Պաշտոնատար մի անձի հավաստմամբ, այս Նոր Տարին Հայաստանի բնակիչները կտոնեն Հայաստանի սահմաններից դուրս հատված տոնածառերի շուրջը:

Տոնածառերի աճող բիզնեսը և անցյալ տասնամյակի հոսանքազուրկ ցրտաշունչ ձմեռների առաջ բերած անտառահատումների երկարատև հետևանքները հիմք են տվել բնության սիրահարներին և բնապահպաններին մտահոգվել Հայաստանի մշտադալար ծառերի ապագայով:

Համաձայն Բնապահպանության նախարար Վարդան Այվազյանի հրամանի, այս տարի Հայաստանի անտառներում չի հատվելու ոչ մի փշատերև ծառ, քանի որ անտառներն արդեն բավականաչափ տուժել են ցուրտ ու մութ տարիներին:

Այվազյանն ասում է, որ ծառերը պաշտպանելու նպատակով նախարարությունը համագործակցելու է Երևանի քաղաքապետարանի և Մաքսային վարչության հետ:

«Համատեղ ուժերով մենք կփորձենք բացառել տոնածառերի հատումները Հայաստանի տարածքում, որքանով դա հնարավոր է», - ասում է Այվազյանը:

Երևանի քաղաքապետը միացել է ծառահատումերի դեմ արշավին՝ մայրաքաղաքում տոնածառերի վաճառքի ավելի խիստ կանոններ սահմանելով:

«Այս տարի բոլոր փողոցներում և ամեն ծառի տակ տոնածառ չեն վաճառի, - ասաց քաղաքապետ Ռոբերտ Նազարյանը, - Ամեն համայնք կունենա իր վաճառատեղը»:

Տոնածառերի հատման արգելքը խախտողները կտուգանվեն 150000 դրամի չափով (մոտ 260 դոլար) յուրաքանչյուր ծառի համար:

Մտահոգությունն այն է, որ տոնակատարությունները կործանարար հետևանքներ են ունենում Հայաստանի անտառների համար:

Նոր տարին թարմ կանաչ ծառով սկսելու ավանդույթը առաջ է բերել վերջին տարիներին այս արժեքավոր բնական ռեսուրսը կորցնելու նվազ տոնական ավանդույթը:

Կամ էլ, ըստ Կանաչների միության նախագահ Հակոբ Սանասարյանի, «դա նշանակում է սկսել տարին բնության նկատմամբ իրականացված վանդալիզմով»:

Պաշտոնապես անտառները կազմում են Հայաստանի ամբողջ տարածքի ընդամենը 11 տոկոսը, և ակտիվիստներն անհանգստանում են, որ նոր հատումները կարող են կործանարար լինել անտառների համար:

«Այս թիվը ճշգրիտ չէ, քանի որ վերջին լուրջ հետազոտությունը կատարվել է 10 տարի առաջ, իսկ վերջին 10 տարվա ընթացքում համեմատական առումով ավելի շատ ծառեր են հատվել, քան առաջ», - ասում է «Հայանտառ» ՓԲԸ մամլո ծառայության ղեկավար Արծրուն Պեպանյանը:

«Հայանտառի» թույլտվությամբ 2001 և 2002 թվականների ամանորյա տոնակատարությունների համար հատվել են, համապատասխանաբար, 30000 և 15000 սոճիներ (միակ փշատերև ծառատեսակը Հայաստանում):

Սակայն մտահոգված բնապահպաններն ասում են, որ դրանք պարզապես թղթի վրա գրված թվեր են, և միայն այն մարդիկ, ովքեր կտրում և վաճառում են սոճիները, գիտեն, թե փաստացիորեն քանի ծառ է հատվել և քանիսն է նետվել աղբակույտերը:

Մի գործարար, որն իր հետագա գործունեությանը չվնասելու համար ցանկացավ անանուն մնալ, իր սեփական օրինակով հաստատում է Սանասարյանի կարծիքը. նա հավատացնում է, որ անցյալ տարի միայն ինքը վաճառել է 16000 սոճի:

Սանասարյանի հավաստմամբ, տոնածառերը հատելիս հաշվի չեն առնում ո՛չ ծառերի որակը, ո՛չ էլ տարիքը:

Շուկաներում հիմնականում վաճառվում են 20-30 տարեկան սոճիներ: Եթե հաշվի առնենք, որ սոճիներն ապրում են 300 տարի, ապա ստացվում է, որ հատվում են ամենաառողջ, ամենափարթամ և ամենաերիտասարդ ծառերը: Որոշ ծառերի միայն գագաթներն են կտրում, սակայն անգամ դրանից ամբողջ ծառը մահանում է:

Կանաչների միությունը ձեռնարկել է կրթական ծրագիր, որն օգնում է սովորեցնել դեռահասներին գնահատել ծառերը և հետ պահել նրանց կտրված սոճիները տոնական զվարճալիք դարձնելուց: Միությունը խրախուսում է Հայաստանի բնակիչներին մշտական օգտագործման համար աճեցնել իրենց սեփական տոնածառերը և սերմեր ու աճեցնելու հրահանգներ է բաժանել:

Սակայն ծառահատման դեմ արշավը չի նշանակում, որ Հայաստանի բնակիչները նշելու են Ամանորն առանց երիտասարդ եղևնիների բույրի: Անցած տարիների նման, դրանք կներկրվեն Վրաստանից, Ռուսաստանից և Ղարաբաղից:

Սակայն ներկրված ծառերի գինը երկու-երեք անգամ գերազանցում է տեղական ծառերինը: Ակնկալվում է, որ այդ արտոնության համար կանաչ նոր տարի փափագող երևանցիները վճարելու են 12-ից 20 դոլար: