Ֆուտբոլ (Հայաստանի բարձրագույն խումբ)

Հայաստանի ֆուտբոլի ամենահայտնի ակումբը հեռացվել է բարձրագույն խմբից և զրկվել բոլոր մրցումներին մասնակցելու իրավունքից:

Հայաստանի Ֆուտբոլի Ֆեդերացիայի կարգապահական հանձնաժողովը պատժել է Երևանի «Արարատին» Իսրայելի հետ ընկերական հանդիպման համար թիմից հինգ խաղացողներ չտրամադրելու համար: Անցյալ շաբաթ Հայաստանի ազգային և երիտասարդական հավաքականները հանդես եկան Թել Ավիվում: Դրանք Իսրայելում վերջին ավելի քան մեկ տարվա ընթացքում կայացած առաջին միջազգային խաղերն էին:

Ըստ Հայաստանի Ֆուտբոլի Ֆեդերացիայի կանոնադրության, ցանկացած ակումբ, որ հրաժարվում է միաժամանակ երկուսից ավելի խաղացողներ տրամադրել երիտասարդական կամ ազգային հավաքականների ընկերական հանդիպումների համար, զրկվում է բարձրագույն խմբում խաղալու իրավունքից: «Արարատի» դեմ ուղղված որոշման հետևանքով բարձրագույն խմբի մասնակիցների քանակը նվազեց մինչև 9 ակումբ:

«Արարատը» միակ հայկական ակումբն էր, որ 1973 թվին դարձավ Խորհրդային Միության չեմպիոն՝ նվաճելով նաև գավաթը: Կարծիք կար, որ իր կազմում մի քանի արտասահմանյան խաղացողներ ընդգրկելուց հետո Հայաստանի այս տարվա առաջնությունում այն ուժեղ մրցակից էր դարձել չեմպիոնի կոչումը կրող «Փյունիկի» համար:

«Արարատի» որակազրկման որոշումը պետք է հաստատվի ՀՖՖ-ի գործադիր հանձնաժողովի նիստում, որը պետք է կայանա մինչև մրցաշրջանի սկիզբը՝ մարտի 9-ը:

ՀՖՖ-ն արդեն հաստատել է բարձրագույն խմբի ֆորմատի կարևոր փոփոխությունը՝ նվազեցնելով ակումբների քանակը 12 մինչև 10 և ավելացնելով խաղերի քանակը, որպեսզի թիմերը մրցաշրջանի ընթացքում ավելի ակտիվ լինեն:

Սկզբում ակումբները երկուական խաղ կանցկացնեն իրար հետ, որից հետո թիմերը կբաժանվեն երկու խմբի: Լավագուն վեց թիմերը ևս երկու անգամ կհանդիպեն իրար հետ, իսկ մնացած չորսը կպայքարեն իրար հետ՝ որոշելու, թե որ թիմն է լքելու բարձրագույն խումբը:

Եթե մինչ այժմ տասներկու ակումբներից յուրաքանչուրը 22 խաղ էր անցկացնում, ապա ըստ նոր համակարգի, լավագույն վեց թիմերը կանցկացնեն 28, իսկ մյուս չորսը՝ 24 խաղ:

«Զվարթնոց» ֆուտբոլային ակումբը, որը ներկայացնում էր Հայաստանը ՈւԵՖԱ-2002-ի գավաթի մրցաշարում, հեռացվել է բարձրագույն խմբից ֆինանսական խնդիրների պատճառով գրանցման անդամավճարը չմուծելու համար:

Միայն այս տարի բարձրագույն խումբ տեղափոխված «Արմավիր» ֆուտբոլային ակումբը նույնպես դուրս մնաց առաջնությունից նման ֆինանսական խնդիրների պատճառով: «Սպարտակ» ֆուտբոլային ակումբը միաձուլվել է «Բանանցին», և ՀՖՖ-ն հատկացրել է դրա հետևանքով ազատված տեղն Արարատի «Արաքսին»:

Թենիս (ՊԹԱ մրցաշար)

Արգենտինահայ թենիսիստ Դավիթ Նալբանդյանը մասնակցում է փետրվարի 15-23-ն Արգենտինայի մայրաքաղաք Բուենես Այրեսում ընթացող «Copa AT&T» միջազգային մրցաշարին:

Խաղալով գրունտային ծածկույթի վրա՝ երկրորդ համարի տակ ցանված Նալբանդյանն արդեն անցել է առաջին երկու փուլերը և հասել է քառորդ եզրափակիչ:

Առաջին փուլում նա հաղթել է իսպանացի Ֆերնանդո Վիսենտեին՝ 6-3, 7-5, որից հետո երկրորդ փուլում պարտության է մատնել համերկրացի Ֆրանկո Սկուիլարիին՝ 6-1, 6-3:

Մրցաշարում հաղթելու դեպքում Նալբանդյանը կստանա 52000 դոլար և 35 միավոր: Ըստ ՊԹԱ դասակարգման, նա 12-րդն է երկու մրցաշարերում ձեռք բերած 51 միավորով: Նալբանդյանը 50 միավոր է ստացել Ավստրալիայի բաց առաջնությունում քառորդ եզրափակիչ դուրս գալու համար, սակայն դուրս է մնացել Նոր Զելանդիայի Օքլենդի միջազգային մրցաշարի առաջին փուլից՝ ստանալով մեկ միավոր:

Սարգիս Սարգսյանը տանուլ է տվել ԱՄՆ Մեմֆիս քաղաքում փետրվարի 17-23-ը կոշտ ծածկույթի վրա կայացած Միջազգային «Գոլդ» մրցաշարում: Նա պարտվել է 3-6, 4-6 հաշվով ամերիկացի Ռոբի Ջինեփրին:

Այժմ Սարգսյանը 39 միավորով զբաղեցնում է 22-րդ տեղը (չհաշված Մեմֆիսի մրցաշարը, քանի որ այն դեռ չի ավարտվել): ՊԹԱ-ում Հայաստանը ներկայացնող միակ թենիսիստը մասնակցել է նաև Լեհաստանի Վրոցլավ քաղաքի մրցաշարին, որտեղ հասել է քառորդ եզրափակիչ:

Ամերիկահայ Անդրե Ագասին գլխավորում է մրցարշավը 235 միավորով: Ավստրալիայի բաց առաջնությունում հաղթելուց հետո նա կրկին հաղթեց ամերիկյան Սան Խոսե քաղաքում փետրվարի 16-ին ավարտված «Սիբել» միջազգային բաց մրցաշարում:

Այս տարվա ՊԹԱ մրցաշրջանում նա դարձավ առաջին թենիսիստը, որ հաղթել է երկու մրցաշարում: