Շախմատի միջազգային ֆեդերացիան՝ ՖԻԴԵ-ն, շարունակում է կազմակերպել ականավոր հայ շախմատիստ և աշխարհի 9-րդ չեմպիոն Տիգրան Պետրոսյանի հիշատակին նվիրված մրցաշարեր: ՖԻԴԵ-ն 2004 թվականը հայտարարել է Տիգրան Պետրոսյանի տարի:

2004-ը նրա տարին է

Պետրոսյանի 75-ամյակին նվիրված մրցաշարին մասնակցելու համար, որը կանցկացվի «Արարատ-Հայաթ» հյուրանոցում մինչև հունիսի 15-ը, Մոսկվա է ժամանել 12 գրոսմայստեր:

Գրոսմայստերները բաժանված են երկու թիմերի:

«Տիգրան Պետրոսյան» թիմի կազմում են այնպիսի հանրահայտ գրոսմայստերներ, ինչպիսիք են աշխարհի ներկայիս լավագույն շախմատիստ Գարրի Կասպարովը (անհատական գործակիցը՝ 2817), ՖԻԴԵ-ի աղյուսակում 4-րդ տեղում գտնվող Պետեր Լեկոն Հունգարիայից (գործակիցը՝ 2741), իսրայելցի Բորիս Գելֆանդը (13-րդ տեղ, գործակիցը՝ 2714): Թիմում են նաև Հայաստանի երեք լավագույն շախմատիստները՝ Վլադիմիր Հակոբյանը (21-րդ տեղ, գործակիցը՝ 2689), Ռաֆայել Վահանյանը (54-րդ տեղ, գործակիցը՝ 2639) և Սմբատ Լպուտյանը (60-րդ տեղ, գործակիցը՝ 2634):

Աշխարհի հավաքականը նույնպես համալրված է ուժեղ շախմատիստներով. աշխարհի երկրորդ ուժեղագույն շախմատիստ հնդիկ Վիշվանաթան Անանդը (գործակից՝ 2774), Պյոտր Սվիդլերը Ռուսաստանից (6-րդ տեղ, գործակիցը՝ 2733), Մայքլ Ադամսն Անգլիայից (8-րդ տեղ, գործակիցը՝ 2731), Էտյեն Բակրոն Ֆրանսիայից (27-րդ տեղ, գործակիցը՝ 2675), Ֆրանսիսկո Վալյեխոն Իսպանիայից (35-րդ տեղ, գործակիցը՝ 2666) և, վերջապես, Լուկ վան Վելլին Հոլանդիայից (46-րդ տեղ, գործակիցը՝ 2651):

Առաջին տուրից հետո աշխարհի հավաքականը (ԱՀ) հաղթում է «Տիգրան Պետրոսյան» (ՏՊ) թիմին՝ 3-2:

Ահա առաջին տուրի արդյունքները.

Գարրի Կասպարով (ՏՊ) – Լուկ վան Վելլի (ԱՀ) 1:0
Պետեր Լեկո (ՏՊ) – Մայքլ Ադամս (ԱՀ) զ:զ
Պյոտր Սվիդլեր (ԱՀ) - Բորիս Գելֆանդ (ՏՊ) 1:0
Վլադիմիր Հակոբյան (ՏՊ) – Ֆրանսիսկո Վալյեխո (ԱՀ) զ:զ
Էտյեն Բակրո (ԱՀ) – Ռաֆայել Վահանյան (ՏՊ) զ:զ
Վիշվանաթան Անանդ (ԱՀ) – Սմբատ Լպուտյան (ՏՊ) 1:0

Այս տարի Տիգրան Պետրոսյանի 75-ամյակին նվիրված մեկ այլ մրցաշար է անցկացվել Ստեփանակերտում, որտեղ մրցանակների համար պայքարի էր ելել 10 շախմատիստ Հայաստանից, Ռուսաստանից, Շվեյցարիայից, Լեհաստանից, Լատվիայից և Իրանից:

Դա Լեռնային Ղարաբաղի Հանրապետությունում կազմակերպված մարզական առաջին միջազգային մրցաշարն էր: