«Ոսկե ծիրան» միջազգային կինոփառատոնը կիրակի ավարտեց իր աշխատանքը, և նման խոշոր կինոմիջոցառում կազմակերպելու Հայաստանի առաջին փորձն արժանացավ իրարամերժ արձագանքների:

Մինչ հյուրերը բարեկրթորեն նշում էին բացման արարողությունը, հետնաբեմում կանգնածները դժգոհում էին ծրագրի կազմակերպման անբավարար մակարդակից:

Սակայն մեծամասնությունն այն կարծիքին էր, որ իբրև առաջին փորձ այն հաջողված էր:

«Սա առաջին փորձն է և առաջին քայլը, բայց, հավատացեք, ձեր փառատոնն այս տարի ծնվեց և կքայլի հաստատուն քայլերով և հետագայում էլ իր մասին խոսել կտա»,- ասաց խաղարկային ֆիլմերի ժյուրիի նախագահ Պետեր վան Բուրենը (Նիդեռլանդներ):

Փառատոնի չորս օրերը գերհագեցած էին. ցուցադրում էին ֆիլմ ֆիլմի հետևից (բոլոր անվանակարգերում ընդամենը 200 ֆիլմ), և զարմանալի չէ, որ որոշ ցուցադրումներ ընթանում էին գրեթե դատարկ դահլիճներում, հատկապես հաշվի առնելով, որ ֆիլմերի ցուցադրումն սկսվում էր առավոտյան 9:30-ին:

«Պետք չէ վհատվել, մի կարծեք, թե հայտնի փառատոները միանգամից են ճանաչում ձեռք բերել,- ասաց ժյուրիի անդամ, Մոսկովյան միջազգային կինոփառատոնի ծրագրերի ղեկավար Կիրիլ Ռազլոգովը: - Կան իրոք դիտարժան ֆիլմեր և հայ մեծ ռեժիսորներ, որ զարմանալիորեն Հայաստանում ճանաչում չունեն»:

Փառատոնի ծրագրում ընդգրկվել էին վերջին տարիների շվեդական, իտալական, գերմանական և բուլղարական լավագույն կինոնկարներ, ինչպես նաև Ռոտերդամի միջազգային կինոփառատոնի մրցանակակիր ֆիլմեր, որոնք ցուցադրվեցին «Երևանյան պրեմիերաներ» խորագրի ներքո:

Հետահայաց ֆիլմերի ցուցադրմամբ տոնվեց «Հայֆիլմ» կինոստուդիայի հիմնադրման 80-ամյակը, որի առթիվ նկարիչների միությունում բացվեց հայ կինոնկարիչների աշխատանքների ցուցահանդեսը:

Նշանակալի միջոցառումներով նշվեց Սերգեյ Փարաջանովի ծննդյան 80-ամյակը: Հոբելյանին ներկա էին ռեժիսորի կինը` Սվետլանա Շչերբատյուկը, և որդին` Սուրեն Փարաջանովը: Հուլիսի 4-ին «Նաիրի» կինոթատրոնում տեղի ունեցավ Սերգեյ Փարաջանովին նվիրված «Ես մահացել եմ մանուկ հասակում» ֆիլմի պրեմիերան (ռեժիսոր` Գեորգի Փարաջանով): Փարաջանովի 80-ամյակը նշելու էին եկել նաև վրաց դերասանուհի, «Նռան գույնը» ֆիլմի գլխավոր դերակատար Սոֆիկո Ճիաուրելին և նրա մի քանի խաղընկերները:

«Նայում եմ գործերին ու նոր բաներ հայտնաբերում,- ասաց կինոգետ Յուլիկ Սենկևիչը: - Ուզում եմ շնորհակալություն հայտնել Փարաջանովին, որովհետև առանց նրա աշխարհը մի քիչ դատարկ կլիներ»:

Կինոփառատոնի շրջանակներում նշվեց նաև Շառլ Ազնավուրի ծննդյան 80-ամյակը, ցուցադրվեցին Տրյուֆոյի «Կրակեք դաշնակահարի վրա» և Կայատի «Հռենոսյան անցում» ֆիլմերը, որոնց մեջ Ազնավուրը գլխավոր դերակատարն է:

«Առաջին և ամենադժվար քայլն արդեն արված է,- ասաց փառատոնի հիմնադիր և տնօրեն Հարություն Խաչատրյանը: - Հաջորդը հաստատ ավելի հաջող կլինի: Միայն մաղթում եմ, որ այս տարին բեղուն լինի մեր ռեժիսորների համար, որպեսզի «Ոսկե ծիրան-2005»-ին արժանավայել ներկայանան»:

Հուլիսի 4-ին կայացած փակման արարողությունում 14 ռեժիսոր արժանացավ ոսկե ծիրանի փորագրությամբ մարմարե արձանիկների:

Ըստ անվանակարգերի հաղթող դարձան.

Լիամետրաժ ֆիլմերի անվանակարգ` Ատոմ Էգոյան (Կանադա) «Արարատ» ֆիլմի համար: Հատուկ մրցանակ` Արթուր Արիստակեսյան (Ռուսաստան) «Տեղ երկրի վրա» ֆիլմի համար:

Կարճամետրաժ ֆիլմերի անվանակարգ` Ստեֆան Էլմաջյան (Ֆրանսիա)
«Freedub 1» ֆիլմի համար: Հատուկ մրցանակ` Կոմս Շահբազյան (Բելգիա) «Y.U.L.» ֆիլմի համար:

Վավերագրական ֆիլմերի անվանակարգ` Արմեն Խաչատրյան (Հայաստան)
«Հեքիաթ թևավոր ձիու մասին» ֆիլմի համար: Հատուկ մրցանակ` Քրիստինա Դավիդյանց (Էստոնիա) «Մտերմիկ քաղաքը» ֆիլմի համար:

Անիմացիոն և փորձարարական ֆիլմերի անվանակարգ` Ստեֆան Էլմաջյան (Ֆրանսիա) «Freedub 1» ֆիլմի համար: Հատուկը մրցանակ` Սերժ Ավետիքյան (Ֆրանսիա) «Կյանքի գծեր» ֆիլմի համար:

Ուսանողական և դեբյուտային ֆիլմերի անվանակարգ` Մարիա Սահակյան (Հայաստան, Ռուսաստան) «Հրաժեշտ» ֆիլմի համար:

Վիդեոարվեստի անվանակարգ` Դիանա Հակոբյան (Հայաստան) «Ես չեմ հավատում ձեր երազներին» ֆիլմի համար:

Փառատոնի կազմակերպիչ Հայաստանի կինոգետների և կինոլրագրողների ասոցիացիայի սահմանած հատուկ մրցանակին արժանացավ Էդգար Բաղդասարյանը (Հայաստան) «Սուրբ ծեսերի երկիրը» ֆիլմի համար: