Դեկտեմբերի կեսից Երևանում հաստատված ձմեռային սառնամանիքը, օդերևութաբանների հավաստմամբ, ամենաուժեղն է վերջին 70 տարվա ընթացքում: Ռեկորդային ցրտերը մի շարք խնդիրներ առաջացրին քաղաքում՝ հիշեցնելով անցյալ տասնամյակի իրավիճակը, երբ էլեկտրաէներգիայի և բենզինի պակասն ավելի էր ծանրացնում սառնամանիքի հետևանքները:

Ամանորյա տոներից առաջ ջերաստիճանն իջավ մինչև -30, և խողովակների սառչելու պատճառով Հայաստանի հարյուրավոր շենքերի բնակիչներ մնացին առանց ջրի և կոյուղու:

Որոշ բնակիչներ մի քանի շաբաթ զրկված էին խմելու ջրից, իսկ երբ խողովակները հալվեցին, շատ տեղերում դրանք պայթեցին և կոյուղու ջրերը ողողեցին բնակարաններն ու շենքերի մուտքերը:

Երևանի քաղաքապետ Ռոբերտ Նազարյանը խոստացել էր, որ բոլոր խողովակները կնորոգվեն մինչև հունվարի 13-ը, սակայն շատ բնակիչներ շարունակում են մնալ առանց ջրի:

«Այս տարի ձմեռը մեզ հանկարծակիի բերեց, - ասում է Նազարյանը, - Այս տարի մոտ 1600 շենքեր կարող էին կենտրոնացված ջեռուցում ստանալ և խուսափել վթարներից, սակայն ներկայումս ջեռուցվում են միայն 600-ը, որովհետև մարդիկ չեն վճարում»:

Սակայն նույնիսկ որոշ ջեռուցվող շենքերի բնակիչներ չխուսափեցին խնդիրներից:

Մալաթիա-Սեբաստիա համայնքում գտնվող համար 54 շենքը պետք է ջեռուցում ստանար, քանի որ բնակիչները մուծել էին կանխավճարը: Սակայն բնակիչները ոչ ջեռուցում ունեին, ոչ էլ ջուր: Երբ դեկտեմբերի վերջին տաք ջուրը վերջապես տվեցին, խողովակներն արդեն սառել էին:

Սեդա Մինասյանի Էստոնական 14 հասցեով բնակարանը մի քանի օր առաջ լիճ էր հիշեցնում: Երբ առաջին հարկում գտնվող նրա բնակարանի մոտով անցնող խողովակները պայթեցին, բնակարանը հայտնվեց 5 սանտիմետր ջրի շերտի տակ:

Ընտանիքը դիմեց իրենց շրջանի բնակշահագործման տնտեսություն: Վարպետները վերանորոգեցին խողովակների մատչելի մասերը, սակայն զգուշացրին, որ նոր սառնամանիքների դեպքում խողովակները, հավանաբար, նորից կպայթեն:

«Նրանք ասացին մեզ, որ խողովակները հին և ժանգոտած են, և բոլորը հնարավոր չէ փոխել, քանի որ դրանք անցնում են շենքի պատերի միջով», - ասում է Մինասյանը:

Վթարները վերացնելու համար քաղաքապետարանը ստեղծեց հատուկ բրիգադներ: Բնակիչներին օգնելու նպատակով Երևանի բոլոր 13 համայնքներում ստեղծվել են շտաբեր:

«Օրական մինչև 50 կանչ էինք ստանում», - ասում է քաղաքապետարանի օպերատիվ շտաբի պետի տեղակալ Արթուր Մարտիրոսյանը:

Սակայն որոշ բնակիչներ, ինչպես Հանրապետության 76/2 հասցեով բնակվող Սամվել Թադևոսյանը, չէին կարող սպասել վերանորոգող բրիգադների գալուն, քանի որ խողովակները պայթել էին հենց նրա դռան առաջ, և ջուրը լցվում էր տուն: Նա վերանորոգել է խողովակները սեփական միջոցներով՝ ընդհանուր առմամբ ծախսելով մոտ 100 դոլար:

«Կարծում եմ, պատճառն այն է, որ խողովակները ջերմամեկուսացում չունեն: Ես նորոգել եմ խողովակի միայն մի փոքր մասը, սակայն վախենամ, որ սրանով խնդիրը չվերանա», - ասում է նա:

Թադևոսյանի և Հանրապետության 76/2 շենքի մյուս բնակիչների համար, ինչպես նաև Սունդուկյան, Շինարարների և մի շարք այլ փողոցների շենքերի բնակիչների համար ջրի խնդիրը լրացուցիչ գլխացավանք էր ստեղծել, քանի որ ջրի արտահոսքն առաջ է բերել կարճ միացումներ՝ խափանելով էներգամատակարարումը: «Մենք երկու օր լույս չունեինք», - ասում է Սունդուկյանի 2 շենքի բնակիչ Ինեսա Ստեփանյանը:

«Գուցե ամռանը երկու օր առանց լույսի մնալը խնդիր չէ: Սակայն ձմռանն էլեկտրականությունը տունը տաքացնելու միակ միջոցն է»:

Ջրի արտահոսքից առաջացած կարճ միացումները 45 հրդեհ են առաջացրել քաղաքում:

«Այս ձմեռը շատ անակնկալներ բերեց իր հետ, - ասում է Համայնատիրությունների զարգացման կենտրոնի տնօրեն Վարազդատ Ավոյանը, - Բոլոր համայնքները, քաղաքապետարանը և մյուս կազմակերպությունները պետք է դասեր քաղեն ստեղծված իրավիճակից և միջոցներ ձեռնարկեն նման վթարները կանխելու համար»:

Ոմանց համար ձմեռվա անսպասելի արհավիրքի բերած տառապանքներն իրենց դրական կողմն ունեն. դպրոցականների արձակուրդները երկարացվել են, և դասերը կվերսկսվեն դպրոցների խողովակները վերանորոգելուց հետո:

«Մենք պետք վերսկսեինք դասերը հունվարի 13-ին: Սակայն երբ սանիտարական ծառայությունն այցելեց մեր դպրոցը, նրանք արգելեցին դասեր անցկացնել, մինչև ջուր չունենանք», - ասում է համար 118 դպրոցի ուսուցչուհի Անահիտ Մխիթարյանը:

«Հայհիդրոմետ» ծառայության հասարակայնության հետ կապերի պատասխանատու Անժելիկա Հովհաննիսյանն ասում է, որ դեկտեմբերի և հունվարի ցուրտ եղանակը պայմանավորված էր հարավ-արևմտյան արկտիկական սառը զանգվածներով և սկանդինավյան հակացիկլոնով:

«Ջերմաստիճանը հունվարին կլինի 8-10 աստիճան 0-ից ցածր: Ըստ մեր և ռուսաստանյան օդերևութաբանների տվյալների, հունվարի 2-րդ կեսում դեկտեմբերյան սառնամանիքներ չեն սպասվում», - ասաց նա: