ArmeniaNow.com - Independent Journalism From Today's Armenia
July 2, 2004




Ուխտագնացների ճանապարհը. երիտասարդները հավաքվում են հոգևոր խորհրդածությունների ու հայտնությունների

Հունիսի 27-ին Մայր Աթոռ Սուրբ Էջմիածինը սովորականից մարդաշատ էր: Արարատյան Հայրապետական թեմի կողմից հռչակված երիտասարդների ուխտագնացության օրն այստեղ էր հավաքել Երևանի տարբեր բուհերի ու դպրոցների շուրջ երկու հազար երիտասարդ:
Էջմիածնում ուխտավորները քայլում են խաչի հետևից

Ուխտագնացության կազմակերպիչն է Արարատյան Հայրապետական թեմի Երիտասարդաց միությունը: Տեղացի երիտասարդների հետ են նաև սփյուռքահայ ուսանողները: Երիտասարդ ուխտավորներին առաջնորդում է Արարատյան Հայրապետական թեմի առաջնորդական փոխանորդ Նավասարդ եպիսկոպոս Կճոյանը:

Ուխտավորներից մեկը` բժշկական համալսարանի վայոցձորցի ուսանողուհի Տիգրանուհի Հովհաննիսյանը, ասում է. «Ուխտագնացությունը յուրաքանչյուր հայի ու քրիստոնյայի պարտքն է: Սա հնարավորություն է ավելի լավ ճանաչելու ազգային եկեղեցիդ»:

Մեկ այլ ուխտավոր` Երևանի ճարտարագիտական համալսարանի ուսանող Արման Հարությունյանն ասում է. «Եթե անկեղծ լինեմ, ապա պետք է խոստովանեմ, որ կազմակերպել են, ես էլ միացել եմ: Բայց այս պահին արդեն գոհ եմ, որ մասնակցեցի, որովհետև զգում եմ, թե որքան ենք մոտենում հոգևոր կյանքին ու ակունքներին, ինչն այսօր այնքան անհրաժեշտ է բոլորիս»:

Ս. Էջմիածնի բակում երիտասարդական աշխույժ եռուզեռ է: Ուխտավորներն սպասում են պատարագի: Եկեղեցու զանգի ախորժալուր ղողանջները նրանց ներս են կանչում: Պատարագը մատուցում է Երիտասարդաց միության հոգևոր պատասխանատու տեր Տաճատ ավագ քահանա Դավիդյանը:

«Ուխտագնացությունը մեծագույն խորհուրդներից մեկն է: Մարդիկ սրբավայր ուխտի գնալով` նախ հաղորդակցվում են այդ սրբավայրին: Ու պատահական չէ, որ ընտրվել է Էջմիածինը. սա այն վայրն է, որտեղ իր օրհնությունը բերեց Քրիստոս»,- բացատրում է Հայ առաքելական եկեղեցու երիտասարդական կենտրոնի պատասխանատու Մանուկ սարկավագ Ղալաչյանը:

Մոմեր և աղոթք

Ըստ նրա` երիտասարդների հոծ բազմությունը ուրախացնում է և հույս ներշնչում` եկեղեցին և ժողովուրդը միասնական են, որով էլ պայմանավորված է եկեղեցու ուժը:

Պատարագից հետո եկեղեցու բակում երիտասարդներն օրհնություն են ստանում: Բաժանվում են «Ս. Էջմիածնի ուխտավորին» գրքույկներ:

Գրքույկում տեղ է գտել Մեսրոպ արք. Աշճյանի «Հեզր աշխարհի» աշխատությունից մի հատված. «Ուխտը դաշինք է, երդում է, խոստում է, հանձնառություն է, տառապանք է, հաղթանակի և նվաճման իրավունք է: Մարդը դեպի երկինք իր մեծ ուղևորության մեջ ուխտավոր է, նրա ուխտագնացությունը երեք կետ ունի: Առաջինը վայրի սրբությունն է. մենք դեպի մի տեղ ենք գնում: Այդ վայրը սուրբ տեղ է: Երկրորդ` ճամփորդում ենք դեպի այդ սուրբ վայրերը: Շարժում է ուխտավորությունը: Երրորդ` տեղափոխվում ենք, մեր նպատակն է ապրել ներկան հոգևոր կերպով և անձի համար ապահովել հոգևոր շահ»:

Մանուկ սարկավագ Ղալաչյանը բացատրում է. «Ուխավորին ժամանակին մահտեսի էին ասում, ուխտավորը չէր մտածում` ինչ պիտի ուտի, որտեղ պիտի գիշերի ու երբ պիտի հասնի: Ասում էին` «Առաջ Աստված» ու քայլում դեպի այդ սրբատեղին»:

Արարատյան Հայրապետական թեմի մամլո դիվանի պատասխանատու էլզա Մանուկյանն ասում է. «Մեր թեմն այսպիսի ուխտագնացություններ կազմակերպում է ամեն տարի: Հրավիրել ենք բոլոր ուսանողներին, նաև այն երիտասարդներին, ովքեր նոր են ավարտել դպրոցը և նոր կյանքի շեմին են: Շատերն ուսումնառությունն ավարտում են, շատերն էլ պատրաստվում են քննությունների: Այս ամենը կապված է մեծ նպատակների հետ, որոնցով նրանք այսօր ուխտի են եկել Ս. Էջմիածին»:


According to Agnes
 

  Inside
 

Resolved: Survey finds Armenians ready to defend Karabakh at all costs

Full story

 
 

Setting the Pace: Kocharyan’s speech at Council of Europe wins praise and criticism at home

Full story

 
 

A Byte with...

Christine Pepelyan

Full story


 


 


The Week in seven days

 
 


The Arts in seven days

 

  Photo of the week
  Click here to enlarge.
Click on the photo above to enlarge.
 
 
 
 

Bearing Fruit

A priest blesses a bowl of Armenian apricots prior to the opening of the Golden Apricot International Film Festival in Yerevan on June 30. The fruit was handed out to guests at the opening ceremony at the city's Moscow Cinema.

 

 





Copyright ArmeniaNow.com 2002-2017. All rights reserved.

The contents of this website cannot be copied, either wholly or partially, reproduced, transferred, loaded, published or distributed in any way without the prior written consent of ArmeniaNow.com.