Այս շաբաթ էներգետիկայի նախարար Արմեն Մովսիսյանը հայտարարեց, որ Մեծամորի ծերացող ատոմակայանի փոխարեն նոր ատոմակայանի կառուցումը Հայաստանի կառավարությունը համարում է հնարավոր այլընտրանքներից մեկը:

Մեծամորի ապագան անորոշ է

Մովսիսյանը հայտնեց լրագրողներին, որ դա «բավական մրցունակ տարբերակ է»: Նախարարն ասաց, որ այդ հավակնոտ ծրագիրը հնարավոր է իրականացնել այն 1 միլիարդ դոլարով, որ Հայաստանի կառավարությունը պահանջում է Եվրամիությունից Մեծամորի ատոմակայանը փակելու դիմաց:

Առայժմ Եվրամիությունն առաջարկում է միայն 100 մլն եվրո (123 մլն դոլար) կայանի փակումը ֆինանսավորելու համար: Միության անդամները վկայակոչում են 2004 թվականին ատոմակայանը փակելու Երևանի խոստումը: Նրանք այն կարծիքին են, որ Հայաստանի լեռնոտ տարածքը չափազանց ենթակա է երկրաշարժերի այստեղ ապահով գործող ատոմակայան տեղադրելու համար:

Երևանը պնդում է, որ առաջարկվող ֆինանսական աջակցությունը շատ հեռու է խորհրդային ժամանակաշրջանում կառուցված ատոմակայանը (որը բավարարում է հանրապետության էներգիայի պահանջի մոտ 40 տոկոսը) փոխարինելու համար բավարար լինելուց: «Նրանք ասում են, որ 100 մլն դոլար կտան: Բայց այդ գումարով անհնար է ատոմակայանը փակել և ստեղծել (էներգիայի) այլընտրանքային աղբյուրներ»,- ասաց վարչապետ Անդրանիկ Մարգարյանը:

Սակայն Մեծամորի հնարավոր այլընտրանքները թվարկելիս՝ Մարգարյանը չխոսեց նոր ատոմակայանի մասին: Նա խոսեց, մասնավորապես, Հայաստանի հիդրոէներգետիկական մեծ ներուժն օգտագործելու անհրաժեշտության մասին և շեշտեց հարևան Իրանի հետ համատեղ երկու երկրները բաժանող Արաքս գետի վրա խոշոր հիդրոկայան կառուցելու Հայաստանի ծրագրի կարևորությունը:

Կառավարությունը նաև նախատեսում է կառուցել տասնյակ փոքր հիդրոկայաններ ամբողջ Հայաստանում, որը հարուստ է լեռնային սրընթաց գետերով: Պաշտոնատար անձանց հավաստմամբ՝ ակնկալվում է, որ գերմանական պետական KfW բանկը հաջորդ տարի այդ նպատակով 30 մլն եվրո վարկ կտրամադրի Հայաստանին: Մարգարյանը և Մովսիսյանը խոսեցին լրագրողների հետ Գեղարքունիքի մարզ կատարած այցի ժամանակ, ուր մեկնել էին KfW-ի ֆինանսական աջակցությամբ կառուցված բարձրավոլտ ենթակայանի պաշտոնական բացման արարողությանը մասնակցելու համար: