Բռնցքամարտ

Երևանցի Արթուր Պետրոսյանը շարունակում է իր ելույթները երկրորդ կիսամիջին քաշային կարգում Նևադա նահանգի Լաս Վեգաս քաղաքում: Պետրոսյանը տարել է 10 հաղթանակ, կրել է 4 պարտություն և 1 մենամարտ ավարտել է ոչ-ոքի:

Այս ամսվա սկզբին Պետրոսյանը հասավ մի շատ տպավորիչ հաղթանակի: Երկրորդ ռաունդում հակառակորդի հարվածը նրան գետին տապալեց, սակայն չնայած դրան, Պետրոսյանը հաղթեց Ֆրանսիսկո Կորալեսին տեխնիկական նոկաուտով (9-2), երբ վերջին՝ 8-րդ, ռաունդի ավարտին մնացել էր ընդամենը 18 վայրկյան:

Ֆուտբոլ (Եվրո-2004)

Ըստ www.sport-express.ru ինտերնետային էջի, Հայաստանի ֆուտբոլի ֆեդերացիան (ՀՖՖ) պաշտոնական նամակ է ստացել Հյուսիսային Իռլանդիայի ֆուտբոլի ֆեդերացիայից, որտեղ ասվում է, որ Հյուսիսային Իռլանդիայի ազգային հավաքականը Հայաստան չի ժամանի, եթե Իրաքում պատերազմ սկսվի:

Իռլանդացիները պետք է հանդիպեն Հայաստանի ազգային հավաքականի հետ մարտի 29-ին՝ Եվրոպայի 2004 թ. առաջնության նախնական փուլի խաղում:

Հյուսիսային Իռլանդիան նամակ է ուղարկել էր նաև ՈՒԵՖԱ-ին, սակայն վերջինիս ղեկավարությունը պնդել է, որ իրաքյան դեպքերի պատճառով խաղեր չհետաձգվեն: Այս դեպքում հնարավոր է, որ Հայաստանի օգտին գրանցվի 3-0 հաշվով հաղթանակ՝ հակառակորդի խաղին չներկայանալու պատճառով:

Ֆուտբոլ (Հայաստանի բարձրագույն խումբ)

Մարտի 12-ին «Արարատը» վերադարձավ Ադլերից, որտեղ երկշաբաթյա մարզումներ էր անցկացնում:

«Արարատի» ղեկավարությունը շարունակում է պնդել, որ ՀՖՖ-ի ընդունած որոշումն ակումբի որակազրկման մասին անօրինական է:

«Արարատը» տեղեկացնում է, որ ՀՖՖ-ն ստեղծվել է 2002 թվականի դեկտեմբերին, և որ ՀՖՖ-ի ու ակումբի միջև ոչ մի իրավական փաստաթուղթ չի ստորագրվել: Այդ պատճառով ՀՖՖ-ն ակումբը որակազրկելու իրավական հիմք չունի:

Չնայած արգելքին՝ «Արարատը» պատրաստվում է կազմակերպել իր սեփական մրցաշարը:

«Արարատը» նաև պատրաստվում է շարունակել իր մարզումները և ընկերական խաղեր անցկացնել արտասահմանում: Ակումբը նախատեսում է կազմակերպել գավաթի իր սեփական պրոֆեսիոնալ լիգան: