Թենիս (ՊԹԱ-ի մրցաշար)

Նալբանդյանը բարելավում է իր խաղը

Արգենտինահայ Դավիթ Նալբանդյանը դուրս է եկել քառորդ եզրափակիչ Հռոմում անցկացվող Վարպետների շարքի «Տելեկոմ Իտալիա» մրցաշարում:

Կավե ծածկույթի վրա ընթացող մրցաշարի առաջին երեք փուլում 5-րդ համարի տակ ցանված Նալբանդյանը հաղթանակի հասավ շվեդ Ռոբին Սոդերլինգի (6-4, 6-4), բրազիլացի Ֆլավիո Սարետայի (6-2, 6-4) և իտալացի Ֆիլիպո Վոլանդրիի նկատմամբ (7-6 (4), 3-6, 6-4): Քառորդ եզրափակիչում նրա մրցակիցը կլինի ամերիկացի Վինսենթ Սփեյդին:

Նալբանդյանն Իտալիա է ժամանել իսպանական Բարսելոնա քաղաքից, որտեղ Միջազգային շարքի մրցաշարի քառորդ եզրափակիչում 6-7 (1), 4-6 հաշվով զիջել էր բելգիացի Կրիստոֆ Ֆլիգենին: Իսպանիայում Նալբանդյանը վաստակեց 15 հաշվարկային միավոր և 22325 դոլար: ՊԹԱ-ի աղյուսակում նա 39-րդ հորիզոնականից բարձրացավ 29-րդը:

Հայաստանը ներկայացնող Սարգիս Սարգսյանի համար շաբաթն այդքան հաջող չէր: Հռոմի մրցաշարում երևանցի թենիսիստը պարտություն կրեց առաջին փուլում: ՊԹԱ-ի աղյուսակում նա այժմ 71-րդն է:

Շախմատ (ՖԻԴԵ-ի գործակիցների աղյուսակ)

ՖԻԴԵ-ի 100 լավագույն շախմատիստների վերջին ցուցակում կրկին ընդգրկված են Հայաստանը ներկայացնող 4 գրոսմայստերներ:

Վլադիմիր Հակոբյանը, որը 2689 միավորով զբաղեցնում է 21-րդ հորիզոնականը, շարունակում է մնալ Հայաստանի լավագույն շախմատիստը, թեև երկու հորիզոնականով զիջել է դիրքերը:

Հակոբյանին 2639 միավորով հաջորդում է Ռաֆայել Վահանյանը, որը անցած չորս ամսում 74-րդ տեղից բարձրացել է 54-րդ տեղ՝ շրջանցելով Սմբատ Լպուտյանին, որը նահանջել է երկու հորիզոնականով և այժմ 2634 միավորով գրավում է 60-րդ տեղը:

Վերջապես, հայաստանցի շախմատիստների ցուցակը եզրափակում է Գաբրիել Սարգսյանը, որը 2614 միավորով 89-րդ տեղում է: Հունվարին հրապարակված նախորդ աղյուսակի համեմատությամբ նա նահանջել է 11 հորիզոնականով:

Աշխարհի թիվ մեկ շախմատիստ Գարրի Կասպարովն ունի 2817 միավոր:

Հայաստանի կանանց շախմատը միայն մեկ ներկայացուցիչ ունի ՖԻԴԵ-ի 50 լավագույն շախմատիստուհիների ցուցակում: Գրոսմայստեր Էլինա Դանիելյանը 2418 միավորով զբաղեցնում է 37-րդ հորիզոնականը: Նա իր հունվարյան դիրքերը զիջել է 5 կետով: