Դեմիրճյանի անունն ամբողջ Հայաստանում բոլորին քաջ ծանոթ է, սակայն դրա հիմնական պատճառը հիշողություններն են Կարեն Դեմիրճյանի մասին, որը (Խորհրդային) Հայաստանի կոմունիստական կուսակցության կենտրոնական կոմիտեի նախկին առաջին քարտուղարն էր:

Սակայն այսօր այդ անունով ասպարեզ է ելել Դեմիրճյանի երկու որդիներից կրտսերը՝ Ստեփանը, որին, Ռոբերտ Քոչարյանի նման, Հայաստանի հաջորդ նախագահի պաշտոնից բաժանում են 13 օր և քվեների 50 տոկոսը:

Ստեփան Կարենի Դեմիրճյանը ծնվել է 1959 թ. Երևանում: 1981 թ. ավարտել է Երևանի Պոլիտեխնիկական ինստիտուտը, տեխնիկական գիտությունների թեկնածու է:

Աշխատանքային գործունեությունը սկսել է Երևանի էլեկտրատեխնիկական գործարանում, որտեղ աշխատել է որպես ավագ վարպետ: Հետո աշխատել է «Հայէլեկտրաշարժիչ» արտադրական միավորումում որպես գլխավոր ինժեների տեղակալ:

1986 թվին Ստեփան Դեմիրճյանը նշանակվում է «Մարս» բաժնետիրական ընկերության գլխավոր տնօրեն, որը գլխավորում է մինչև այսօր: Ամուսնացած է, ունի 3 դուստր:

Ստեփան Դեմիրճյանը մեծացել է քաղաքականության մեջ, սակայն քաղաքականությամբ սկսել է զբաղվել միայն 1999 թվականից:

Այդ տարվա հոկտեմբերին խորհրդարանի խոսնակ Կարեն Դեմիրճյանը (որը 1998 թվականի նախագահական ընտրությունների երկրորդ փուլում տանուլ էր տվել Քոչարյանին) յոթ այլ քաղաքական գործիչների հետ սպանվեց խորհրդարանում կատարված ահաբեկչության ժամանակ:

1999 թվականին, խորհրդարանական ընտրություններից առաջ, Կարեն Դեմիրճյանն ու պաշտպանության նախարար Վազգեն Սարգսյանը միավորվել էին՝ ստեղծելով «Միասնություն» դաշինքը, որը նվաճեց Ազգային ժողովի տեղերի մեծ մասը և դարձավ քաղաքական ուժ:

Ստեփան Դեմիրճյանն ասում է, որ քաղաքականությամբ զբաղվելու մտադրություն չի ունեցել մինչև այն օրը, երբ սպանվեց նրա հայրը:

1999 թ. դեկտեմբերի 24-ից նա գլխավորում է իր հոր հիմնադրած Հայաստանի ժողովրդական կուսակցությունը (ՀԺԿ):

Ընտրարշավի ընթացքում «մատաղի» հայկական ավանդույթը դարձավ Դեմիրճյանի ընտրարշավի ավանդույթն այն գյուղերում, որտեղ 1998 թվականի ընտրությունների երկրորդ փուլում նույն բանն անում էին նրա հոր համար:

Թեև Դեմիճյանը ստացել է միայն 400846 ձայն (28,3 տոկոս) Քոչարյանի 707155 ձայնի դիմաց (49,8 տոկոս), նրա այդ արդյունքը կարծես թույլ տվեց նրան իր շուրջը համախմբել ընդդիմությանը: Հինգշաբթի օրը կայացած հանրահավաքում նրան միացան ընդդիմության մյուս թեկնածուները, այդ թվում՝ նախկին վարչապետ Վազգեն Մանուկյանը և նախկին արտգործնախարար Ռաֆֆի Հովհաննիսյանը:

«Որքան մեծ է ժողովրդի վստահությունն իշխանությունների հանդեպ, այնքան մեծ է այդ երկրի զարգանալու հնարավորությունը», - ասում է Դեմիրճյանը՝ ժողովրդին խոստանալով սոցիալական հավասարություն, արդարություն և բարեկեցիկ կյանք:

Դեմիրճյանի ներուժը որպես նախագահի թեկնածուի ակնհայտ դարձավ ամբողջ Հայաստանով մեկ անցած խոշոր հանրահավաքների ժամանակ, որոնց գագաթնակետը դարձավ անցյալ կիրակի Երևանում կայացած քարոզարշավի խոշորագույն քաղաքական հանրահավաքը:

Հինգշաբթի օրը Մատենադարանի առջև կայացած հավաքում, որին ներկա էր շուրջ 10000 մարդ, Դեմիրճյանն իրեն հայտարարեց չորեքշաբթի օրը կայացած ընտրությունների իրական հաղթողը՝ խոստանալով պատժել նրանց, ովքեր «գողացել» են իրենից ընտրությունները:

«Մեր հանդիպումները մարզերում, նաև այսօրվա մեր հանդիպումն ինձ իրավունք են տալիս ասել, որ իշխանափոխությունն իրականացվել է մարդկանց մտքերում և սրտերում», - ասաց Ստեփան Դեմիրճյանը: