ArmeniaNow.com - Independent Journalism From Today's Armenia
June 11, 2004




Հողային փակուղի. մի գյուղացու հողային երկընտրանքը

Մայիսի 25-ին Արարատի մարզի Դիմիտրով գյուղում աճուրդի հանվեցին և վաճառվեցին հողատարածքներ:

Դրանց մեջ էին նաև այն հողատարածքները, որոնք գյուղացիները տարիներ շարունակ մշակել էին:

Աստղիկ Թորոյանն ասում է, որ ոչ ոք չի հիշում իր որդուն

Անկախացումից անմիջապես հետո Հայաստանում հողը հանձնվեց գյուղացիներին: Որոշ ժամանակ անց հողի հարկ մտցվեց:

Երբ հողատարածքներն աճուրդի հանվեցին, գյուղի բնակիչների մեծ մասը չկարողացավ մասնակցել և հող գնել, որովհետև ի վիճակի չէր վճարելու գինը՝ 1000 քմ հողի համար միջինը 445 դոլար (գումարած 60 դոլար վարչական ծախսերը):

Որոշ գյուղացիներ ստիպված էին մի կերպ հայթայթել իրենց համար հսկայական այդ գումարները. հողը նրանց ապրուստի միակ միջոցն է: Իսկ նրանք, ովքեր չեն կարող գնել այդ հողատարածքները, այսօր երկընտրանքի առջև են հայտնվել:

«10 օրվա ընթացքում պետք է այդ գումարները մուծես: 10 օր էլ տրված է կադաստրում հարցերը կարգավորելուն: Գին են դրել, որ սարսափելի է, ի՞նչ եմ անելու, չգիտեմ»,- մտահոգված ասում է Աստղիկ Թորոյանը:

Թորոյանը պնդում է, որ գյուղապետը գաղտնի վաճառել է իր վարձակալած հողատարածքը, որի համար ինքը երկու տարի հարկ է վճարել:

«Այդ գումարն ինձ հետ չեն վերադարձրել,- ասում է նա,- կտրոնները մինչև հիմա պահում եմ»:

Ինը տարի շարունակ նա բարեխղճորեն վճարել է վարձակալած 5000 քմ հողատարածքի հարկերը:

Այսօր այդ հողատարածքը գնելու համար նրան պետք է 1 միլիոն 247 հազար դրամ՝ գումարած 180 հազար դրամ գրանցման համար:

«Էդ հողն ստիպված եմ առնում: Ես չեմ առնում, որ կալվածք սարքեմ: Չենք կարողանում ապրել: Գյուղացին առանց հողի չի կարող ապրել: Եթե չվճարեմ, իմ ձեռքից հողերը կվերցնեն: Արհամարհված է իմ ապրելու իրավունքը: Ապրելու միջոց չունեմ»,- ասում է 47-ամյա Թորոյանը:

Ինը տարի առաջ Թորոյանների ընտանիքին հատկացված այս հողատարածքները եղել են անմշակ, քար ու տատասկ: Տարիների չարչարանքով ընտանիքը բերրիացել է այդ հողերը, սակայն գյուղում ջրի պակասի պատճառով միայն ցորեն է աճեցնում:

«Տղաս կողքիս լիներ, դու ո՞վ էիր, որ ես քո հույսին մնայի,- ասում է Աստղիկը՝ մտովի դիմելով գյուղապետին: - Սիրտս կոտրված է, ես հավատ չունեմ այս պետության հանդեպ: 3 տարի տվեցին այն մարդուն, ում մեղքով որդիս մահացավ: Ո՞նց հավատաս այս պետությանը»:

Աստղիկի որդին՝ 23-ամյա լեյտենանտ Ահարոն Թորոյանը, 2001 թվականին զոհվել է հայկական բանակում ծառայելիս՝ դժբախտ պատահարից:

«Այս հողերն իմ Ահարոնն է մշակել: Ես հուշեր ունեմ այդ հողերի հետ կապված: Թող չմտածեն, թե իմ տղայի առիթն եմ օգտագործում,- ասում է Թորոյանը: - Պետությունը չի գործում, օրենք չկա: Ինչո՞ւ պետք է իմ երեխան գնա կորի, իսկ ես այսօրվա օրով խեղճանամ: Ոչ ոք հաշվի չի առնում իմ տղային: Անմեղ տեղը երեխաս գնաց կորավ: Ինչո՞ւ այդպես եղավ: Էլի ղեկավարության մեղքով: Այսօր ոչ մեկը չի հիշում իմ տղային»:

Տարիներ առաջ Աստղիկը կորցրել է նաև 13-ամյա դստերը: Այսօր նա ապրում է ուսանող դստեր և որդու հետ: Ամուսինը մի քանի տարի առաջ մեկնել է Ռուսաստան փող վաստակելու, սակայն այնտեղ ծանր հիվանդացել է և դարձել անաշխատունակ:

Աստղիկն ինքն էլ հիվանդ է, երրորդ կարգի հաշմանդամ է: Սակայն նրա սոցիալական ծանր կացությունը, հայրենիքին ծառայելու ընթացքում զոհված որդու հանգամանքը նրա համար որևէ արտոնություն, հողի գնի հարցում որևէ զեղչ չեն նախատեսում:

Գյուղապետն արդեն մերժել է Աստղիկի խնդրանքը՝ օգնել գոնե հարկերը վճարել. «Այդ գումարներով բարեկարգելու ենք գյուղը»,- ասել է նա:

«Թե ի՞նչն են բարեկարգելու, չգիտեմ: Մինչև հիմա որևէ բարեկարգում չենք տեսել, մինչև անգամ առուներով ջուր չի հոսում»,- ասում է Աստղիկը:

«Ես երբեք գյուղապետից օգնություն չեմ խնդրել, բայց նա պետք է հասկանա յուրաքանչյուրի ցավը: Ես չեմ կարող խոսել զոհված որդուս մասին, չեմ կարող արտասանել «զոհված» բառը, որովհետև ինձ թվում է, որ իմ տղան չի զոհվել, մի ուրիշ տեղ է գնացել»:

Հողը չկորցնելու համար Աստղիկը վաճառել է անասունները:
«Այդ անասունով էինք ապրում, էդ էլ վաճառեցինք: Մեկ կովի գինը 300 դոլար է, այն էլ, գիտե՞ս, քանի տարի եմ տանջվել, որ վաճառեմ 300-ով: Կովս 5 տարեկան էր»:

Սակայն անասունի վաճառքից ստացած գումարը չնչին է հողատարածքների գնի համեմատ: Գյուղացիները պարտքով փող ու ոսկեղեն են տվել, որպեսզի բանկում գրավ դնի փողի դիմաց:

«Քրոջս ոսկեղենը վերցրեցի, հարևանուհիս ականջներից ոսկյա ականջօղերը հանեց տվեց: Ի՞նչ անեմ, երեխայիս համար գյուղացիները խաթր են անում»:


According to Agnes
 

 


The Week in seven days

 
 


The Arts in seven days

 

  Photo of the week
 
Click on the photo above to enlarge.
 
 
 
 
A Wing and a Prayer

Church officials were on hand Monday to bless construction of a new terminal at Zvartnots International Airport.

 

 


 
A Byte with...

Khoren Abrahamyan

Full story


 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.