Գործարար Վարդգես Ամիրջանյանը հաջորդ նախագահից աշխատանք է ակնկալում:

«Աշխատատեղ թող ստեղծեն, որ մարդիկ ընտանիք, երեխա չթողնեն-գնան, օտար ափերում բախտ որոնեն, - ասում է 35-ամյա Ամիրջանյանը, որն աշխատանք գտնելու համար գնացել է Մոսկվա, - Կարոտը խեղդում է, բայց ուրիշ ելք չունեմ»:

Ըստ ՀՀ սոցապահովության նախարարության «ՀՀ զբաղվածության ծառայություն» գործակալության, 2003 թ. հունվարի 1-ի դրությամբ աշխատանքի տեղավորելու խնդրանքով իրենց է դիմել 154071 մարդ, որոնցից 8473-ին 2002 թվականին հաջողվել է տեղավորել աշխատանքի:

Նախարարությունից հայտնում են, որ գործազրկության մակարդակը հանրապետությունում անցյալ տարի կազմել է 9 %, ինչը լավագույն դեպքում կազմում է իրական թվի մեկ-երրորդը:

«Ռադիո «Վան»-ով հնչած մեր հաղորդումից պարզ դարձավ, որ մինչ այժմ տեղեկատվությունը պատշաճ մակարդակի վրա չի եղել, - ասում է նախարարության զբաղվածության ծառայության մամլո քարտուղար Անուշ Հարությունյանը, - Շատ-շատերը չգիտեն, որ մենք տարածքային կենտրոններ ունենք»:

Սակայն գործակալությունը պնդում է, որ բոլոր դիմողները կարող են ստանալ կամ գործազրկության նպաստ (որն այս տարվա սկզբի դրությամբ ստանում է 6010 մարդ), կամ այլ օգնություն (որը ստանում է 7371 հոգի) և կամ էլ մասնակցել «Նպաստ աշխատանքի դիմաց» կամ «Պարեն աշխատանքի դիմաց» ծրագրերին:

Գործակալությունը, որի 51 տարածքային կենտրոններից 31-ը դեռևս զուրկ են համակարգիչներից, միայն այս ամիս կկարողանան լիովին զինվել դրանցով, ստեղծել տեղեկատվական ընդհանուր բազա և գործել ավելի արդյունավետ:

«Մենք պետռեգիստրից տեղեկանում ենք նոր գրանցված հիմնարկ-ձեռնարկությունների մասին, սակայն գործատուներն իրենք պետք է ներկայացնեն ունեցած թափուր աշխատատեղերի թիվը, - ասում է Հարությունյանը, - Ես չեմ կարող նրանց ստիպել»:

Նա վստահեցնում է, որ 2000 գործազուրկի համար շուտով կկազմակերպվի ուսուցում: Մինչդեռ անցյալ տարի, վերապատրաստվել է ընդամենը 184 գործազուրկ: Գործակալությունն այս տարի մտադիր է ոչ միայն մրցակցել, այլև համագործակցել զբաղվածության ոչ պետական կազմակերպությունների հետ, որոնց թիվը միայն Երևանում 21-ն է:

Սակայն գործակալությունները կարող են միայն տեղավորել աշխատանքի, նրանք չեն կարող աշխատատեղեր ստեղծել:

Աշտարակի զբաղվածության տարածքային կենտրոնի ղեկավար Հայրապետ Սեթոյանն ասում է. - «Կպահանջեի, որ գոնե նախկին հզորության 50 %-ի չափով վերականգնվեին կարի և տրիկոտաժի արտադրությունները, գիտական պոտենցիալ ունեցող հիմնարկները»:

Սակայն պետությունն այսօր ի վիճակի չէ սեփական ուժերով ստեղծել այնքան աշխատատեղ, որքան անհրաժեշտ է: Այդ խնդրի լուծման համար հարկավոր են մեծ ներդրումներ դրսից: Եվ դրա նախապայմաններն այսօր ստեղծվել են:

«Հերիթիջ ֆաունդեյշն» կազմակերպության վերջերս հրապարակած զեկույցից երևում է, որ ԱՊՀ-ում Հայաստանն ունի տնտեսական ազատության ամենաբարձր աստիճանը:

Զեկույցում դիտարկված է աշխարհի 161 երկրների կառավարությունների մասնակցությունը տնտեսության մեջ, նրանց առևտրային և ֆինանսական քաղաքականությունը, առկա հարկային բեռը, բանկային համակարգերը, կապիտալի շարժը, արտասահմանյան ներդրումները, սեփականության իրավունքի վիճակը, աշխատավարձերն ու գնային քաղաքականությունը, ինչպես նաև կոռուպցիան և «ստվերային շուկան»: Այդ գործոնների ուսումնասիրությունից պարզվել է, որ Հայաստանն աշխարհում զբաղեցնում է 44-րդ տեղը և դասվում է «հիմնականում ազատ» պետությունների շարքին: Բացի այդ, Հայաստանն ու Լիտվան գրավել են երկրորդ տեղը՝ որպես «դասակարգման» ստեղծումից, այսինքն 1995 թվականից մինչ օրս, առավել առաջընթաց ունեցած երկրներ:

Այս տարի լրանում է Համաշխարհային բանկի գործունեության տասնամյակը Հայաստանում: Ըստ ՀԲ արտաքին կապերի պատասխանատու Վիգեն Սարգսյանի, այդ տասնամյակի ընթացքում հաստատվել է 30 վարկային ծրագիր՝ 697,2 մլն դոլար ընդհանուր գումարով:

«Քանզի ՀԲ գլխավոր առաքելությունն աղքատության նվազեցումն է, ծրագրերը հիմնականում սոցիալական ուղղվածություն ունեն: Ես կդժվարանամ այս պահին նշել որևէ ծրագիր, որն իր անմիջական կամ ոչ անմիջական ազդեցությունը չունենա սոցիալական ոլորտի վրա», - ասում է Սարգսյանը: Բանկը ֆինանսավորել է շուրջ 100 փոքր ու միջին արդյունաբերական ձեռնարկություն և ուղղակիորեն օգնել 2800 աշխատատեղ ստեղծելուն: Գյուղատնտեսության ոլորտում բանկի կատարած ներդրումներն աշխատանք են ապահովում 7500 ընտանիքների համար: 715 կիլոմետր մայրուղիներ Հայաստանում վերականգնվել է ՀԲ ֆինանսավորած ծրագրերի միջոցով:

««Լինսի» հիմնադրամի ծրագրի շրջանակներում մենք իրականացնում ենք ընդհանուր օգտագործման ճանապարհների շինարարության, վերակառուցման, վերանորոգման և Երևանի փողոցների վերականգնման ծրագրերը», - ասում է «Ճանապարհաշինություն» ծրագրի իրականացման գրասենյակի տնօրեն Էդուարդ Բեզոյանը: Նա հայտնում է, որ այդ դրամաշնորհների օգնությամբ Երևանում ստեղծվել է 650-700, իսկ մարզերում՝ 6000-6500 աշխատատեղ:

«Լինսի» հիմնադրամը Հայաստանին տրամադրել է նաև 43,8 մլն դոլարի դրամաշնորհ՝ աղետի գոտու վերականգնման, և 17,5 մլն դոլարի դրամաշնորհ՝ մշակույթի օբյեկտների վերանորոգման համար, ինչպես նաև փոքր և միջին բիզնեսի զարգացմանն ուղղված 20 մլն դոլարի վարկ: Վերջին գումարով վարկավորվել է շուրջ 50 ծրագիր, ինչի շնորհիվ ստեղծվել է 3000 աշխատատեղ:

Միջազգային կազմակերպությունների հետազոտությունները ցույց են տալիս, որ բնակչության կեսից ավելիի կենսամակարդակը աղքատության մակարդակից ցածր է:

Ըստ Համաշխարհային բանկի, Հայաստանում արձանագրվել է տպավորիչ աճ, սակայն հետ են մնում արդարացի բաշխման ու կայունության ասպեկտները:

Արտարժույթի միջազգային հիմնադրամի 2002 թ. հոկտեմբերի 9-ի Հայաստանին նվիրված փաստաթղթում, իր հերթին, ասվում է. - «Կոռուպցիայի մակարդակն անհրաժեշտ է նվազեցնել, որպեսզի երաշխավորվի տնտեսական արագ աճի պտուղների ավելի հավասարաչափ բաշխումը բնակչության շրջանում»:

Իսկ զեկույցում ներկայացված մարդիկ շատ պարզ հույսեր են փայփայում, ինչպես Երևանի դեղատան աշխատող 20-ամյա Մարինեն. - «Ե՞րբ է մարդկանց աշխատավարձը բավարարելու գոնե նվազագույն կարիքները հոգալուն»: