ArmeniaNow.com - Independent Journalism From Today's Armenia
March 5, 2004




Պատերազմաշունչ ելույթներ. չնայած ռազմատենչ ճառերին ռազմական գործողությունների վերսկսումը Ադրբեջանի հետ հավանական չէ

Իսկանդարյանն ասում է, որ սպանությունը լարվածություն է առաջ բերել երկու երկրների միջև

Վերլուծաբանների և դիվանագետների կարծիքով թեև հայ սպա Գուրգեն Մարգարյանի սպանությունն ադրբեջանցի զինվորականի կողմից լարվածություն է առաջ բերել երկու երկրների միջև, սակայն քիչ հավանական է, որ այն կհանգեցնի զինադադարի խախտմանը:

Բուդապեշտում ընթացող ՆԱՏՕ-ի դասընթացներում կատարված սպանության վայրագ բնույթը ցնցեց հասարակայնությանը: Մինչ Հայաստանի իշխանությունները կոչ են անում եվրոպական կառույցներին դատապարտելու հանցագործությունը, Ադրբեջանում ծավալվում է լայնամասշտաբ քարոզարշավ հօգուտ սպանության մեջ մեղադրվող ադրբեջանցի ավագ լեյտենանտ Ռամիլ Սաֆարովի պաշտպանության:

Որոշ հասարակական գործիչներ կոչ են արել հետևել Սաֆարովի օրինակին և սպանել հայերին:

Անցյալ շաբաթ Երևանում կայացած Մարգարյանի հուղարկավորությունը համընկավ 1988 թվականի Սումգայիթի հայկական ջարդերի 16-րդ տարեդարձը նշող պաշտոնական արարողությանը:

Հազարավոր մարդիկ էին հավաքվել հիշատակի տուրք մատուցելու Սումգայիթի զոհերին և սպանված սպային: Ոմանք պաստառներ էին կրում «Նույն կացինը, որ սպանեց հայ սպային, հազարավոր հայերի սպանեց Սումգայիթում» մակագրությամբ:

Նախագահ Քոչարյանը հայտարարեց, որ Ադրբեջանի ռազմատենչ ելույթները չեն նշանակում, որ վերսկսվելու են պատերազմական գործողությունները, սակայն առկա է դրանց վերսկսման տեսական հնարավորությունը, քանի որ շարունակվում է երկրների հակամարտությունը Լեռնային Ղարաբաղի կապակցությամբ:

Հասարակության մտահոգությունը ռազմական գործողությունների հնարավոր վերսկսման առիթով մեծացավ այն բանից հետո, երբ մի քանի երևանյան լրագրեր տպագրեցին տեղեկություններ, իբր Հայաստանի զինվորական ղեկավարությունը ձեռնարկել է պահեստայինների լայնամասշտաբ զորակոչ և իբր մինչև 45 տարեկան հայ տղամարդկանց թույլ չեն տալիս մեկնել Հայաստանից:

Պաշտպանության նախարար Սերժ Սարգսյանը չորեքշաբթի օրը լրագրողների հետ կայացած հանդիպման ժամանակ հերքեց այդ լուրերը: «Դա չի համապատասխանում իրականությանը, իսկ եթե համապատասխաներ, ինչու՞ պիտի գաղտնի պահեինք», ասաց նա:

Նա հայտնեց, որ պահեստայինների զորակոչը զորամասեր կանոնավոր բնույթ է կրում, քանի որ ամեն գարուն կատարվում է զինակետերի և դիրքերի ամրացում:

ԼՂՀ նախագահ Արկադի Ղուկասյանի խորհրդական Մանվել Սարգսյանը նշեց. «Բուդապեշտում կատարվածի նման միջադեպերը կարող են կամ ապակայունացնել իրավիճակը, կամ էլ հակամարտող կողմերին դրդել կառուցողական երկխոսության»:

Նա ասում է, որ Ադրբեջանը պետք է գիտակցի, որ ադրբեջանցի սպայի գործողություններն արդարացնելու փորձերը կխոչընդոտեն խաղաղարար գործընթացին, մինչդեռ հանցագործության արժանի դատապարտումը կարող է նվազեցնել լարվածությունը:

«Եղել են նախադեպեր, երբ Հայաստանի և Ադրբեջանի հոգևոր առաջնորդները միջամտել են պատանդների փոխանակման երկարաձգված գործընթացին, և նրանց աջակցությունը նպաստել է մարդկանց ավելի վաղ վերադարձին իրենց երկրները», ասում է Սարգսյանը:

Սակայն Ղարաբաղի հարցի սիստեմատիկ քաղաքական շահարկումներն Ադրբեջանում հանգեցրել են հայերի նկատմամբ ծայրահեղ թշնամական հասարակական կարծիքի ձևավորմանը:

Հայաստանի պաշտպանության նախարարը հավաստիացնում է, որ իրավիճակը սահմաններում կայուն է

«Այսօր Ադրբեջանի քաղաքական վերնախավը դարձել է վերջին տասնամյակում հայերի նկատմամբ ատելություն և վրեժխնդրություն սերմանելու սեփական քաղաքականության պատանդը», ասում է Լրատվամիջոցների կովկասյան ինստիտուտի հետազոտական խմբի ղեկավար Ալեքսանդր Իսկանդարյանը:

«Դա ցույց է տալիս, որ Ադրբեջանն անկարող է հակամարտության կարգավորմանն ուղղված կառուցողական որոշումներ ընդունել, քանի դեռ չի փոխել իր քաղաքականությունը: Կարգավորմանն ուղղված ցանկացած որոշում Ադրբեջանում կարող է հանգեցնել քաղաքացիական պատերազմի», նշում է Իսկանդարյանը:

Հայաստանի ազգային և միջազգային հետազոտությունների կենտրոնի վերլուծաբան Ստեփան Սաֆարյանը հույս է հայտնում, որ միջազգային հանրությունը գնահատական կտա այն հանգամանքին, որ Ադրբեջանը չի ցանկանում բարելավել հարաբերությունները Հայաստանի հետ նույնիսկ ՆԱՏՕ-ի նման կազմակերպությունների շրջանակներում:

«Անցյալ տարի Ադրբեջանի իշխանությունները թույլ չտվեցին հայ սպաներին ժամանել Բաքու ՆԱՏՕ-ի «Լավագույն համատեղ ջանք» հանդիպմանը մասնակցելու համար», ասում է Սաֆարյանը:

«Դեռ ավելին, հայ սպայի սպանությունը Բուդապեշտում, անկախ նրանից, դա ծրագրված է եղել ադրբեջանական իշխանությունների կողմից, թե իրականացվել է ադրբեջանցի սպայի անձնական նախաձեռնությամբ, ցույց է տալիս, որ Ադրբեջանը խաղում է իր սեփական կանոններով և այսօր նախընտրում է ագրեսորի դերը՝ կառուցողական համագործակցության փոխարեն»:

Հայաստանում ԱՄՆ դեսպան Ջոն Օրդուեյը մամուլի ասուլիսի ժամանակ հայտնել է, որ անհավանական է համարում պատերազմի վերսկսումը, և որ Վաշինգտոնը կանի ամեն ինչ այն կանխելու համար:

«Զինադադարի խախտումը չի բխում ոչ մեկի շահերից, և ես վստահ եմ, որ ԵԱՀԿ Մինսկի խմբի համանախագահները վճռականորեն են տրամադրված շարունակելու խաղաղության բանակցությունները և գտնելու կայուն և արդար կարգավորում», ասաց Օրդուեյը:

Բուշի վարչակարգի առաջարկած 2005 թվականի ֆինանսական տարվա բյուջեում, որը հրապարակվել է անցյալ ամիս, նախատեսվում է Ադրբեջանին ցույց տալ 8 մլն դոլարի ռազմական օգնություն, իսկ Հայաստանին՝ ընդամենը 2 մլն:

Դեսպանը բացատրեց այս անհամամասնությունը ահաբեկչության և թմրադեղերի դեմ պայքարը խթանելու անհրաժեշտությամբ: «Այն չի խախտի ռազմական հավասարակշռությունը տարածաշրջանում», վստահեցրեց դեսպանը:


According to Agnes
 

  Inside
 

War Talk: Rhetoric sharpens but renewed conflict with Azerbaijan seen as unlikely

Full story

 
 

Counted In: Census reports final conclusions on Armenia 's population

Full story

 
 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Coming Soon. New Armenian Church in Russian Capital.

A new Armenian church will soon open in Moscow. During his visit to Moscow Catholicos of All Armenians Garegin II expressed his approval of the course of constructions.This is how Surb Khach (Saint Cross) church will look when completed.

 

 





Copyright ArmeniaNow.com 2002-2024. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.