Հայաստանում Ամերիկայի Միացյալ Նահանգների դեսպան Ջոն Օրդուեյը պաշտոնապես հերքեց այն լուրերը, թե Եվրոպայի անվտանգության և համագործակցության կազմակերպության (ԵԱՀԿ) Մինսկի խմբի ամերիկացի համանախագահը հանդես է եկել ղարաբաղյան հակամարտության կարգավորման նոր առաջարկով:

Հինգշաբթի հայ լրագրողների հետ կայացած հանդիպման ժամանակ ԱՄՆ դեսպանը հայտնեց, որ ԵԱՀԿ համանախագահները վերջին քննարկումներից հետո ոչ մի ստույգ առաջարկով հանդես չեն եկել:

Որոշ լրատվամիջոցներ հայտնել են, թե հունիսի սկզբին Երևան կատարած այցի ընթացքում ԱՄՆ դեսպանորդ Սթիվեն Մանը նախագահ Ռոբերտ Քոչարյանի հետ քննարկել է ղարաբաղյան հակամարտության խաղաղ կարգավորման ծրագիր: Ըստ լրատվամիջոցների՝ այդ ծրագրով նախատեսվում է Հայաստանի կողմից գրավված Ադրբեջանի յոթ շրջաններից երեքի վերադարձը նախքան Ղարաբաղի կարգավիճակի մասին բանակցություններ սկսելը և Հայաստանի շրջափակումը վերացնելը: Մանն այդ կապակցությամբ մեկնաբանություններով հանդես չի եկել:

«Որպես կանոն, իմ իրավասությունների մեջ չի մտնում համանախագահների գործունեությունը մեկնաբանելը,- ասաց դեսպանը: - Այնպես որ, կարծում եմ՝ կարող եմ ասել այդքանը, և ոչ թե խորամուխ լինել բանակցությունների մանրամասների մեջ, ինչն ինձ չի պատշաճում»:

Օրդուեյն իր մտահոգությունն արտահայտեց հայ-ադրբեջանական շփման գծում վերջերս տեղի ուենցած բախումների առիթվ: Փոխհրաձգության ընթացքում Հայաստանի Տավուշի մարզում սպանվել է մի հայ սպա: Երկու կողմերն էլ կրակը հրահրելու մեջ մեղադրում են միմյանց:

Դեսպանն ասաց, որ տեղյակ չէ արտգործնախարար Վարդան Օսկանյանի և ԱՄՆ պետքարտուղար Քոլին Փաուելի այս շաբաթվա սկզբին Վաշինգտոնում կայացած հանդիպման մանրամասներին: Հանդիպման ընթացքում քննարկվել է ղարաբաղյան հակամարտության կարգավորման հարցը:

Փոխարենը դեսպանը հույս հայտնեց, որ առաջընթացք կնկատվի հաջորդ շաբաթ Պրահայում կայանալիք Հայաստանի և Ադրբեջանի արտգործնախարարների բանակցություններում: «Մեր կարծիքով՝ երկու կողմերն էլ վճռական են տրամադրված հակամարտության խաղաղ կարգավորման հասնելու գործում, և մենք պատրաստ ենք սատարելու նրանց»,- ասաց Օրդուեյը՝ ավելացնելով, որ ԱՄՆ-ը կողմ է տևական կարգավորման ցանկացած տարբերակի, որ ընդունելի կլինի երկու կողմերի և միջազգային հանրության համար:

Այս շաբաթ Ադրբեջանի նախագահ Իլհամ Ալիևը հայտարարեց, որ հույս ունի, թե մոտակա տարիներին հնարավոր կլինի հասնել հակամարտության խաղաղ կարգավորմանը՝ միաժամանակ ավելացնելով, որ «Ադրբեջանի ժողովուրդը, անկասկած, հետ կվերադարձնի գրավյալ տարածքները»:

Բաքվի թերթերից մեկը հայտնում է, որ Պրահայի հանդիպման ընթացքում պաշտոնական Բաքուն կառաջարկի ստորագրել վերջնական համաձայնագիր «յոթ տարածքների վերադարձի մասին»: Ադրբեջանի արտգործնախարար Էլդար Մամեդյարովն ասել է, որ տեղյակ չէ Մանի կողմից արված որևէ առաջարկի:

«Եթե անգամ եթե դա ճիշտ է, ադրբեջանական կողմը հայտնել է իր տեսակետը և առաջարկ է անելու ոչ թե երեք, այլ յոթ շրջանների առնչությամբ»,- ասել է Մամեդյարովը: