ArmeniaNow.com - Independent Journalism From Today's Armenia
July 2, 2004




Զենք և հավատք. պետությունն այլընտրանք է ապահովում որոշ հավատացյալների համար

Հուլիսի 1-ին ուժի մեջ մտավ «Այլընտրանքային զինծառայության մասին» օրենքը:

Կրոնական նկատառումներով զենք կրելուց հրաժարվողները առաջիկա զորակոչի համար մինչև սեպտեմբերի 1-ը կարող են դիմել զինվորական կոմիսարիատներ` այլընտրանքային ծառայության իրավունք ստանալու համար: Սակայն 24 ամսվա փոխարեն նրանք կծառայեն 36-42 ամիս:

Մինչև այժմ զինծառայությունը Հայաստանում պարտադիր էր առանց բացառության բոլոր երիտասարդների համար: Այլընտրանքային ծառայությունն իրականացվելու է երկու ձևով. այլընտրանքային զինվորական ծառայություն, որը տևելու է 36 ամիս և անցկացվելու է զինված ուժերի համակարգում, սակայն չի առնչվելու մարտական առաջադրանքների հետ, և այլընտրանքային աշխատանքային ծառայություն, որև տևելու է 42 ամիս և անցնելու է քաղաքացիական ծառայության տեսքով հիվանդանոցներում, ծերանոցներում և այլ սոցիալական հաստատություններում:

Սեդրակ Սեդրակյանն ակնկալում է, որ այլընտրանքային ծառայության դիմողները շատ չեն լինի

«Հայտնի չէ, թե որքան դիմումներ կլինեն, սակայն պետք է ենթադրել, որ դրանք չեն գերազանցի երեք տասնյակը: Դա էական չի լինի Հայաստանի զինված ուժերի համար»,- ասում է ՊՆ իրավաբանական վարչության պետ Սեդրակ Սեդրակյանը:

«Առայժմ տեղեր են առաջարկել որոշ նախարարություններ, և բնականաբար տեղերում էլ կազմակերպվելու են այդ աշխատանքները: Վարչապետի հանձնարարությամբ առաջարկներ են ուղարկվել գրեթե բոլոր գերատեսչություններին»,- ասում է Սեդրակյանը:

«Այլընտրանքային զինծառայության մասին» օրենքի ընդունումը Եվրոպայի խորհրդի առջև Հայաստանի ստանձնած պարտավորություններից էր, որն ընդունվեց այս տարվա հունվար ամսին:

Կառավարությունում և Ազգային ժողովում վերջին 4-5 ամիսներին քննարկումներ են տեղի ունեցել, փոփոխություններ ու լրացումներ են կատարվել օրենքը կիրառելի դարձնելու նպատակով: Դրանք վերաբերում էին այլընտրանքային ծառայողների ծառայության տեսակին, սոցիալական ապահովությանը, ծառայության պատասխանատվությանը, վայրին, համազգեստին և այլ խնդիրների:

Այլընտրանքային ծառայության համար սահմանված ժամկետներն արժանացել են Եվրախորհրդի փորձագետների քննադատությանը: Եվրոպացիները համարում են, որ դրանք չափազանց երկար են և նման են պատժի: Նրանք պնդում են, որ զինվորական և քաղաքացիական ծառայության ժամկետները պետք է հավասար լինեն, որպեսզի պաշտպանվեն մարդու իրավունքները:

«Մենք որդեգրելու ենք երկու սկզբունք. մեր բանակը մնալու է պարտադիր զինծառայության հիմքի վրա համալրվող բանակ, և մենք ընդունում ենք այլընտրանքային ծառայություն ոչ թե իր քաղաքացիական իմաստով, այլ որպես առաջին քայլ դեպի քաղաքացիական ծառայություն»,- ասում է օրենքի նախագծի հեղինակ և Դաշնակցություն խմբակցության անդամ Վահան Հովհաննիսյանը:

Խորհրդարանական բոլոր ուժերը քննարկումների ընթացքում միակարծիք էին օրենքն ընդունելու հարցում, սակայն, ըստ նրանց, դա չի նշանակում, որ հայկական կողմը կատարելու է եվրոպական կառույցների ներկայացրած բոլոր պահանջները:

Այլընտրանքային ծառայության հնարավորությունն օրենքը նախատեսում է բացառապես կրոնական համոզմունքների հիման վրա: Այն չի նախատեսվում, մասնավորապես, պացիֆիստական համոզմունքների համար: Այլընտրանքային ծառայություն անցնել ցանկացողները պետք է դիմեն պաշտպանության նախարարություն և համոզեն պաշտոնյաներին, որ իրենց կրոնական հայացքներն արգելում են զինվորական ծառայություն անցնել:

Իրավապաշտպան կազմակերպությունները նշում են, որ օրենքը թերի է և գործնականում չի գործելու: «Կարծում եմ, օրենքը պարզապես կմնա թղթի վրա: Օրենքն իր տրամաբանությամբ պատժիչ է»,- ասում է Հայաստանի հելսինկյան կոմիտեի նախագահ Ավետիք Իշխանյանը:

Հայկական բանակում զինվորական ծառայություն են անցնում ազգային փոքրամասնությունների ներկայացուցիչներ` եզդիներ, մոլոկաններ, սակայն միայն Եհովայի վկաներն են հայտարարում, որ զինվորական ծառայությունը հակասում է իրենց համոզմունքներին:

Բանակում ծառայելուց հրաժարվելու համար քսան Եհովայի վկաներ ենթարկվել են դատական պատասխանատվության և դատապարտվել ազատազրկման, ինչն առաջ է բերել Եվրախորհրդի և կրոնական անհանդուրժողականության դեմ պայքարող այլ միջազգային կազմակերպությունների քննադատությունը: Սակայն հակառակ Եվրախորհրդի պահանջի` նրանց շարունակում են պահել ազատազրկման վայրերում:

«Այս օրենքը պետության հանդեպ պարտավորության փոխարինման ձև է, որը վերաբերում է այն կրոնական համայնքներին, որոնց կրոնական համոզմունքը թույլ չի տալիս զենք կրել»,- ասում է ՊՆ իրավաբանական ծառայության պետ Սեդրակյանը:

«Օրենքն ընդունելուց հետո գոնե Եհովայի վկաներին քրեական պատասխանատվության ենթարկելու խնդիր չի առաջանա»,- ասում է նա:

Նա համաձայն չէ այն կարծիքին, թե այսպիսի մոտեցումը երիտասարդներին կարող է մղել դեպի աղանդավորական կազմակերպություններ: Այլընտրանքային զինծառայողները զորակոչվելու են առանձնացված ստորաբաժանումներ, որոշակի կրոնական փոքրամասնությունների ներկայացուցիչներ լինելու են իրար հետ:

«Նրանք կծառայեն Հայաստանի զինված ուժերում, բայց ոչ ռազմական ստորաբաժանումներում: Ընտրվել է վաշտի սկզբունքը, որոշակի թվով այլընտրանքային զինծառայողներ կկատարեն իրենց պարտքն առանց զենք կրելու»,- ասում է Սեդրակյանը:

«Նրանց հետ չեն լինի այն քաղաքացիները, ովքեր չունեն կրոնական հայացքներով պայմանավորված սահմանափակումներ: Մեր խնդիրն է ապահովել այնպիսի պայմաններ, որ նրանք միմյանց չխանգարեն»:

Այս տարվա մարտի 1-ին ուժի մեջ մտավ ևս մեկ օրենք, որը թույլ է տալիս պարտադիր զինծառայությունից խուսափած և արտասահման մեկնած առնվազն 27 տարեկան տղամարդկանց ներման արժանանալ` որոշակի գումար մուծելով ՊՆ հատուկ հաշվին:

Ըստ ՊՆ տվյալների, նման քաղաքացիների թիվն առնվազն հինգ հազար է: Յուրաքանչյուր խուսափած զորակոչի համար նրանք պետք է որոշակի գումար մուծեն` առավելագույնն ընդամենը 1,8 միլիոն դրամ: Ըստ ՊՆ իրավաբանական վարչության պետ Սեդրակյանի` առ այսօր քննարկվել է շուրջ 150 քաղաքացու հարց, որոնց բոլորին էլ դրական ընթացք է տրվել:

«Նախնական հաշվարկով 120-125 միլիոն դրամի հարց է քննարկվել, որից շուրջ 80 միլիոն արդեն մուտք է գործել ՊՆ համակարգ»,- ասում է Սեդրակյանը:

Նրա կարծիքով` դիմողների մեծ մասը ձգտում է լուծել այս հարցը, որպեսզի Հայաստան ազատ ելումուտ ունենա, քանի որ նրանց հարազատներն այստեղ են:

«Օրենքը կօգնի շատ քաղաքացիների վերականգնելու իրենց կարգավիճակը, հնարավորություն ունենալ ազատ այցելել կամ մեկնել Հայաստանից»,- ասում է Սեդրակյանը:


According to Agnes
 

  Inside
 

Resolved: Survey finds Armenians ready to defend Karabakh at all costs

Full story

 
 

Setting the Pace: Kocharyan’s speech at Council of Europe wins praise and criticism at home

Full story

 
 

A Byte with...

Christine Pepelyan

Full story


 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Bearing Fruit

A priest blesses a bowl of Armenian apricots prior to the opening of the Golden Apricot International Film Festival in Yerevan on June 30. The fruit was handed out to guests at the opening ceremony at the city's Moscow Cinema.

 

 



Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.