Հայկական
«ՍՊՍ Սիգարոն» ընկերությունը, որը երեք տարի առաջ
շուկա մտավ «Սիգարոն Էքսկլյուզիվ» ինքնատիպ երկար
զտիչով ծխախոտով, վերջերս սպառողին ներկայացրեց
իր երկրորդ տեսակը՝ «Սիգարոն կլասիկը»:
Այն նախատեսված է սպառողների ավելի լայն շրջանակների
համար, քան համեմատաբար թանկ «Էքսկլյուզիվը», և
արժե մոտ 60 սենթ («Էքսկլյուզիվի» գինը մոտ 1 դոլար
է):
Հայաստանում «Սիգարոնը» շքեղություն է համարվում,
և գրպանում «Սիգարոնի» տուփ ունենալը խորհրդանշում
է ծխողի կարգավիճակը: Նրանց համար, ովքեր ծանոթ
չեն «Սիգարոնին», ծխախոտի նոր տեսակն արտաքինից
թեթևակիորեն տարբերվում է նախորդից:
Հինգ տարի առաջ հիմնադրված ընկերությունում հավաստիացնում
են, որ իրենց հաջողվել է զգալիորեն իջեցնել գինը՝
պարզեցնելով շքեղ փաթեթավորումը՝ արծաթե խզիչ ժապավենը,
փաթեթավորման թղթի ձևավորումը և տուփի որակը:
«Ի տարբերություն «Սիգարոն կլասիկի», «Սիգարոն
էքսկլյուզիվի» փաթեթավորման բոլոր բաղադրիչները
պատրաստված են ամենաթանկ հումքից և ամենաբարձր տեխնոլոգիաներով»,
- ասում է «Սիգարոն» ընկերության լրատվության և
գովազդի գծով փոխտնօրեն Նվեր Սարգսյանը:
Իրականում հենց փաթեթավորումն էր, որ պատճառ հանդիսացավ
անցյալ տարի «Դավիդով» ընկերության կողմից «Սիգարոնի»
դեմ ապրանքանիշի կանոնների խախտման հայցով դատական
գործ հարուցելուն. «Դավիդովը» պնդում էր, որ «Սիգարոնը»
սեփականացրել է իր դիզայնը, և պահանջում էր, որ
«Սիգարոնին» արգելվի արտահանել իր արտադրանքն այն
շուկաները, որտեղ վաճառվում են «Դավիդովի» ծխախոտները:
Սակայն դատարանը վճիռ կայացրեց հօգուտ «Սիգարոնի»,
և դիզայնի հետ կապված այս վեճը փաստորեն նպաստեց
հայկական ընկերության արտադրանքի վաճառքի կտրուկ
աճին:
«Սիգարոն էքսկլյուզիվն» արտադրվում է Նորվեգիայից
ներմուծվող ծխախոտափնջից և արտահանվում է աշխարհի
ավելի քան 20 երկրներ: Սարգսյանը, որը պնդում է,
որ նոր տեսակի ծխախոտափունջը նույնն է, ինչ որ «Էքսկլյուզիվ»
տեսակում, ասում է, որ «Կլասիկը» ստեղծվել է ներքին
շուկայում մրցունակ լինելու համար:
«Սիգարոնի» ապրանքանիշը նրա չափսն ու կառուցվածքն
են. 120 մմ երկարություն ունեցող հատիկի 67 միլիմետրը
ծխափողն է, իսկ 53 միլիմետրը՝ ծխախոտը: Շուկա դուրս
գալու սկզբնական շրջանում «Սիգարոնի» գովազդում
նշվում էր, որ երկար զտիչի շնորհիվ այն նվազ վնասակար
է առողջության համար:
Այսօր «Սիգարոնի» նոր տեսակը Հայաստանի խանութների
ցուցափեղկերում արդեն իր ուրույն տեղն է գտել «Ուինսթոնի»,
«Քեմելի», «Սալեմի» կողքին: Այն դեռևս կարճ ժամանակ
է շուկայում, սակայն արդեն գերազանցել է ընկերության
բոլոր սպասելիքները:
Հայաստանի անդամակցությունն Առևտրի համաշխարհային
կազմակերպությանը «Սիգարոնին» համաշխարհային շուկայում
գործելու լայն արտոնություններ է տալիս, մասնավորապես՝
հարկային առումով:
«Մեր առաջնային խնդիրն է նոր շուկաներ ուսումնասիրելն
ու մուտք գործելը և, իհարկե, տեսականու ավելացումը,
- ասում է Սարգսյանը, - ներկայումս մշակման փուլում
են «Սլիմ» տեսակի «Սիգարոնները», և լուրջ աշխատանքներ
են տարվում բոլորովին նոր տիպի ծխափողի ստեղծման
համար, որն էապես տարբերվելու է մինչ այժմ ծխախոտի
համաշխարհային արտադրության ոլորտում հայտնի բոլոր
ծխափողերից»:
|