«Շողակն» երաժշտական համույթն արժանացել է Անկախ երաժշտության ասոցիացիայի (ԱԵԱ) և Ձայնագրող ընկերությունների ազգային ասոցիացիայի (ՁԸԱԱ) սահմանած Ավանդական երաժշտության աշխարհի լավագույն ձայնագրության մրցանակին՝ իր «Հայաստան անթոլոգիա» կոմպակտ սկավառակի համար:

Հայկական համույթը հաղթող է համարվել մարտի 18-ին ԱՄՆ-ի Ֆլորիդայի նահանգի Օռլանդո քաղաքում անցկացված մրցանակաբաշխությունում, որտեղ ԱԵԱ-ն մրցանակներ է շնորհել 38 կատեգորիաներում:

Սկավառակում ընդգրկված են 19 երգեր, որոնք ձայնագրել է Նյու Յորքի «Traditional Crossroads» ընկերությունը (www.traditionalcrossroads.com):

(Սեղմեք այստեղ՝ օգոստոսի 2, համույթին նվիրված հոդվածը կարդալու համար)

«Ես շատ հուզված եմ այս անսպասելի հաջողությամբ և շատ ցավում եմ, որ արտասահմանում մեր սկավառակը շատ հայտնի է, իսկ Հայաստանում այն նույնիսկ չի ներկայացվել», - ասաց խմբի մենակատար Հասմիկ Հարությունյանը:

«Traditional Crossroads» ընկերությունն արդեն չորրորդ անգամ է արժանանում ԱԵԱ-ի մրցանակներին, որը դիտվում է որպես Գրեմի մրցանակաբաշխություն ավելի փոքր ընկերությունների համար:

Անցյալ հուլիսին «Շողակնը» մասնակցել է Վաշինգտոնում Սմիթսոնյան հաստատության հովանավորությամբ անցկացված համաշխարհային փառատոնին: Համույթը (www.roadtoarmenia.com) նախատեսում է հաջորդ տարի հյուրախաղերով հանդես գալ ԱՄՆ-ում: