց Տեղեկատվության ինտեգրացիայի գրուփը (ՏԻԳ)՝ ամերիկյան մի ընկերություն, որն իր երևանյան մասնաճյուղում աշխատանք առաջարկեց նրան:

ՏԻԳ-ի տնօրեն Ալեք Բաղդասարյանը ֆինանսավորեց Learnarmenian.com ծրագիրը, որն ամբողջությամբ ձևավորել և այժմ իրականացնում է Շիրակը:

«Սկզբում մենք չէին ենթադրում, որ մեր էջը հանրահայտ կդառնա, - ասում է Շիրակը, - բայց երբ տեսանք մեր այցելուների աճող թվերը, որոշեցինք ընդլայնել ծրագիրը»:

Շիրակը, որն անսահման նվիրված է Հայաստանին և կրքոտ սիրում է երեխաներին, նախատեսում է թողարկել կիբեռդասընթացի կոմպակտ սկավառակը, իսկ դրա վաճառքից գոյացած գումարները տրամադրել Հայաստանի դպրոցների վերանորոգմանը: Նա ասում է, որ ստացված առաջին միջոցները հատկացնելու է այն դպրոցին, որի ուսուցիչներն օգնել են ստեղծել հայերենի դասընթացը:

Շիրակի մյուս երազանքն է ամբողջ աշխարհի հայ երեխաների խմբերի փոխանակում կազմակերպել և բերել նրանց ճանապարհորդելու Հայաստանով:

Քանի որ Learnarmenian.com էջն իր այցելուների շփման համար ունի նաև զրուցասրահ (chat room), այն դարձել է մի իսկական «կապող օղակ Հայաստանի հայ երեխաների և ամբողջ աշխարհի հայ երեխաների միջև»՝ ինչպես Շիրակն է խոսում իր երազանքի մասին՝ համախմբել էջի միջոցով իրար հետ ծանոթացած երեխաներին: