Երևանի շուրջ 100 բնակիչներ անցյալ կիրակի հավաքվել էին Կասկադի մոտ, որպեսզի միանան այն 136 երկրներին, որտեղ անցկացվում էին բողոքի ցույցեր՝ ըննդեմ Իրաքում սանձազերծվող պատերազմի:

Միջոցառումը կազմակերպել էր Ֆրանսիայից ժամանած Ստեֆան Պրովոստը, որն աշխատում է Հայաստանում:

«Ես էլնամակ էի ուղարկել իմ չորս ընկերներին, - ասաց Պրովոստը, - Ակնկալում էի, որ կգան մի 10-15 հոգի: Սա իմ բողոքի ցույցն է պատերազմ կոչվող այն կոտորածի դեմ, որ ուզում են իրականցնել Ջորջ Բուշի գլխավորությամբ: Հայաստանում բոլորը գիտեն, թե ինչ է պատերազմը, և ես գիտեմ, որ այստեղ ոչ ոք պատերազմ չի ուզում՝ ոչ այստեղ, ոչ որևէ այլ վայրում»:

Հոգևորական Տաճատ Դավթյանն ասաց, որ նման ակցիաները կարող են կանխել պատերազմը:

«Միացյալ Նահանգները պետք է հասկանա, որ աշխարհի մեծ մասը դեմ է պատերազմին, - ասաց նա, - Մենք չենք ասում, որ Իրաքի դիրքորոշումը շատ լավն է, սակայն մենք գիտենք, որ պատերազմը խնդիր լուծելու միջոց չէ: Եթե բավականաչափ թվով մարդիկ բարձրացնեն իրենց ձայնը, այս հիմարությունը կդադարեցվի»:

Տասնվեցամյա Կարեն Շավոյանը միացել է ակցիային «Օ՛Կարինա» մասնավոր դպրոցի իր համադասարանցիների հետ:

«Մենք եկել ենք այստեղ, որպեսզի լինենք այն մարդկանց հետ, ովքեր պատերազմ չեն ուզում, - ասաց Կարենը, - Ես գիտեմ, որ աշխարհը չի կարող առանց պատերազմների, սակայն որոշ անիմաստ պատերազմներ կարելի է կանխել»:

Բոտերոյի «Կատու» քանդակի մոտ հավաքվածների մեծ մասն օտարերկրացիներ էին: Մի ամերիկուհի ասաց, որ ակնկալում էր ավելի շատ կազմակերպված բողոքի ակցիաներ տեսնել Հայաստանում:

«Թվում է, թե հայերն անտարբեր են այս հարցի նկատմամբ, մինչդեռ ամբողջ աշխարհում բողոքի ցույցեր են կազմակերպվում պատերազմի դեմ, - ասաց նա, - Սակայն իմ ընկերներից մեկն ասաց, որ դրա պատճառը վերջերս անցած ընտրություններն են, որ մարդկանց մեծ մասը հոգնել է ընտրություններից ու հանրահավաքներից, և որ կառավարությունը չի ուզում տեսնել 10 մարդուց մեծ խմբեր»:

«Այաս» ծովային հետազոտությունների ակումբի նախագահ Կարեն Բալայանն ասաց, որ ակցիային ավելի շատ հայեր կմասնակցեին, եթե տեղեկացված լինեին:

«Իմ ընկերների հետ ուզում էինք ԱՄՆ դիրքորոշման դեմ մեր բողոքն արտահայտող նման ակցիա կազմակերպել, - ասաց նա, - Սակայն հետո իմացանք, որ ուրիշներն արդեն հավաք են հայտարարել և հաճույքով միացանք նրանց: Բոլոր հայերը դեմ են պատերազմին, որովհետև մենք գիտենք, թե դա ինչ է:

«Եթե նման ակցիաները որևէ ազդեցություն ունենան ԱՄՆ դիրքորոշման վրա, մենք նորից ու նորից բողոքի ակցիաներ կկազմակերպենք»: